Joanes 19 - Intas Etipup

Nuarin-tas alupas 19.

¹ VA nitai ineigki is leh Iesu a Pailet, um aredei yin.

² Eris ahod incat adgaig a ilpu eucsupo irai itai upunupun, um adgaig imi yin, um lep aso yin ara an napelumai cop,

³ um ika, Kaiheuc vai euc, ak Natimarid u nupu Jutaia! eris ahpoi yin irai ikmara ara.

⁴ Is lep alau ijo a Pailet, um ika ehele ra, Ek mun imyiapam yin ehelemia ainyak, mika aki ato aijaua, nikavaig, ek eti ecetai tah nedo has o un ainyak.

⁵ Is alau ijo a Iesu, is amen iran incat adgaig irai itai upunupun, im napelumai cop. Is um ika ehele ra a Pailet, Almoi natimi ineigki aijaua!

⁶ Eris wat alum yin a ilpu atimi ahlap esjilid, im ilpu aheca, eris ahlaig ijinies ara, um ika, Atgei yin an nauincai atgeig, atgei yin an nauincai atgeig. Is um ika ehele ra a Pailet, Leh yin aijaua, um atgei yin an nauincai atgeig: ja ek eti ecetai tah nedo has o un ainyak.

⁷ Eris um ika ehelen a nupu Jutaia, Et eteuc intas alep unyima, et upene mika yi mas aien vai intas alep unyima va nedo o un, nikavaig, is ika aien, Ek Hal o Atua ainyak.

⁸ ¶ Is wat atahaijeg intas ineigki a Pailet, is esjilid nimtitaig o un aien;

⁹ is lep apan aien anliin nimnim tas alep iran, um ika ehele Iesu, As ahes eda aiek? Ja is eti tas ehelen a Iesu.

¹⁰ Is um ika ehelen a Pailet, Na eti tas ehelek aiek? na ato aiek, ka oʼo, nikavaig, ek emda ainyak natgei euc vaig an nauincai atgeig, um lep emda nahiyi euc vaig?

¹¹ Is um ika a Iesu, El eh eti alupai euc nemda an nohatag, el et eti emda aiek par ago tah nitai vai nyak: va nitai ineig, et esjilid nedo has o un, et mun atceijai nyak ehelum aien.

¹² Is apitac a Pailet um lep merit nahiyi yin vaig; ja eris ahlaig ijinies a nupu Jutaia, um ika, El et ahiyi natimi ineigki aiek, el et eti atimi atau imi Sisar aiek: natimi ineig et ika aien et atimarid aien, et asan tas has vai Sisar aien.

¹³ Is wat atahaijeg intas ineigki a Pailet, is imyialau ijo Iesu aien, um ateucse an nitai ateuc eris tas alep iran, an nuarin iyehki nidan Nehledhat, jai nidan Hibru, Cabada.

¹⁴ Is adiat iyehkiyehki eris imyecrei itai iran va napaska, is adiatadiat: is um ika ehele nupu Jutaia aien, Almoi Natimarid unyimia aijaua!

¹⁵ Ja eris ahlaig ijinies ara, um ika, Imyiapan yin, imyiapan yin, um atgei yin an nauincai atgeig. Is um ika ehele ra a Pailet, Ekpu atgei Natimarid unyimia ainyak an nauincai atgeig, ka oʼo? Eris ika a ilpu atimi ahlap esjilid, Et atimarid unyima ache a Sisar.

¹⁶ Is atceijai yin ehele ra aien, mika eri atgei yin. Eris leh Iesu ara, um imyiapan yin.

¹⁷ Is apos nauincai atgeig o un aien, um apan an nuarin is ethi, nidan nuarin o nipjinipek o atimi, nidan Hibru, Colcoda:

¹⁸ eris atgei yin eahki ara an nauincai atgeig, im lep natimi is ero is eche, is ethi an nahaijin, im lep is ethi an nahaijin, im Iesu juju.

¹⁹ Is aged intas vai yin a Pailet, um ati an nauincai atgeig. Is aged intas ineigki aien, um ika, IESU NUP AN NASARED, NATIMARID U NUPU JUTAIA.

²⁰ Eris esvi intas ineigki a nupu Jutaia is ahinag: is ubutpotet pan u nuarin-pece itaup inuarin iyehki, eris atgei Iesu iran an nauincai atgeig: eris aged intas ineigki irai tas. Hibru, im Crisi, im Roma.

²¹ Eris um ika ehele Pailet a ilpu atimi ahlap esjilid u nupu Jutaia, Jim aged aiek, um ika, Natimarid u nupu Jutaia; jam aged, um ika, Is ika aien, Ek atimarid ainyak u nupu Jutaia.

²² Is um ika a Pailet, Intas ineig ek aged ainyak, ek mun idim aged ainyak.

²³ ¶ Eris atgei Iesu a ilpu eucsupo an nauincai atgeig, ja par leucse apelumai itac o un, um ahaig is for inuarin; eris akaro sjipe a ilpu eucsupo asega; im lep napelumai uhup o un: is ti nugnyan nijei iran, eris tup ahod asega.

²⁴ Eris tas jipe ara, um ika, Intumu jim ahpati akaija, ti edaig jipe nitai asjaaicnaig iraija akaija, par ato natimi ineig inyi ati: va uhpu ehneijid intas eris aged, um ika, “Eris ahai apelumai itac unyak ira ra ara, um edaig jipe itai asjaaicnaig va napelumai uhup unyak.” Eris ago nitai iji eigki a ilpu eucsupo.

²⁵ ¶ Is aiji a risi Iesu ubutpotet u nauincai atgeig o un, im lep etoai risin, Mere ehgai Kleofas, im Mere nupu Maktala.

²⁶ Is wat alum risin a Iesu im natimi atahaijeg yin iyehki, is aiyu inliinmopon aien vai yin, is um ika ehele risin aien, Ak intakata ineigki, almoi inhal unyum aiek!

²⁷ Is lep ika aien ehele natimi atahaijeg yin iyehki, Almoi risum aiek! Is leh yin a natimi atahaijeg yin iyehki an naopan iyehki, um imyiapan yin an nimnim, o un.

²⁸ Is wat ti pan itac nitai iji eigki is ato a Iesu, nikavaig, eris ago ehni niji itai asega; va uhpu ehneijid intas eris upyi aged, is ika aien, Ek ahvig wai ainyak.

²⁹ Eris ati nipjinitai is amen iran vinecar um ohua: eris leh nisa ara, um ahtaijuli a vinecar, um ahcai an nauihissop, um ati an nipjineucsen.

³⁰ Is wat leh vinecar iyehki a Iesu, is um ika aien, Eh mun ago ehni: is atpuse aien, um edekjai nesgan.

³¹ Is adiat imyecrei itai iran iyehki; va nitai ineig eris ugni Pailet a nupu Jutaia mika uhpu asvi neduei ehtaij um iknipagki ehtaij, va yi jim amen nohui ehtaij irai auicai atgeig an nadiat atumop; is adiat atumop esjilid iyehki.

³² Eris apan a ilpu eucsupo, um asvi eduei natimi erahki eris atgei rau an nauincai atgeig ehelen:

³³ eris wat apan ara ehele Iesu, um almoi mika is idim mas aien, eris eti asvi neduon ara:

³⁴ ja is ahcai nahaijin a neucsupo is ethi an mopul, is auroauro um ared inja iran, im lep inwai.

³⁵ Aien is almoi nitai iji eigki aien, is asuptecnaig aien; et idim inivaijec intas asuptecnaig o un: et ato aien mika et inivaijec intas o un, mika aki imyiisjis ninivaijec aijaua.

³⁶ Eris ago nitai iji eigki va uhpu ehneijid intas eris upyi aged, um ika, “Uhpu idim eti asvi tah neduon.”

³⁷ Eris lep aged intas is eche, nikavaig, “Erupu aespan natimi ineig eris ahcai yin ara.”

³⁸ ¶ Is wat ti pan itac nitai iji eigki is ugni Pailet a Josef nupu Aramadia, mika yi leh nohui Iesu; is atimi atahaijeg Iesu aien, jam eti asaig va nimtitai nupu Jutaia o un: is ika a Pailet yi leh yin aien. Is apan aien, um leh nohui Iesu:

³⁹ is lep apan a Nikotimus, (aien aigki is upyi hup aien um apan ehele Iesu an nepeig,) um apos nahrincai auanipin upene pilaig a nidi mura, is idivaig is wun huntret paunt:

⁴⁰ erus leh nohui Iesu arau, um lep aspi yin an nitai auanipin upene, um aso an napelumai yilyil, is idivaig nedo o nupu Jutaia an natelmoi atimi vaig.

⁴¹ Is eteuc nekaro an nuarin iyehki eris atgei yin iran an nauincai atgeig; is lep eteuc inmun nij mat anliin nekaro, eris pam eti ati tah nohu atimi iran.

⁴² Erus ati Iesu iran arau, va nitai ineig, nikavaig, is adiat imyecrei itai iran iyehki o nupu Jutaia; is ubutpotet o unmun nij iyehki.