Joanes 14 - Intas Etipup

Nuarin-tas alupas 14.

¹ ETMU jim ohocred inliinmopomia aijaua: akumu asgeig irai Atua aijaua, um lep asgeig irak.

² Et ahinag inuari-eom an neom o Etmak: el et eti eteuc, el ek mun asaig ehelemia ainyak: inki apan ainyak um yecrei inuarin imi caua:

³ ek wit apan ainyak um yecrei inuarin imi caua, ja par lep ham, um leh caua imi nyak; mika aki amen aijaua an nuarin ineig ekpu amen iran ainyak:

⁴ eka ato aijaua inuarin ineig ekpu apan iran ainyak, um lep ato nefalaig.

⁵ Is um ika ehelen a Tomas, Ak Natimarid, ecra eti ato aijama inuarin ineig an apan iran aiek; um lep elika vai cama natovaig nefalaig.

⁶ Is um ika ehelen a Iesu, Ek efalaig ainyak, um itai inivaijec, um itai umoh iran: et eti tup han tah ehele Etmak, jai vai nyak ache:

⁷ el eka mun ato nyak aijaua, el eka mun lep ato Etmak aijaua: akupu idim ato yin aijaua, um alum yin.

⁸ Is um ika ehelen a Filipus, Ak Natimarid, ehvai Etmam aiek ehelema, et upene vai cama.

⁹ Is um ika ehelen a Iesu, Ak Filipus, kis amen ehelemia ainyak itu acen, ja na idim eti ato nyak aiek, ka oʼo? aien et mun alum nyak aien, et alum Etmak aien; na auri aiek par ika, Ehvai Etmam aiek ehelema?

¹⁰ na imyiisjis ninivaijec aiek, nikavaig, ek amen ainyak ehele Etmak, et lep amen a Etmak ehelek, ka oʼo? ek eti tup ispuk tas ainyak irai tas iji eigki ek asaig ehelemia ainyak: ja et ago nauritai iji eigki a Etmak et amen ehelek aien.

¹¹ Akumu eteuc an tas ineigki aijaua, nikavaig, ek amen ehele Etmak ainyak, um lep amen ehelek a Etmak: ka akumu eteuc an tas unyak aijaua va niji auritai unyak.

¹² Et idim inivaijec ineig ek asaig ehelemia ainyak mika, Aien et asgeig irak aien, etpu ago nauritai iji eigki aien ek ago ainyak; etpu lep ago niji auritai aien inyi esjilid irai itai iji eigki; va napan unyak ehele Etmak.

¹³ Nitai iji eigki eka ugni aijaua an nidak, ekpu ago ainyak, va uhpu imyiahpas Etmak vai Inhal o un.

¹⁴ Aku wit ugni tah nitai aijaua an nidak, ekpu ago ainyak,

¹⁵ ¶ El et aiyu inliinmopomia aijaua vai nyak, akumu imyiaiji niji tas alep unyak aijaua.

¹⁶ Ekpu ugni Etmak ainyak, etpu alupai caua aien Natimi atau iramia inyi eche, va etpu amen ehelemia aien irai iji mesese;

¹⁷ et Esgan inivaijec aien; et elika va atimi an nobohtan inleh yin vaig, era eti ecet yin ara, um eti ato yin: ja eka ato yin aijaua; et eteuc ehelemia aien, etpu amen anliinmopomia aien.

¹⁸ Ek wit ude caua ainyak, aki eti umnyij aijaua: ekpu lep ham ehelemia ainyak.

¹⁹ Et wit ti pan itac nadiat inyi ti elpat, eri ti lep alum nyak natimi an nobohtan; ja eka alum nyak aijaua: ek umoh ainyak, va nitai ineigki, akupu lep umumoh aijaua.

²⁰ Akupu ato aijaua an naopan iyehki, nikavaig, ek amen ehele Etmak ainyak, um lep amen ehelek aijaua, um lep amen ehelemia ainyak.

²¹ Aien et leh niji tas alep unvak aien, um apos upene, et aiyu inliinmopon aien vai nyak: aien et aiyu inliinmopon aien vai nyak, et lep aiyu inliinmopoi Etmak vai yin, etpu lep aiyu inliinmopok ainyak vai yin, ekpu lep ehvai nyak ainyak ehelen.

²² Is um ika ehelen a Jutas, (is eti upu Karyot iyehki,) Ak Natimarid, napu ehvai euc ehelema aiek um uauo, jam eti ehvai euc aiek ehele atimi an nohohtan?

²³ Is tas a Iesu, um ika ehelen, El et aiyu inliinmopon tah natimi vai nyak, etpu apos intas unyak aien: etpu aiyu inliinmopoi Etmak vai yin, ecrupu apan ehelen aijumrau, um amen ehelen.

²⁴ Aien et eti aiyu inliinmopon aien vai nyak, et eti apos niji tas unyak aien: is eti ahes ehelek intas ineigki eka atahaijeg aijaua, ja is ahes ehele Etmak is abrai nyak aien.

²⁵ Ek mun asaig nitai iji eigki ehelemia ainyak, an namen unyak ehelemia.

²⁶ Jai Natimi atau iramia, et Esgan Upene aien, etpu abrai yin a Etmak an nidak, etpu esege imi caua aien niji itai asega, um ahugni lelmia an niji itai asega iji eigki kis asaig ehelemia ainyak.

²⁷ Ek ati neigpa unyak ainyak ehelemia, ek alupai caua neigpa unyak ainyak: ekpu ahtai itai imi caua ainyak, ja inyi ti idivaig ineig er ahtai an nobohtan. Etmu jim ohocred inliinmopomia aijaua, um jim imtitaig.

²⁸ Akis atahaijeg aijaua intas unyak ehelemia, nikavaig, inki apan ainyak, ja par lep ham ehelemia. El et aiyu inliinmopomia aijaua vai nyak, el eka imyiacitak aijaua vai intas unyak, nikavaig, Ekpu apan ehele Etmak ainyak: et idim esjilid irak a Etmak.

²⁹ Ek mun upyi hup ainyak um asuptecnaig ehelemia, mika, et wit yetpam nitai ineigki, aki imyiisjis ninivaijec aijaua.

³⁰ Inki ti lep tas alupas ehelemia ainyak: et ham natimarid an nobohtan ineigki, ja et eti eteuc tah nitai ehelek imi yin.

³¹ Ja erupu ato atimi an nobohtan mika et aiyu inliinmopok ainyak vai Etmak; is idim asaig ehelek a Etmak, et um ucco ek ago ainyak. Ti atidai akaija um apan eagko.