Jeremaia 6 - Intas Etipup

NUARIN TAS ALUPAS 6.

1 Er abraig pam ilpu atimi tob atimi irai nap u Juta mika eri aat ira ra, 4 era ago emda inliinmopora ara. 6 Et ika a Atua eri ago nauritai inigki va nedo has u Apu, atimi o uri. 9 Et taig a naprofeta va neruvaig nedo kos ura u Atua. 18 Et asuptecnaig nedemda u Atua aien. 26 Et ahlaig vai nup uran pece o uri ateri mika eri ehtigtaig ara va neruvaig nedo has ura.

¹ Ak nup u Benjamin, akumu ehrasjapicnaig aijaua um udei Jerusalem um ahapan, akumu ahlai intoho an maliyum Tekoa aijaua, um imiaridjai nitai ahlaig an cap an maliyum Bed-hakserem: et idim ahes an pece inig et ahes narutu iran nitai has um ehcohos pam, et auahas alupas itai.

² Ekpu auahas intakata inig ainyak et eklim upene aien um acitak, inhalav atahig u Saion marom.

³ Erupu apam ehelen a ilpu atirai asgi siip ira lep niji pak irai siip ura; erupu athai eom apelumai ura ara an nuhup o un ura arehed iran; erupu alayi siip ura ara irai iji uarin ura, athi um athi ehni.

⁴ Akumu ati nedoa vai yin aijaua; Ti atidai akaija, um aridjipan an nadiatadiat: kaiheuc vai, caija! injupki mun igki: et opra nalmui itai, et ubutpotet u injupura.

⁵ Ti atidai akaija um aridjipan an nepig; intumu alcapdicraig niji eom esjilid o un akaija.

⁶ Et ika a Ihova esjilid acen, Akumu attai niji cai o un aijaua, um uctaig uarin ijinies par ati nedoa vai Jerusalem: eris idim ika eri ara nedo o nup uran maliyum inigki; et esjilid nedo ehcerucai atimi iran.

⁷ Et ahlau ohua sjai nedo has ura iran, et idivaig et ahlau ohua sjai inwai an nimtanwai: er ahgei an nibla ra nehnegitai im natoraliak itai; ek ecetai nohocred im nehtauo ainyak irai iji adiat.

⁸ Akumu aktaktai upene aijaua, ak nup u Jerusalem, vai yi jim esjum vai caua inliinmopok ainyak; vai ki jim ika ainyak yi ahyuahyu i inmaliyum unyimia, yi jim amen tah an pece unyimia.

⁹ Et ika a Ihova esjilid acen, Erupu arahon ehni nahri nup Isreel ara et idivaig vaine: etmu adumoij pan nikmam aiek irai cat, et idivaigʼ et imiadumoij nikman irai cat a natimi asjapicnaig nohwai vaine.

¹⁰ Ekpu tas ehele di ainyak, um acaiji ra, mika eri atahaijeg ara? et idim ucjipines intikgara ara, era esjum ara par atahaijeg: et idim takitai imi ra intas o Ihova; era eti merit vaig ara.

¹¹ Va nitai inigki et ohua nedemda u Ihova irak; et esvi nyak par anaijiraig: ekpu atladwi ainyak irai ilpu hadi irai efalaig, im lep irai ilpu takuras era mun ehrasjapicnaig ara: uhpu arop irai natamnyu un im lep ehgan, im lep nefatimi im natimi ohoigmeto.

¹² Erupu lucsei niji eom ura a ilpu atimi et eche, im lep umara im ilpu ehgara: et ika a Ihova, Ekpu idim adan nikmak ainyak irai ilpu atimi amen an pece inigki.

¹³ Era idim aktaktai alupas niji itai an nobohtan ara asega, ilpu atimi alupas im lep tup natimi; era lep ago nedo efaifa ara asega, ilpu profeta im ilpu atimi ahlap.

¹⁴ Era mun auahotai has an mocop irai inhalav atahig u ilpu atimi unyak ara; era ika ara, Et igpa, et igpa; et wat eti eteuc nigpa.

¹⁵ Eris wat ago nedo er amcel vaig ara eris ehcamai ara, ka oʼo? Oʼo, eris idim eti ehcamai ara, is eti imtimlai nesganimtara ara: va nitai inigki erupu eropropse ara ehele ilpu atimi iji ig era eropropse ara: et ika a Ihova, Eku wit ateghe ra ainyak erupu epihtau ara.

¹⁶ Et ika a Ihova, Akumu aiji irai efalaig aijaua, um almoi, um ahodai atimi vai iji efalaig itu, um ika, Nefalaig upene yek eda? um atga iran; akupu leh nitai atumop iran imi nesgamia aijaua. Ja eris ika ara, Ecrupu eti atga iran aijama.

¹⁷ Im lep inig, ek mun ikni ilpu atimi aminjinaig itai vai caua ainyak, um ika, Akumu atahaijeg nohran toho aijaua. Ja eris ika ara, Ecrupu eti atahaijeg aijama.

¹⁸ Va nitai inigki akumu atahaijeg aijaua, ak nup urai iji pece, um ato, ak ilpu atimi asjapicnaig, nitai inig et amen ehele ra.

¹⁹ Ak nobohtan, namu atahaijeg aiek: ekpu imiapam nohocred ainyak irai ilpu atimi iji igki, nohwan naktaktai ma, vaig inig nikavaig, eris eti atahaijeg intas unyak ara, ja eris edwudwai intas alep unyak ara.

²⁰ Eka a uri aijaua par imiapam ehelek nitai auanipin upene inig et ahes Siba, im lep incai auanipin upene inig et ahes an pece itac acen? ek eti merit ainyak va niji itai ahlap er atnamud unyimia, ek eti imiacitak ainyak niji itai ahlap unyimia.

²¹ Va nitai inigki et ika a Ihova, Ekpu idim ikni niji itai epihtau ainyak vai nup igcaki, erupu ehrepihtau iran a ilpu etmara im lep ilpu hal ura; erupu emesmas a ilpu atimi eblaamnem ma im ilpu apa ura.

²² Et ika a Ihova, Erupu idim, apam a nup uran pece inig et ahes narutu iran, uhpu ahugni nup uran pece alupas an tid an nobohtan.

²³ Erupu apos nefana im inmopul ara; et ipjin nedo ura, erupu eti aiheuc vaig tah ara; et acreh nohrara um idivaig nipji kumnyan has; era ateuc irai hors ara, era esyei ra ara et idivaig ilpu atimi ati nedoa, erupu yiat iramia ara, ak nup u Saion.

²⁴ Inta mun atahaijeg intas vaig akaija: et mun auatialidi nikmaija: inta mun imtitaig alupas akaija, um ohocred et idivaig intakata inig et ika aien yi apos inhal o un.

²⁵ Akumu jim apan itac aijaua an lelitai; um jim atga an nefalaig; era ati nedoa a ilpu atimi tak atimi iramia, er imtitaig marehed mihtag.

²⁶ Ak ilpu atimi unyak, akumu aso caua aijaua ira apelumai uucai, ereuc an nohpa: akumu ehtigtaig aijaua, et idivaig intaig vai inhalav cap o un tah, inyi alupas acen nehtigtaig: erupu auroauro a ilpu atimi auahas itai um yetpam iraija.

²⁷ Ek mun ati euc ainyak mika an asjaaicnaig irai itai u ilpu atimi unyak, im lep mika an ahodai ra, mika an ato aiek um ahilek nedo ura.

²⁸ Era idim ilpu atimi imipalea ara asega: era atga sjipe ara um hos tas: era efaifa ara um idivaig bras im aiurn; era idim eheshas ara asega.

²⁹ Ekmun atnamud nitai ahlincap, et mun auahas let incap; et auud pas a natimi ago itai jam takitai: vaig inig nikavaig, eh mun eti iknipagki ilpu atimi auatatimi.

³⁰ Uhpu aniv ra par ika silver er erekhaig, vaig inig nikavaig, et mun erekhaig ra a Ihova.