Joel 2 - Intas Etipup

Nuarin tas alupas 2.

1 Et asuptecnaig ehele nup u Saion a Joel neruvaig u Atua er imtitaig vaig. 12 Et ated ra aien mika eri adumoij an liinmopora, 15 um ati nadiat atwakam, 18 um ika yi asan tas acis yi alwai ra a Atua vaig. 20 Et ago eropse inliinmopoi nup u Saion aien um ika eri amen upene ara an nopan inig, 28 im lep an nopan iyehki.

¹ AKUMU ahlai intoho aijaua an nedoon Saion, etmu acreh an nedoon itap unyak; erumu eucjeucjeucaij a nup urai pece asega: et idim apam nadiat u Ihova, et idim ubutpotet.

² Et adiat u napat im inmehcim nadiat inigki, et idim adiat u napat im inmehcim nadiat inigki: era apam natimi et ahinag acen um emda; et idivaig inlah an nuhialeg et athut tarere irai edoon: eris eti uce hal itu acen, eri eti lep eteuc hal et idivaig irai iji mesese asega.

³ Et auahas itai incap an nuhup ura; et lep cas incap um apitac ra: et idivaig nahapol Itena inpece an nuhup ura, ja et eteuc namasacen alupas an cehera; etpu ehka vaig tah nitai par aha vai ra.

⁴ Et idivaig nago irai hors nago ira ra; erupu athut ara et idivaig ilpu atimi ateuc irai hors.

⁵ Erupu eliaujai irai au ara et idivaig inmotjai jariot, et idivaig inmotjan nalaume u incap et wat atnamud inceei korn, era idivaig ilpu atimi emda er esyei ra va nedoa.

⁶ Erupu eucjeucjeucaij natimi an nuhup ura: etpu has nesganimta atimi asega.

⁷ Erupu athut ara et idivaig ilpu atimi emda; erupu aridjai irai athatahau ara et idivaig ilpu eucsupo; erupu ati naunakwai ira ra ara, etpu idim apapa natga ura.

⁸ Erupu eti ahtahlo jipe ra ara; erupu atga athiathi ara irai efalaig ura: el era eropjai ara irai auitoga, el era eti leh inmocop ara.

⁹ Erupu athut jipe ara an maliyum; erupu athut an nathatahau ara; erupu aridjai irai eom ara; erupu amiliak pan anliin irai mai eom ara et idivaig natimi ehnegitai.

¹⁰ Etpu ahcatina nobohtan an nuhup ura; etpu eucjeucjeucaij nohatag: etpu apat nagesega im lep inmohoc; etpu eti lep nau niji moijeuv an nohatag.

¹¹ Etpu asaig intas o un a Ihova ehele inpak an nedoa o un: et idim alupas acen nuarin amen iran u ilpu eucsupo o un: et idim emda aien et ehneijid intas o un: et idim alupas nadiat u Ihova, er lep imtitaig alupas vaig; et emda a di nanaijiraig vaig?

¹² Va nitai inigki, et ika a Ihova, akumu adumoij pam ehelek aijaua an liinmopomia asega; akumu lep atwakam aijaua, um taigtaig, um ehtigtaig:

¹³ akumu ahpati inliinmopomia aijaua, jam jim ahpati apelumai unyimia, um lep adumoij pam ehele Ihova Atua unyimia: et idim tup ispun aiheuc va atimi asega aien, et eti eriss ira ra aien, et eti fi auroauro aien um edemda, et esjilid nedo aiheuc o un, et adumoij an liinmopon aien va neruvaig nedo has.

¹⁴ Et ato a di? kit etpu lep ahidai yin aien um adumoij an liinmopon, um udei se nitai upene etu wit atga o un aien; nitai ahlap marom eh caig, im lep nitai ahlap er umnyi, vai Ihova Atua unyimia.

¹⁵ Akumu ahlai intoho an nedoon Saion aijaua, um ati nadiat atwakam, um asa nadiat asjapicnaig iran:

¹⁶ akumu asjapicnaig atimi aijaua, um ago itap atimi eri asjapicnaig ara, asjapicnaig ilpu fatimi, asjapicnaig ilpu halav, im lep ra era ided ara: etmu ahes an nuarin neom o un a natimi tup paam leh ehgan, um lep ahes an nilpun neom o un a intakata tup paam amen ehele natamnyu un.

¹⁷ Erumu taigtaig an niblan naiyu im natau a ilpu atimi ahlap, ilpu aheca u Ihova marom, erumu ika ara, Ak Ihova, namu aiheuc vai ilpu atimi unyum aiek, um jim atcijaig atimi na ohuun ra aiek mika eri ehcamai ara, va eri jim esjilid ira ra a nup urai iji pece: et eti upene mika eri ika natimi, Atua ura yek eda?

¹⁸ Ja etpu ohocred a Ihova, et idivaig natimi oporei, van pece o un, um aiheuc vai ilpu atimi o un.

¹⁹ Im lep inig, etpu tas pam a Ihova um ika ehele ilpu atimi o un, Ekpu idim alupai caua hwiit ainyak, im nide vaine, im narakei oliv, akupu geije iran aijaua: inki eti lep udei caua ainyak mika aki ehcamai aijaua ehele nup mai iji pece:

²⁰ ja ekpu imiaha an nuarin itac acen vai caua inpak an nedoa iyehki eris ahes an pece inig et ahes narutu iran ara; ekpu ahau ra ainyak um yetpan an pece et ti inwai iran et lep ahyuahyu: erupu yaspan an jap an ridjai o un ara, um atidjira u unjap an nete o un, etpu aridjai nauanipin has ira ra, etpu has nimtinjap vai ra, vaig inig nikavaig, eris ika ara is alupas nitai iji igki eris ago ara.

²¹ Ak inpece Juta, namu jim imtitaig aiek; namu imiacitak aiek um cediaig: etpu idim ago niji itai alupas a Ihova.

²² Ak niji itai eklim edo irai pece, akumu jim imtitaig aijaua: et idim ededel nefelelicai irai uarin iji ig et edo iran niji itai eklim edo irai pece, et oho niji cai, et oho alupas niji ateg im lep niji vaine.

²³ Ak nup u Saion, akumu imiacitak aijaua, um cediaig vai Ihova Atua unyimia: vaig inig nikavaig, et mun alupai caua upene incopda uhup aien, etpu ika aien yi ehe vai caua an copda uhup, im lep incopda apitac, et idivaig an nopan iyehki.

²⁴ Etpu ohua hwiit irai uarin auud hwiit iran, etpu ohua um elel itai ahtaijiraig nohwai vaine im narakei oliv iran.

²⁵ Ekpu aru iramia ainyak vai inmesese iji ehki, eris hegai itai iran niji pak irai heled era ahad an nobohtan ara, im niji pak irai heled era eluon itai ara, im niji pak irai heled era auahas itai ara, im niji pak irai heled era asjages ara, inpak an nedoa unyak et alupas nigki, kis abrai ra ehelemia ainyak.

²⁶ Akupu idim hag aijaua, um geije, um imiahpas nidai Ihova Atua unyimia, is ago itai imiali iramia aien: eri eti lep ehcamai a ilpu atimi unyak irai iji mesese.

²⁷ Akupu lep ato aijaua mika ek amen ehele nup Isreel ainyak, im lep mika ek Atua unyimia ainyak Ihova, um eti lep eteuc tah: eri eti ehcamai a ilpu atimi unyak irai iji mesese.

²⁸ Etu wit ti pan itac nitai iji igki, ekpu atladwi Nesgak ira atimi asega ainyak; erupu ahidan tas a ilpu halav atamaig unyimia im ilpu halav atahig unyimia, erupu umjeg ahnag a ilpu fatimi unyimia, erupu ahuumtidec irai itai a ilpu takuras unyimia.

²⁹ Im lep inig, ekpu lep atladwi Nesgak ainyak irai ilpu aheca atamaig im lep ilpu aheca atahig irai adiat iji ehki.

³⁰ Ekpu ika ainyak yi ehcohos niji itai imiali an nohatag im lep an nobohtan, nikavaig, inja irai itai, im incap, im nadran cap et aridjai.

³¹ Etpu apat nagesega, um idivaig inja inmohoc, ja etpu yetpam nadiat esjilid u Ihova, nadiat eri imtitaig vaig iyehki.

³² Ja uhpu imiatamai ra asega, erupu arohwai nidai Ihova ara: erupu idim amen a ilpu atimi iji ig eris imiatamai ra an nedoon Saion im lep inmaliyum Jerusalem, et idivaig is asaig a Ihova; erupu lep amen ara ehele ilpu ahri atimi iji ig etpu imiacaij ra a Ihova.