Joanes 13 - Intas Etipup

Nuarin-tas alupas 13.

¹ AN naopan iyehki is mun ubutpotet u nasjapicnaig va napaska, ja is ato a Iesu, nikavaig, is yetpam naopan ineig inyi ude nobohtan ineigki aien, um apan ehele Etman, is aiyu inliinmopon aien vai ilpu atimi o un an nobohtan, is lep aiyu inliinmopon aien vai ra um yetpan u inmas o un.

² Eris wat hag ara, (is auahas inliinmopoi Jutas nupu Karyot, inhal o Saimona, a Tiapolo, um ika yi aniv yin;)

³ is ato a Iesu, nikavaig, is ati niji itai asega an nikman a Etman, is idim ahes ehele Atua aien, ja par npan ehele Atua;

⁴ is atidai aien u inhag, um iknipagki apelumai iran; um leh nuarin napelumai, um ahid:

⁵ ja is par atladwi inwai aien an nipjinitai, um yiri eduei ilpu atimi atahaijeg yin, um yiri mese an napelumai ineig is ahid aien.

⁶ Is apan aien ehele Saimona Pitrus: ja is ika ehelen a Pitrus, Ak Natimarid, an yiri neduok aiek, ka oʼo?

⁷ Is tas a Iesu, um ika ehelen, Na eti ato aiek an naopan ineig nitai ineig ek ago ainyak; ja napu ato aiek an tak aopan.

⁸ Is um ika ehelen a Pitrus, Napu idim eti yiri neduok aiek. Is um ika ehelen a Iesu, El ek eti yiri euc ainyak, an idim eti atimi unyak aiek.

⁹ Is um ika ehelen a Saimona Pitrus, Ak Natimarid, namu jim yiri neduok ache aiek, jam lep nikmak, im nipek unyak.

¹⁰ Is um ika ehelen a Iesu, El et ereuc tah, et upene inyirivaig neduon ache, et adicinadicin asega aien: eka adicinadicin aijaua, jam eti adicinadicin aijaua asega.

¹¹ Is idim ato aien natimi ineig etpu aniv yin; va nitai ineigki is ika aien, Eka eti adicinadicin aijaua asega.

¹² Is yiri eduora aien, ja par leucse apelumai o un, um lep ateuc, um ika ehele ra, Eka ato nedo ineig aijaua ek mun ago iramia ainyak, ka oʼo?

¹³ Eka anvi nidak aijaua par ika, Natimi esege, im lep Natimarid: et upene intas unyimia; ek idim ucco ainyak:

¹⁴ ek Atimarid unyimia ainyak, um Atimi esege imi caua, ja ek mun yiri eduomia ainyak; et lep upene vai caua inyiri jipe vaig eduomia:

¹⁵ ek mun upyi hup ainyak um ago nedo ineigki, mika aki ago nedo ineigki aijaua, ek mun ago iramia ainyak.

¹⁶ Et idim inivaijec ineig ek asaig ehelemia ainyak mika, Et eti esjilid tah naheca irai natimi alupas un; et eti lep esjilid aien eris abrai yin irai natimi ineig is abrai yin aien.

¹⁷ El eka ato nitai iji eigki aijaua, eka mun ahesmoij aijaua el eka ago.

¹⁸ Ek eti tas ainyak vai caua asega: ek ato ainyak natimi iji eigki kis ehtai ra ainyak: ja va uhpu ehneijid intas eris aged, um ika, “Aien et hag ehelek aien, et mun atijai nijinalak an neduon aien vai nyak.”

¹⁹ Ek upyi hup ainyak um asuptecnaig ehelemia, mika, et wit yetpam nitai ineigki, aki imyiisjis ninivaijec aijaua mika ek atimi iyehki ainyak.

²⁰ Et idim inivaijec ineig ek asaig ehelemia ainyak mika, Aien et leh ra aien ek abrai ra ainyak, et leh nyak aien; aien et leh nyak aien, et leh yin aien is abrai nyak aien.

²¹ ¶ Is asan tas iji ehki a Iesu, ja is ohocred inliinmopon aien, um asuptecnaig, um ika, Et idim inivaijec ineig ek asaig ehelemia ainyak mika, Etpu aniv nyak tah et ethi iramia.

²² Eris almaijidjid jipe ra a ilpu atimi atahaijeg yin, um aktaktai, jam eti ato natimi ineig is tas vai yin aien.

²³ Is asgeig an riti Iesu natimi atahaijeg yin is ethi, is aiyu inliinmopoi Iesu vai yin.

²⁴ Is adi pan yin a Saimona Pitrus, mika yi ahodai yin aien va natimi ineig is tas vai yin aien.

²⁵ Aien is asgeig aien an riti. Iesu, is ika ehelen aien, Ak Natimarid, di neigki?

²⁶ Is asuptecnaig a Iesu, um ika, Aien aigki, ek wit ati inuarin nitai caig ineig an nipjinitai ainyak, ekpu alaacan ainyak. Is atise inuarin nitai caig aien, um alayi Jutas nupu Karyot, inhal o Saimona.

²⁷ Is leh nuarin nitai caig iyehki aien, ja is ahei yin a Satana. Is um ika ehelen a Iesu, Auroauro aiek um ago nitai ineig, nai ika aiek napu ago.

²⁸ Is eti ato tah natimi ira ra u inhag, mika is asan tas ineigki aien ehelen vanhe.

²⁹ Is amen ehele Jutas incedpai mune, va nitai ineigki, eris aktaktai nahaiji ra, mika is ika ehelen a Iesu, Auarimtai itai iji eigki aiek, inta merit vaig akaija va nasjapicnaig; ka yi alupai ilpu ihki atimi itai.

³⁰ ¶ Is wat leh nuarin nitai caig aien, is um auroauro aien um alau ijo; is um epeig.

³¹ Is wat alau ijo aien, is um ika a Iesu, Eh mun ehvaig natimi alupas o Inhal o natimi an naopan ineig, eh mun lep ehvaig natimi alupas o Atua vai yin:

³² el eh ehvaig natimi alupas o Atua vai yin, etpu lep ehvaig natimi alupas o un a Atua, etpu auroauro aien um ehvaig natimi alupas o un.

³³ Ak ilpu hal unyak, inki ti elvamen ehelemia ainyak: akupuahilek nyak aijaua; kis idim upyi asaig ehele nupu Jutaia ainyak, um ika, Et ehka vai caua napanvaig an nuarin ineig ekpu apan iran ainyak; et idim ucco intas unyak ehelemia an naopan ineig.

³⁴ Ek alupai caua intas alep mat ineigki ainyak, mika yi aiyu jipe inliinmopomia aijaua vai caua; et idivaig naiyu u inliinmopok vai caua, etmu ucco naiyu jipe u inliinmopomia aijaua vai caua:

³⁵ va erupu ato natimi asega, nikavaig, eka ilpu atimi atahaijeg nyak aijaua, an naiyu jipe vaig inliinmopomia aijaua vai caua.

³⁶ ¶ Is um ika ehelen a Saimona Pitrus, Ak Natimarid, napu apan aiek eda? Is um ika ehelen a Iesu, Et ehka vai euc napitac nyak vaig an naopan ineig, um apan an nuarin ineig ekpu apan iran ainyak; napu apitac nyak aiek an tak aopan.

³⁷ Is um ika ehelen a Pitrus, Ak Natimarid, et elika vai nyak napitac euc vaig an naopan ineig vanhe? ekpu mas ainyak vai euc.

³⁸ Is um ika ehelen a Iesu, Nai ika aiek napu mas vai nyak, ka oʼo? et idim inivaijec ineig ek asaig ehelum ainyak mika, Napu ehceseij ateri nyak aiek, ja etpu ahlaig injaa.