Joel 3 - Intas Etipup

Nuarin tas alupas 3.

1 Neruvaig u Atua irai ilpu atimi edemda vai ilpu atimi o un. 9 Uhpu ato Atua va neruvaig o un. 18 Intas acis yi alwai u Atua ehele nup an nakalasia o un.

¹ IM lep inig, irai adiat iji ehki, im lep an nopan iyehki, eku wit imiadumoij pam nup u Juta im nup u Jerusalem ainyak eris lucsei pan ra an taka pece,

² ekpu lep asjapicnaig nup urai iji pece asega ainyak, ekpu imiasuol ra ainyak an niskanse u Jehosafat, ekpu aru ira ra ainyak eahki vai ilpu atimi unyak im nup Isreel ek ohuun ra ainyak, eris imiterimterim ira ra ara ehele nup urai iji pece, um ahaig sjipe inpece unyak.

³ Era mun ago itai asjaaicnaig ara vai ilpu atimi unyak; um ahtai nadualep et ethi nimtai intakata ago ingeijid, um ahtai inhalav atahig et ethi vai waina, mika eri umnyi ara.

⁴ Ak nup u Tairus, im nup u Saiton, im nup urai iji uarin pece asega Filistia, akupu ago inhe aijaua vai nyak? akupu imiapam neruvaig imtak aijaua ka oʼo? el eka ago neruvaig imtak aijaua, ekpu auroauro ainyak, eti itu iyehki, um imiadumoij neruvaig unyimia irai idjinimia.

⁵ Va nedo unyimia, nikavaig, eka mun iknipagki silver unyak aijaua im colt unyak; eka mun lep imiapan irai eom itap unyimia niji itai unyak et upene ek lep merit vaig ainyak:

⁶ eka mun lep ahtai nup u Juta aijaua im nup u Jerusalem imi nup u Crisi, mika aki imiapan ra itac acen eri udei inpece ura.

⁷ Ekpu idim imiatidai ra ainyak an pece inig eka mun ahtai ra iran aijaua, um imiadumoij pam neruvaig unyimia irai idjinimia:

⁸ ekpu ahtai ilpu halav atamaig unyimia ainyak im ilpu halav atahig unyimia ehele nup u Juta, eri ahtai ra ara ehele nup u Siba, natimi an pece itac acen: et mun idim asaig intas inigki a Ihova.

⁹ Akumu asuptecnaig nitai inigki ehele nup urai iji pece aijaua, um ika, Akumu amatata va nedoa aijaua, akumu imiatidai ilpu eucsupo aijaua, erumu apam ubutpotet um aridjipam a ilpu eucsupo asega:

¹⁰ akumu atcei irak hat unyimia aijaua par ago auitoga, im naife ahped vaine par ago mopul: etmu ika aien et auatialidi aien, Ek mun emda ainyak.

¹¹ Ak nup urai pece asega marehed mihtag, akumu asjapicnaig aijaua, um ahtag pam, akumu asjapicnaig caua aijaua ahes irai uarin asega: ak Ihova, namu ika aiek eri asuolse an nuarin iyehki niji ira atimi emda unyum.

¹² Erumu atidai a nup urai iji pece, um aridjipam an niskanse u Jehosofat: ekpu idim ateuc ainyak um asjaaicnaig irai nup urai iji pece asega marehed mihtag.

¹³ Akumu ucsei itai aijaua irai naife ucsei hwiit, et mun meto hwiit: akumu apam aijaua, um asuol; et mun ohua nohwai vaine an nitai ahtaijiraig, et ohua um elel nide vaine an netpen; et idim esjilid nauatatimi ura.

¹⁴ Erupu ahinag acen natimi, erupu idim ahinag acen natimi an niskanse inig er aru ira atimi iran: et mun ubutpotet pam nadiat u Ihova an niskanse inig er ara ira atimi iran.

¹⁵ Etpu apat nagesega im lep inmohoc, eri eti lep nau niji moijeuv.

¹⁶ Etpu lep alupas nohrai Ihova an nedoon Saion, etpu tas pam aien an maliyum Jerusalem; etpu eucjeucjeucaij nohatag im lep nobohtan: ja etpu adenaig ilpu atimi o un a Ihova, etpu aibuthan nup Isreel aien.

¹⁷ Akupu lep ato aijaua mika, ek Atua unyimia ainyak Ihova, ek amen ainyak Saion, nedoon itap unyak: ja etpu itap Jerusalem; erupu eti lep aat iran a nup urai taka pece irai iji mesese.

¹⁸ Im lep inig, an nadiat iyehki etpu ahtahtise nide vaine irai iji edoon, etpu yah nidenided irai edoon tintin, etpu yah inwai irai auiwai asega an pece Juta, etpu eteuc nimtanwai anliin neom o Ihova, um yah pan par ofowai an niskanse Sitim.

¹⁹ Etpu umaruma inpece Ijipt, etpu amasacen inpece Itom um ahyuahyu, va nedo ipjin ura vai nup u Juta, eris idim atgei ilpu atimi upene ara an pece ura.

²⁰ Ja erupu amen aktit a nup u Juta irai iji mesese, im lep nup u Jerusalem irai iji opan asega.

²¹ Ekpu idim ohpodohpod nedo has u natimi iji igki ainyak, kis upyi hup ainyak um aru nedo has ura: etpu idim amen an nedoon Saion a Ihova.