Joanes 18 - Intas Etipup

Nuarin-tas alupas 18.

¹ IS asan tas iji eigki a Iesu, ja par apan aien im ilpu atimi atahaijeg yin, um algaunyi inwai Kitron, is eteuc nekaro eahki, is apan iran aien, im lep ilpu atimi atahaijeg yin.

² Is ato inuarin iyehki a Jutas, natimi aniv yin: is ehcahinag apan eahki a Iesu im ilpu atimi atahaijeg yin.

³ Is leh ilpu eucsupo a Jutas, im ilpu aheca ehele ilpu atimi ahlap esjilid im ilpu Farisi, um apan eahki eris apos nij va atimi ara im lamp, um atga an cop.

⁴ Is ato a Iesu niji itai asega etpu yetpam iran, ja is apan aien, um ika ehele ra, Eka ahilek di aijaua?

⁵ Eris um ika ehelen ara, Iesu nup an Nasared. Is ika ehele ra a Iesu, Ainyak um aigki. Is lep aiji ehele ra a Jutas, natimi aniv yin.

⁶ Is wat ika ehele ra aien, Ainyak um aigki, eris atga an nidjira ara, um eropropse an nobohtan.

⁷ Is lep ahodai ra aien, um ika, Eka ahilek di aijaua? Eris ika ara, Iesu nup an Nasared.

⁸ Is um ika a Iesu, Ek mun ika ehelemia ainyak, Ainyak um aigki: el eka ahilek nyak aijaua, ude ra sji eigki aijaua:

⁹ va uhpu ehneijid intas iyehki is upyi asaig aien, um ika, Et eti melga tah et ethi irai ra sji eigki, as alupai nyak ra aiek.

¹⁰ Is amen nauitoga ehele Saimona Pitrus, is leh aien um auud naheca o natimi esjilid an nahlap, um auudyialis intikgan inmatan. Nidan naheca iyehki Malkus.

¹¹ Is um ika a Iesu ehele Pitrus, Lep atohoaigse nauitoga unyum aiek an cedpan: ekpu umwig ainyak an nipjinitai ineig is alupai nyak a Etmak.

¹² Eris arop irai Iesu a ilpu eucsupo im natimi alupas ura im ilpu aheca o nupu Jutaia, um arore yin,

¹³ um upyi hup um imyiapan yin ehele Annas; is etmai ehgai Keafas aien, natimi esjilid an nahlap an mesese iyehki.

¹⁴ Is atimi iyehki a Keafas is tas aien ehele nupu Jutaia, um ika, Et upene mika yi mas natimi et ethi vai nup uran pece.

¹⁵ ¶ Is apitac Iesu a Saimona Pitrus, im lep natimi atahaijeg yin is ethi is eche: is ato natimi atahaijeg yin iyehki a natimi esjilid an nahlap, is ahced Iesu aien, um apan anliin nimnim o natimi esjilid an nahlap.

¹⁶ Ja is aiji ijo a Pitrus an neucse neom. Is lep alau ijo a natimi atahaijeg yin is eche iyehki, is ato yin a natimi esjilid an nahlap, um tas ehele natahaig iyehki is aminjinaig neucse neom aien, um imyiapan Pitrus an nimnim.

¹⁷ Is um ika ehele Pitrus a natahaig is aminjinaig neucse neom aien. Na atimi atahaijeg nat eigki aiek, ka oʼo? Is um ika aien. Oʼo.

¹⁸ Eris aiji eahki a ilpu aheca im ilpu eucsupo, eris adnan cop ara irai humla: is idim eyueyu: eris atijcop ara: is lep amen ehele ra a Pitrus, um atijcop.

¹⁹ ¶ Is ahodai Iesu a natimi esjilid an nahlap vai ilpu atimi atahaijeg yin, im lep nesege o un.

²⁰ Is um ika ehelen a Iesu, Kis tas ainyak an nuhup o atimi asega; kis idim esege ainyak irai eom alaigaheni im lep anliin neom ahlap, era apan iran a nupu Jutaia irai iji adiat; kis eti adenan tas unyak ainyak:

²¹ na auri aiek par ahodai nyak? ahodai ra eris atahaijeg nyak ara, vai intas unyak ehele ra: era idim ato intas unyak ara.

²² Is wat asan tas iji eigki a Iesu, is ahpoi yin an nikman tah irai ilpu aheca iji eig eris aiji ubutpotet, um ika, Na auri aiek par asan tas naico ehele natimi esjilid an nahlap?

²³ Is um ika ehelen a Iesu, El ek asan tas has ainyak, asuptecnaig intas has unyak aiek: ja el ek asan tas upene ainyak, na auri aiek par ahpoi nyak?

²⁴ Is ika a Annas eri arore yin um imyiapan yin ehele Keafas natimi esjilid an nahlap.

²⁵ Is aiji a Saimona Pitrus um atijcop. Eris ika ehelen ara, Na atimi atahaijeg yin aiek, ka oʼo? Is ateri aien, um ika, Oʼo.

²⁶ Is ika naheca is ethi o natimi esjilid an nahlap, (is atimi ehpan irai natimi iyehki aien is auudyialis intikgan a Pitrus,) Ek mun ecet euc ainyak ehelen anliin nekaro.

²⁷ Is lep ateri a Pitrus: ja is auroauro um ahlaig injaa.

²⁸ ¶ Eris ahes ehele Keafas ara um imyiapan Iesu anliin nimnim tas alep iran: is ehuhialeg; eris eti apan ara anliin nimnim iyehki, va eri jim auahas nitaup ura, um eti ecaig napaska.

²⁹ Is alau ijo a Pailet um apan ehele ra, um ika, Intas asuptecnaig unyimia vai natimi ineigki nevitai?

³⁰ Eris tas ara, um ika ehelen, El is eti ago nedo has aien, el ecra eti ati yin ehelum aijama.

³¹ Is um ika ehele ra a Pailet, Leh yin aijaua, um ara nedo has o un et idivaig intas alep unyimia. Eris um ika ehelen a nupu Jutaia, Et itaup vai cama natgei atimi vaig:

³² va uhpu ehneijid intas iyehki, is upyi asaig a Iesu, par asuptecnaig nedo vai inmas o un.

³³ Is lep apan a Pailet anliin nimnim tas alep iran, um ahlaig vai Iesu, um ika ehelen, Na atimarid u nupu Jutaia aiek, ka oʼo?

³⁴ Is um ika ehelen a Iesu, Na ispum asaig nitai ineig aiek, ka is asaig ehelum tah natimi vai nyak?

³⁵ Is um ika a Pailet, Ek eti upu Jutaia ainyak: era mun ati euc ehelek a nup uran pece unyum im ilpu atimi ahlap esjilid: as ago inhe aiek?

³⁶ Is um ika a Iesu, Et eti elcau an nobohtan nelcau unyak: el et elcau an nobohtan nelcau unyak, el era ago nedoa a ilpu aheca unyak, mika eri jim ati nyak ehele nupu Jutaia: ja et eti ahes igcaki nelcau unyak.

³⁷ Is um ika ehelen a Pailet, Na idim atimarid aiek, ka oʼo? Is um ika a Iesu, Na mun asaig aiek mika ek atimarid ainyak: eris apos nyak va nitai ineigki, kis lep ham ainyak an nobohtan va nitai ineigki, mika ki asuptecnaig nitai inivaijec ainyak: ara asega era apol an nitai inivaijec ara, era imyiaiji intas unyak ara.

³⁸ Is um ika ehelen a Pailet, Nitai inivaijec neigki inhe? Is asan tas ineigki aien ja par alau ijo, um apan ehele nupu Jutaia, um ika ehele ra, Ek eti ecetai tah nedo has o un ainyak:

³⁹ ja ekpu ahiyi natimi et ethi imi caua ainyak, et idivaig nedo unyimia u napaska: eka merit aijaua mika ki ahiyi imi caua ainyak Natimarid u nupu Jutaia, ka oʼo?

⁴⁰ Eris lep ahlaig ara asega, um ika, Jim ahiyi natimi ineigki aiek, Barabas ache. Is atimi ahrincai a Barabas.