Joanes 21 - Intas Etipup

Nuarin-tas alupas 21.

¹ IS wat ti pan itac nitai iji eigki, is lep ehcohos pan a Iesu ehele ilpu atimi atahaijeg yin u unjop Taibiryas; is ehcohos pan aien is ucce.

² Eris amen an nuarin is ethi a Saimona Pitrus, im Tomas, tak idan Titimus, im Nadanyel nupu Kena an pece Calili, im ohwat hal o Sebetaius, im lep natimi atahaijeg yin is ero is eche.

³ Is um ika ehele ra a Saimona Pitrus, Ekpu apok ainyak, um ahilek mu. Eris um ika ehelen ara, Ecri ahced euc aijama. Eris apok ara, um auroauro um aridjai an nelcau; ja eris eti leh tah nitai ara an nepeig iyehki.

⁴ Is wat lahlah an nuhialeg, is aij a Iesu an nohmunjop: ja eris eti ato a ilpu atimi atahaijeg yin, nikavaig, Iesu iyehki.

⁵ Is um ika ehele ra a Iesu, Ak ilpu takuras, eka mun leh numu aijaua, ka oʼo? Eris um ika ehelen ara, Oʼo.

⁶ Is um ika ehele ra aien, Atise nopoig aijaua an matan nelcau, akupu leh aijaua. Eris atise ara, is elika vai ra nase nopoig vaig vai mu is ahinag.

⁷ Is um ika a natimi atahaijeg yin iyehki, is aiyu inliinmopoi Iesu vai yin, ehele Pitrus, Natimarid mun eigki. Is wat atahaijeg a Saimona Pitrus, nikavaig, Natimarid iyehki, is aso yin aien an napelumai imyiahilek mu, (is ahid lavalava ache aien,) um asuol an jop.

⁸ Eris lep apok an nalvelcau nahaiji ilpu atimi atahaijeg yin, um aihiaig pahai nopoig irai mu; eris ubutpotet u nimtidin ara, is idivaig is wun huntret nesja neduon.

⁹ Eris wat apahai ara, eris eceta incop ara irai humla eahki, im numu eris ahen iran, im nareto.

¹⁰ Is um ika ehele ra a Iesu, Imyiapam tah numu iji eig eka leh aijaua.

¹¹ Is apan a Saimona Pitrus, um aihiaig pahai nopoig, is eucen iran numu alupas, is wun huntret im fifti dri, um ohua: ja is eti ahtamud nopoig numu iji ehki is ahinag.

¹² Is um ika ehele ra a Iesu, Apam aijaua um hag. Eris imtitaig a ilpu atimi atahaijeg yin asega nahodai yin vaig, um ika, Aiek di aigki? Eris ato ara mika is Atimarid aien.

¹³ Is apan a Iesu, um leh nareto im lep numu, um alaa ra.

¹⁴ Nehceseij ehcohos pan o Iesu ineigki ehele ilpu atimi atahaijeg yin, an nusjai o un vai inmas o un.

¹⁵ ¶ Eris wat hag ara, is um ika a Iesu ehele Saimona Pitrus, Ak Saimona, inhal o Jonas, et esjilid naiyu u unliinmopom aiek vai nyak irai ra sji eigki, ka oʼo? Is um ika ehelen aien, Maiya, ak Natimarid; na ato aiek, nikavaig, et aiyu inliinmopok ainyak vai euc. Is um ika ehelen aien, Alayi hakli siip unyak aiek.

¹⁶ Is ehcero ika ehelen aien, Ak Saimona, inhal o Jonas, et aiyu inliinmopom aiek vai nyak, ka oʼo? Is um ika ehelen aien, Maiya, ak Natimarid; na ato aiek, nikavaig, et aiyu inliinmopok ainyak vai euc. Is um ika ehelen aien, Aminjinaig siip unyak aiek.

¹⁷ Is ehceseij ika ehelen aien, Ak Saimona, inhal o Jonas, et aiyu inliinmopom aiek vai nyak, ka oʼo? Is ohocred a Pitrus vai intas o un, nikavaig, is ehceseij ahodai yin aien, um ika, Et aiyu inliinmopom aiek vai nyak, ka oʼo? Is um ika ehelen aien, Ak Natimarid, na ato niji itai asega aiek; na ato aiek, nikavaig, et aiyu inliinmopok ainyak vai euc. Is um ika ehelen a Iesu, Alayi siip unyak aiek:

¹⁸ et idim inivaijec ineig ek asaig ehelum ainyak mika, As wat takuras aiek, as ahid napelumai unyum aiek, um apan an nuarin ineig as merit vaig aiek: ja na wit efatimi aiek, napu atgeig yapidi nikmam aiek, etpu ahid napelumai unyum intak atimi, um imyiapan euc an nuarin ineig na eti merit vaig aiek.

¹⁹ Is asan tas ineigki aien par asuptecnaig nedo vai inmas o un ineig etpu imyiahpas Atua vaig aien. Is asan tas ineigki aien, ja par ika ehelen, Apitac nyak aiek.

²⁰ Is ahidai yin a Pitrus, um alum natimi atahaijeg Iesu iyehki, is aiyu inliinmopon aien vai yin, napitac yin vaig; aien aigki is asgeig an ritin aien u inhag iyehki, um lep ika, Ak Natimarid, etpu aniv euc a di?

²¹ Is wat alum yin a Pitrus, is ika ehele Iesu aien, Ak Natimarid, inyi auri natimi ineigki?

²² Is um ika ehelen a Iesu, El ek merit ainyak mika yi aitgaig napam unyak aien, tup ainyak marom; namu apitac nyak aiek.

²³ Is apaahni intas ineigki ehele ilpu etoan, mika inyi ti mas natimi atahaijeg yin iyehki: ja is eti ika ehelen a Iesu, Inyi ti mas aien; ja, El ek merit ainyak mika yi aitgaig napam unyak aien, tup ainyak marom.

²⁴ Et asuptecnaig nitai iji eigki a natimi atahaijeg Iesu iyehki, um lep aged nitai iji eigki: ecra ato aijama nikavaig, et inivaijec nasuptecnaig o un.

²⁵ IS lep ago niji itai is ahinag is eche a Iesu, el eh aged niji itai asega, ek ika ainyak, inyi idim tintin nobohtan inlehvaig nitasvitai iji eig er aged. Emen.