Jeremaia 7 - Intas Etipup

NUARIN TAS ALUPAS 7.

1 Et abraig pan Jeremaia a Atua mika yi ahlaig vai nup u Juta mika eri adumoij pam an liinmopora ara, par atapnes nimiapan ra vaig an taka pece. 8 Et erekhaigse a Atua, et idivaig intakitai, nitai iji igki era asgeig iran ara, 12 erupu idivaig nup u Sailo ara. 17 Et ika aien yi aru nedo apat ura. 21 Et erekhaigse niji itai ahlap u ilpu atimi imipalea aien. 29 Et ated ra aien mika eri ehtigtaig ara va nedo ura er amcel vaig irai Tofet, 32 im lep va neruvaig iran.

¹ INTAS inig is ahes irai Ihova um yetpam ehele Jeremaia nigki, um ika,

² Namu aiji aiek an neucse nathatahau u nimnim u Ihova, um efehtas an tas inigki eahki, um ika, Akumu atahaijeg intas o Ihova aijaua asega, ak nup u Juta, eka apam irai eucse athatahau iji igki aijaua mika aki alaigaheni vai Ihova.

³ Et idim ika a Ihova esjilid acen, Atua u nup Isreel, Akumu aktaktai nedo unyimia aijaua im nauritai unyimia, ekpu ika ainyak aki amen an nuarin inigki aijaua.

⁴ Akumu jim asgeig irai ra sji igki aijaua era asan tas ahcil ara, um ika, Neom ahlap u Ihova, Neom ahlap u Ihova, Neom ahlap u Ihova nigki.

⁵ El eka aktaktai upene nedo unyimia aijaua im nauritai unyimia; el eka ago upene neruvaig atoh aijaua va natimi et ethi im natimi eblaamnem o un;

⁶ el eka eti ehcerucai ilpu atimi irai taka pece, im ilpu umnij, im ilpu takata iji ig eris emesmas a ilpu atamnyura aijaua, um eti atgei ilpu atimi upene an nuarin inigki, um eti apitac ilpu atmas u nup urai taka pece par auahas caua:

⁷ ekpu ika ainyak akupu amen an nuarin inigki aijaua, an pece inigki kis alupai ilpu retpomia, mika eri ohuun ara irai iji mesese.

⁸ Et idim uco, eka ateuc irai tas ahcil aijaua, ja et takitai.

⁹ Eka idim ehnegitai aijaua, um atgei atmas, um ago ingeijid, um asig yi aktit intas ahcil, um atnamud nitai auanipin upene vai Beal, um apitac ilpu atmas u nup urai taka pece eka eti ato ra aijaua;

¹⁰ um lep apam um aiji an nuhup unyak an nimnim inigki, eris anvi nidak iran, um ika, Eh mun imiatamaig cama mika ecri ago nitai iji igki asega aijama er amcel vaig.

¹¹ Eka aktaktai ajjaua mika, et idim uarin imi ilpu atimi ehnegitai nimnim inig eris anvi nidak iran: Et ika a Ihova Akumu ato aijaua mika, ek mun ecetai ainyak.

¹² Ja akumu apan aijaua an nuarin unyak iyehki Sailo, kis mun ati nidak iran ainyak an nopan iyehki, um almoi nedo inig kis ago ainyak va nedo has u ilpu atimi unyak, nup Isreel.

¹³ Im lep inig, et ika a Ihova, Vaig inig nikavaig, eka mun ago nitai iji igki asega aijaua, kis mun tas ehelemia ainyak vaig, maiya, kis mun atidai au nuhialeg ainyak um tas ehelemia vaig, ja akis eti atahaijeg aijaua; kis lep ahlaig vai caua ainyak, ja akis eti ho aijaua;

¹⁴ va nitai inigki ekpu ago ainyak va nimnim inig, eris anvi nidak iran, eka lep asgeig iran aijaua, im lep va nuarin inig kis alupai caua ainyak im lep ilpu retpomia, et idivaig nedo inig kis ago ainyak vai Sailo.

¹⁵ Ekpu ahlo pan itac caua ainyak ahes an nuhup unyak, et idivaig kis ahlo pan itac ilpu etwamia asega ainyak, ilpu mapoi Ifreem asega marom.

¹⁶ Va nitai inigki namu jim alaigaheni aiek vai nup igcaki, um jim ahlaig vai nyak, um jim ugyi nyak vai ra, um jim imiisjis ehelek: inki idim eti atahaijeg euc ainyak.

¹⁷ Na almoi aiek nedo ura era ago ara nai iji maliyum Juta im lep irai iji efalaig Jerusalem, ka oʼo?

¹⁸ Nikavaig, era ahre cai a ilpu hal ura, era adnan cap a ilpu etmara, era aplamod flaur a ilpu takata, par ago keek vai natimarid atahig an nohatag, um atladwi nitai ahlap er umnyi imi ilpu atmas u nup urai taka pece, mika eri auahas inliinmopok ara.

¹⁹ Et ika a Ihova, Era eti auahas inliinmopok ara: ja era idim auahas inliinmopora ara mika yi ehcamai nesganimtara.

²⁰ Et ika a Ihova Natimarid; Va nitai inigki uhpu idim atladwi an nuarin inigki nedemda unyak im intavaitap unyak, ira atimi, im niji itai eklim edo irai pece, im niji cai an tucjip, im niji itai asega et ededel an nobohtan; etpu cas, um idivaig incap eri eti ahni.

²¹ Et ika a Ihova esjilid acen, Atua u nup Isreel; Akumu asjapicnaig niji itai ahlap atnamud unyimia aijaua im niji itai tup ahtai unyimia, um hegaig kurimatau.

²² Kis eti tas ehele ilpu retpomia ainyak, um eti tas alep ehele ra ainyak an nopan iyehki kis iknipagki ra an pece Ijipt ainyak, vai niji itai ahlap atnamud im niji itai tup ahtai ache:

²³ ja kis lep asan tas alep inigki ehele ra ainyak, um ika. Akumu atahaijeg intas unyak aijaua, ekpu Atua unyimia ainyak, akupu lep ilpu atimi unyak aijaua: akumu lep atga aijaua irai efalaig asega iji ig ek mun asan tas alep vaig ehelemia ainyak, mika aki amen upene aijaua.

²⁴ Ja eris eti atahaijeg ara, um eti atgeig pam intikgara, eris idim atga ara irai aktaktai u inliinmopora has, im nedo imiisjisitai ura, eris atidjira irak ara, jam eti alum nyak.

²⁵ Ahes an nopan iyehki eris udei inpece Ijipt a ilpu retpomia um apam igcaki um imihum pam an nopan inig, kis mun abraig pan ehelemia ainyak ilpu aheca unyak asega, ilpu profeta marom, kis atidai an nuhialeg ainyak irai iji adiat um abraig pan ra:

²⁶ ja eris eti atahaijeg intas unyak ara, um eti atgeig pam intikgara, eris idim ago ipjin nauinwara ara: is esjilid nedo has ura irai nedo has u ilpu retpora.

²⁷ Napu asuptecnaig intas iji igki asega ehele ra aiek; ja erupu eti atahaijeg euc ara: napu ahlaig vai ra aiek; ja erupu eti ho ara.

²⁸ Va nitai inigki namu ika aiek ehele ra, Era mun eti atahaijeg intas o Ihova Atua ura a ilpu atimi amen an pece inig, um eti leh nacaiji ra: et mun tiih intas inveijec, et ti irai ipjineucsera.

²⁹ Namu ucsei numri nidjinum aiek, um ethaigse, um taig alupas irai uarin ijinies; et mun esjum a Ihova vai ilpu atimi iji ig is edemda va ra aien, et mun erekhaig ra aien.

³⁰ Et ika a Ihova, Era mun ago nedo has a nup u Juta an nuhup unyak: era mun ikni niji itai ura ara er amcel vaig an nimnim inig eris anvi nidak iran mika eri auahas.

³¹ Eris lep uctaig niji uarin ijinies ara Tofet, et amen an niskanse u inhal u Hinnom, mika eri atnamud an cap ilpu halav atamaig ura im ilpu halav atahig ura; kis acaiji ainyak um ika eri jim ago, is lep amcel vaig inliinmopok ainyak.

³² Et ika a Ihova, Va nitai inigki etpu idim yetpam tah nopan uhpu eti lep anvi nidan inuarin iyehki par ika Tofet, ka niskanse u inhal u Hinnom, ja niskanse atgei atimi iran: erupu lep atelmoi nohui ilpu atimi emesmas Tofet ara, um yetpan an nopan iyehki etpu eti lep amen iran tah inuarin atelmoi.

³³ Etpu itai caig nohui ilpu atimi emesmas irai nup igcaki incai iji man an nauanohatag, im niji itai eklim edo irai pece; etpu eti ahau ra tah.

³⁴ Ekpu lep ika ainyak inyi idim tiih nohrai ilpu atimi imiacitak, im nohrai ilpu atimi cediaig, im nohrai natimi leh ehgan, im nohrai natahig leh natamnyu un, irai iji maliyum an pece Juta, im lep irai iji efalaig Jerusalem: etpu idim umaruma inpece.