Jeremaia 8 - Intas Etipup

NUARIN TAS ALUPAS 8.

1 Namen has u nup u Juta iji ig eris emesmas ara, im lep iji ig era umumoh ara. 4 Et acaiji ra a Atua va nedo ipjin ura, era ahnag ara um eti ehcamai vaig. 13 Et asuptecnaig aien neruvaig ira ra im nohocred ura. 18 Et imitaig namen has esjilid ura a Jeremaia.

¹ ET ika a Ihova, An nopan iyehki erupu ahyausei niji eduei ilpu atimarid an pece Juta irai etheso ura im niji eduei ilpu atimi alupas ura, im niji eduei ilpu atimi ahlap, im niji eduei ilpu profeta, im niji eduei nup u Jerusalem:

² uhpu imiterimterim niji eduora an nagesega, im lep an mohoc, im lep an niji moijeuv asega iji ig an nohatag, eris merit vaig ara, um aheca ura, um apitac ra, um ahilek ra, um lep alaigaheni vai ra: uhpu eti asjapicnaig niji eduora, um atelmoi; erupu idivaig nohok ara an narasin nobohtan.

³ Et ika a Ihova esjilid acen, Etpu esjilid inmerit vai inmas irai inmerit vai nitai umoh iran u nahri ilpu atimi iji ig era amen ara ehele nup uran pece has inigki; era amen ara irai iji uarin asega iji ig ek mun ahau pan ra iran ainyak.

⁴ Im lep inig, namu ika aiek ehele ra, Et ika a Ihova, Ara era eropropse ara, erupu idim lep atidai ara; aien et adumoij pan aien, etpu idim lep adumoij pam aien.

⁵ Era a uri a nup u Jerusalem par adumoij pan? era adumoij pan ara um imiisjis; era apol aktit an nedo efaifa ara, era mun esjum ara par adumoij pam.

⁶ Kis ahgei ainyak um atahaijeg, ja eris eti tas atoh ara: is eti adumoij an liinmopon tah natimi va nedo has o un, um ika, Ek mun ago inhe ainyak? era adumoij pan nai efalaig ura ara asega, et idivaig et athut pan hors u nedoa.

⁷ Maiya, et ato nopan o un inman an nohatag; et aminjinaig nopan napam o un inhop-paig im nohopcap im nije; ja era eti ato neruvaig atoh u Ihova a ilpu atimi unyak.

⁸ Eka evika aijaua, Ecra arapakau aijama, et eteuc ehelemia intas alep o Ihova? et idim inveijec nitai inig is asan tas alep o un aien, ja et idivaig takitai; et idim takitai intas aged u ilpu atimi asuptecnaig intas alep.

⁹ Era ehcamai a ilpu atimi arapakau, era imtitaig ara, eh mun arop ira ra: almoi, era mun edwudwai intas o Ihova ara; im lep et mun eteuc nevarapakau ehele ra?

¹⁰ Va nitai inigki ekpu alupai ilpu atimi an taka uarin ilpu ehgara ainyak, im ilpu atimi atoraliak itai niji uarin obohtan ura: vaig inig nikavaig, era aktaktai alupas niji itai an nobohtan ara asega, ilpu atimi alupas im tup atimi, era ago nedo efaifa ara asega, ilpu profeta im lep ilpu atimi ahlap.

¹¹ Era mun auahotai has an mocop irai inhalav atahig u ilpu atimi unyak ara, era ika ara, Et igpa, et igpa; et wat eti eteuc nigpa.

¹² Eris wat ago nedo inig ara eris amcel vaig, eris ehcamai ara, ka oʼo? Oʼo, eris idim eti ehcamai ara, is eti imtimlai nesganimtara ara: va nitai inigki erupu eropropse ara ehele ilpu atimi iji ig era mun eropropse ara: et ika a Ihova, eku wit ateghe ra ainyak erupu epihtau ara.

¹³ Et ika a Ihova, Ekpu auahas ehni ra ainyak: inyi eti eteuc negai vaine irai ohui vaine ura, inyi eti eteuc nohwai ateg irai ohui ateg ura, etpu imlai nerin; etpu eti amen ehele ra nitai iji igki kis alupai ra ainyak.

¹⁴ Inta a uri akaija um eklim ateuc? akumu asjapicnaig aijaua, intumu lep apan irai iji maliyum emda akaija, um amen eahki um eti tas: et mun ika a Ihova Atua uja ti amen akaija um eti tas, et mun alumaija inwai acen aien par umnyi, vaig inig nikavaig, inta mun ago nedo has vai Ihova akaija.

¹⁵ Intis ahilek nigpa akaija, jam eti leh tah nitai upene; im lep nopan cehcehe, ja is yetpam nohocred!

¹⁶ Eris ahgei nohran gidgei hors o un an maliyum Tan: eris wat ahgei ilmu niji hors emda o un, eris eucjeucjeucaij a nup uran pece asega; era mun idim ham ara, um auahas inpece, im niji itai asega amen iran; im lep inmaliyum, im ilpu atimi asega eris amen iran ara.

¹⁷ Et ika a Ihova, Akumu ato aijaua mika ekpu abraigʼ pan niji imyeuv vai caua ainyak, niji imyeuv has marom, etpu ehka vai caua par eipai ra, erupu lep aces caua ara.

¹⁸ Ek wat ika ainyak inki atipagki nohocred unyak ainyak, et auatialidi inliinmopok ainyak.

¹⁹ Akumu ahgei aijaua nohrai inhalav atahig u ilpu atimi unyak et ahlaig aien an pece itac acen, um ika, Et amen Saion a Ihova, ka oʼo? et amen iran natimarid o un, ka oʼo? Era a uri ara par auahas inliinmopok vai niji atmasimai ura im lep vai ilpu atmas u nup urai taka pece?

²⁰ Et mun ti pan itac nopan asjapicnaigʼ nohwai itai, et mun ahni inlidija, ja eh mun eti imiatamaig caija.

²¹ Et ohocred inliinmopok ainyak vai inmocop u inhalav atahig u ilpu atimi unyak; ek taig ainyak; et ehioehio inliinmopok ainyak.

²² Et idim eteuc nitai auanipin upene Cileat; et idim amen a natimi atipagki nemehe eahki; era a uri ara par eti ago cehcehe inhalav atahig u ilpu atimi unyak va nemehe o un?