Joanes 2 - Intas Etipup

Nuarin-tas alupas 2.

¹ IS wat ti pan itac nadiat is eseij, eris auanetha an natmehgan Kena an pece Calili; is amen eahki a risi Iesu:

² eris imyiacaij Iesu im lep ilpu atimi atahaijeg yin mika eri apan ara u netha an natmehgan.

³ Is wat ti waina, is um ika ehele Iesu a risin, Et ti waina ura.

⁴ Is um ika ehelen a Iesu, Ak intakata ineigki, nai merit aiek vanhe ehelek? et eti fi yetpam naopan unyak.

⁵ Is um ika a risin ehele ilpu aheca, Akumu ago nitai ineigki aijaua etpu asaig ehelemia aien.

⁶ Is amen eahki nipjihat uri wai i is siks par yiri itai iran, et idivaig nedo o nupu Jutaia, is apapa pan a callun is eetiin ka is twente seven iran asegasega.

⁷ Is um ika ehele ra a Iesu, Atladwise wai aijaua irai ipjihat yi ohua. Eris um atladwise iran ara, is um ohua.

⁸ Is um ika ehele ra aien, Leh aijaua um imyiapan ehele natimi esjilid an nahai itai. Eris imyiapan ara.

⁹ Is atemtem an wai iyehki a natimi esjilid an nahai itai is um waina, ja is eti ato aien igca eris leh; (ja eris ato a ilpu aheca athun wai,) is ahlaig vai natimi leh ehgan a natimi esjilid an nahai itai,

¹⁰ um ika ehelen, Era upyi hup natimi asega um ati waina upene; eru wit unmyi natimi, ja par apitac um ati waina has: jai na mun aminjinaig waina upene aiek um uhum pam an naopan ineig.

¹¹ Is atupun a Iesu um ago nauritai elika ineigki Kena an pece Calili, um ehvaig natimi alupas o un; eris imyiisjis ninivaijec yin a ilpu atimi atahaijeg yin.

¹² ¶ Is ago nedo ineigki aien, ja par apan Kaperneum, aien, im risin, im ilpu etoan, im ilpu atimi atahaijeg yin; eris amen eahki ara ira adiat is eti elpat.

¹³ IS um ubutpotet u napaska o nupu Jutaia, is apan Jerusalem a Iesu;

¹⁴ is ecet ilpu atimi ahtai kurimatau im siip im nalaupa aien anliin neom ahlap, im ilpu atimi ahtai mune, eris ateuc ara:

¹⁵ is ago nitai auud aien irai hakli ya, um ahlo pok ijo ra asega anliin neom ahlap, im lep siip ura, im kurimatau; um atladwi mune o ilpu atimi ahtai mune, um amejatpuh efata ura;

¹⁶ is um ika aien ehele ilpu atimi ahtai alaupa, Imyiahah nitai iji eigki aijaua; um jim ika et eom ahtai itai iran neom o Etmak.

¹⁷ Eris um imyiehva a ilpu atimi atahaijeg yin intas ineig eris upyi aged, um ika, “Ek auatialidi ainyak va nohocred unyak va neom unyum.”

¹⁸ ¶ Eris tas a nupu Jutaia, um ika ehelen, Na auri aiek par ago nitai iji eigki? nev itai asjaaicnaig unyum ineig napu ehvaig imi cama aiek?

¹⁹ Is tas a Iesu, um ika ehele ra, Akumu auahas neom ahlap ineigki aijaua, ja ekpu lep ago ainyak an nadiat inyi eseij.

²⁰ Eris um ika a nupu Jutaia, Eris acta neom ahlap ineigki irai mesese is forte im siks, inyi ehka vai euc nagovaig an nadiat inyi eseij ache.

²¹ Nohun ineigki is tas vaig aien mika is eom ahlap.

²² Is wat nusjai aien vai inmas o un, eris imyiehva a ilpu atimi atahaijeg yin intas ineigki is asaig ehele ra aien; eris imyiisjis ninivaijec intas ineig ara eris upyi aged, im intas ineig is asaig a Iesu.

²³ ¶ Is wat amen Jerusalem aien u napaska, an nadiat asjapicnaig, eris wat almoi niji auritai elika o un natimi is ahinag, eris imyiisjis ninivaijec yin ara.

²⁴ Ja is eti asgeig an nedo ura a Iesu, is idim ato atimi asega aien:

²⁵ is eti ika aien yi pu asuptecna atimi tah ehelen; is tup ispun ato inliimopoi atimi aien.