Jeremaia 9 - Intas Etipup

NUARIN TAS ALUPAS 9.

1 Et imitaig nup u Juta a Jeremaia va nedo has acheiachei ura, 9 im lep va neruvaig ira ra. 12 Nohuun nohocred esjilid ura nigki, nikavaig, nedo imipalea ura. 11 Et ahugni ra aien mika eri ehtigtaig ara va nauahas ra vaig, 23 im lep mika eri jim asgeig ira ra, jam asgeig ira Atua. 25 Et asan tas emda aien vai nup u Juta im lep vai nup urai iji pece.

¹ EK merit alupas ainyak mika yi idivaig inwai yah nidjinik, um idivaig nimtanwai nidiimtak, mika ki taig ainyak irai iji adiat im niji epig, vai ilpu atimi eris atgei u inhalav atahig u nup urau pece unyak!

² Ek merit alupas ainyak mika yi eteuc irak niim uricai an namasacen par atumop iran; mika ki udei ilpu atimi unyak ainyak, um apan au taka uarin! vaig inig nikavaig, era ilpu atimi ago ingeijid ara asega; um ilpu atimi efaifa.

³ Et imrig intas an nipjineucsera ara, era atcijaig ara et idivaig nefana; era eti emda ara vai intas inveijec an nobohtan; et ika a Ihova, Et auatai elvalupas nedo has ura, era eti ato nyak ara.

⁴ Akumu aminjinaig caua va nedo u ilpu apa unyimia aijaua, athi um athi ehni, um jim asgeig irai tah etwamia: vaig inig nikavaig, erupu ago nedo efaifa ache a ilpu etwamia asega, erupu lep asaig intas ahcil a ilpu apa unyimia asega um eti atumop.

⁵ Erupu ago nedo efaifa vai ilpu apa ura ara asega, athi um athi ehni, um eti asan tas inveijec: et umjijeuc nipjineucsera ara par asan tas ahcil, nauritai ura nigki par ago nedo has.

⁶ Na amen aiek, ehele ilpu atimi efaifa; et ika a Ihova, Era esjum ara par ato nyak va nedo efaifa ura.

⁷ Et ika a Ihova esjilid acen, Va nitai inigki ekpu ahilek nedo ura ainyak um asjaaicnaig ira ra; et ehka vai nyak par ago nedo et eche vai inhalav atahig u nup uran pece unyak.

⁸ Et efana eh mas vaig nipjineucsera; et asaig intas efaifa: et asaig intas igpa ehele napa o un tah an nipjineucsen, ja et imiiris yiu an liinmopon aien.

⁹ Et ika a Ihova, Ekpu idim aru ira ra ainyak va nitai iji igki; ekpu idim aru ainyak irai nup uran pece et uce nedo ura.

¹⁰ Ekpu taig ainyak um aunyauwaig vai niji edoon, ekpu lep imitaig niji uarin omotmot an namasacen ainyak, vaig inig nikavaig, et imlai, et lep eti ahced inpece tah; er eti ahgei nilmu u a kurimatau; et mun ahapan niji man an nohatag im niji itai eklim edo irai pece; et idim ti.

¹¹ Ekpu ika ainyak eri alcapdicraig inmaliyum Jerusalem mika yi uarin amen iran niji imyeuv; ekpu ika ainyak yi ahyuahyu niji maliyum au pece Juta, inyi eti amen iran tah natimi.

¹² Et atimi arapakau a di, mika yi ato nitai inigki? im lep aien aigki di et mun tas ehelen a Ihova an nipjineucsen, mika yi asuptecnaig nitai inig aien, er auahas inpece vaig, et lep umaruma, um idivaig namasacen, et lep eti ahced inpece tah?

¹³ Et ika a Ihova, Vaig inig nikavaig, era mun atcijaig intas alep unyak inigki ara kis ati an nuhup ura ainyak, eris eti imiaiji intas unyak ara, um eti aminjinaig;

¹⁴ ja era mun apitac inliinmopora imipalea ara, um alaigaheni vai ilpu atmas iji ig eris esege imi ra vaig a ilpu atmil ura:

¹⁵ et ika a Ihova esjilid acen, Atua u nup Isreel; Va nitai inigki ekpu alayi nup igcaki ainyak nitai caig acen incara, im lep alumara inwai acen mika eri umnyi ara.

¹⁶ Im lep inig, ekpu imiterimterim ra ainyak ehele nup urai pece iji ig eris eti ato ra ara, im lep ilpu retpora: ekpu lep ika ainyak eri ahau ra an nedoa, um yetpan an nopan iyehki ekpu auahas ehni ra ainyak.

¹⁷ Et ika a Ihova esjilid acen, Akumu aktaktai aijaua, um ahlaig vai ilpu takata taig tas, mika eri adpam ara; um lep imiacaij ilpu takata arapakau, mika eri adpam ara:

¹⁸ erumu auroauro ara, um taig tas vai caija, mika yi yah nidinimtaija, im lep mika yi idivaig inwai nesganimtaija akaija.

¹⁹ Era mun ahgei intaig afakatotau ara Saion, um ika, Eh mun auahas alupas caija! inta ehcamai alupas akaija, inta mun udei inpece akaija, eh mun alcapdicraig niji eom uja,

²⁰ Ja akumu atahaijeg intas o Ihova aijaua, ak ilpu takata, akumu leh intas an nipjineucsen aijaua an tikgamia, um esege imi ilpu halav atahig unyimia mika eri taig tas ara, im lep ilpu apa unyimia, athi um athi ehni, mika eri ehtigtaig ara.

²¹ Et mun aridjipam a Inmas irai mai iyum uja, et mun apam irai imnim atimi uja aien, mika yi atgei ilpu halav irai efalaig, im lep ilpu takuras irai iji uarin lah.

²² Et ika a Ihova, Namu tas aiek, um ika, Etpu etjo se nohui ilpu atimi emesmas et idivaig nohok anliin pece, um idivaig nohud hwiit et ati pan itac a natimi ucsei hwiit, etpu eti lep asjapicnaig ra tah.

²³ Et ika a Ihova, Etmu jim ispun tas va narapakau o un a natimi arapakau, um jim ispun tas va nemda o un a natimi emda, um jim ispun tas va niji itai o un a natimi ikni itai:

²⁴ ja aien et ispun tas aien etmu ispun tas aien va nitai inigki, nikavaig, et aktaktai aien um ato nyak, mika ek Ihova ainyak, ek ago nedo aiheuc an nobohtan ainyak, im nedo atoh, im nedo upene: et lep ika a Ihova, Ek imiacitak nitai iji igki ainyak.

²⁵ Et ika a Ihova, Akumu ato aijaua mika, etpu yetpam nopan iyehki eku wit ehraru irai ilpu atimi aperitome asega ainyak im ilpu ai imi eti aperitome;

²⁶ nikavaig, nup Ijipt, im nup u Juta, im nup Itom, im nup Amon, im nup u Moab, im lep ra era ucsei numri nidjinira ara, era amen an namasacen ara: eris idim eti aperitome irai nup urai pece iji igki asega, eris lep eti aperitome irai nup Isreel asega an liinmopora.