Joel 1 - Intas Etipup

Nuarin tas alupas 1.

1 Et asuptecnaig neruvaig u Atua et acheiachei a Joel, um ated ra mika eri aktaktai upene ara, 8 um taigtaig. 14 Et ati nadiat atwakam aien mika eri alaigaheni iran ara.

¹ INTAS o Ihova is yetpam ehele Joel inhal u Peduel nigki.

² Ak ilpu fatimi, akumu atahaijeg nitai inigki aijaua: ak nup urai pece asega, akumu atgeig pam intikgamia aijaua: is idim eti eteuc tah nitai et idivaig nitai inigki an nopan unyimia, im lep irai opan amen u ilpu atmil unyimia.

³ Akumu asuptecnaig vaig aijaua ehele ilpu hal unyimia, erumu lep asuptecnaig a ilpu hal unyimia ehele ilpu hal ura, um lep asuptecnaig a ilpu mapomia ehele ilpu hal ura.

⁴ Nitai iji igki eris udei niji pak irai heled era asjages, era mun hegaig niji pak irai heled era ahad an nobohtan; im lep nitai iji igki eris udei niji pak irai heled iji ehki, era mun hegaig niji pak irai heled era eluon itai; im lep nitai iji igki eris udei niji pak nai heled era eluon itai, era mun hegaig niji pak irai heled era auahas itai.

⁵ Akumu aiji lahlah aijaua, ak ilpu atimi ahnag vai kava itoga, um taigtaig; akumu aunyauwaig aijaua, ak ilpu atimi asega eka umnyi waina aijaua; vaig inig nikavaig, aki eti lep umnyi waina adale aijaua.

⁶ Era mun aridjipam an pece unyak a nup uran pece et ethi, era emda ara, et ehka nesvi ra vaig, et idivaig neiji laion neijira, et eteuc ehele ra nuctai laion alupas.

⁷ Era mun auahas niji vaine unyak ara, era mun ahosji niji ateg unyak ara: era mun ahosji ehni ara um lep erekhaig; um ago ahi niji ran.

⁸ Akumu taigtaig aijaua, et idivaig natahig inig et aso yin an napelumai uucai aien van mas u natamnyu un, is aminjinanlai ehelen aien an natahig vaig o un jam eti atidai.

⁹ Et eti lep eteuc an neom o Ihova nitai ahlap eh caig, im lep nitai ahlap er umnyi: era taigtaig a ilpu atimi ahlap, ilpu aheca u Ihova marom.

¹⁰ Et mun has inpece, et taigtaig nobohtan; et idim tiih hwiit: et ame nide vaine, et mun tiih narakei oliv.

¹¹ Ak ilpu atimi ahapol, akumu ehcamai aijaua vai hwiit im barle; et mun idim tiih hwiit im barle an pece.

¹² Ak ilpu atimi aminjinaig vaine, akumu aunyauwaig aijaua, et mun mese niji vaine, et mun imlai niji ateg; et mun idim mese niji ipjid, im niji eaig, im niji pain apel, im lep niji cai asega anliin teucjip: et mun tiih nimiacitak u atimi asega.

¹³ Ak ilpu atimi ahlap, akumu ahid apelumai uucai aijaua, um taigtaig: ak ilpu aheca amen u natau, akumu aunyauwaig aijaua: ak ilpu aheca u Atua unyak, akumu apam aijaua, um asjeuc ira apelumai uucai an nepig asega: et eti lep eteuc an neom u Atua unyimia nitai ahlap eh caig im lep nitai ahlap er unmyi.

¹⁴ Akumu ati nadiat atwakam aijaua, asaig nadiat asjapicnaig, akumu asjapicnaig ilpu fatimi aijaua, im natimi asega an pece, an nimnim u Ihova Atua unyimia, akumu ugyi emda Ihova aijaua.

¹⁵ Kaiheuc vai caija vai nadiat iyehki! et idim ubutpotet nadiat u Ihova, etpu yetpam et idivaig tah nitai auahas atimi et ahes ehele Atua emda acen.

¹⁶ Et mun idim atiih nitai hegaig an nuhup uja, et mun tiih incediaig im nimiacitak an nimnim u Atua uja.

¹⁷ Et idim mutit nupsi korn anliin tan, er auahas niimai korn, er alcapdicraig niji eom ikni korn iran: et idim mese korn.

¹⁸ Et esjilid naunyauwaig u iji itai eklim edo irai pece! era ohocred kurimatau, et idim tiih nomotmot incara; et mun tiih inpak irai siip.

¹⁹ Ak Ihova, ekpu ahlaig vai euc ainyak: er auahas inlelitai iji ig an cap era edo iran niji itai eklim edo irai pece, er atnamud niji cai asega anliin teucjip.

²⁰ Era aunyauwaig vai euc niji itai eklim edo irai pece: et idim ame niji ofowai, er atnamud nomotmot irai lelitai eris edo iran ara.