Jeremaia 52 - Intas Etipup

NUARIN TAS ALUPAS 52.

1 Et imipalea intas alep u Nebukatnesar a Setekaia. 4 Er arehed inmaliyum Jerusalem, um aat iran, um atoraliak. 8 Er atgei ilpu hal u Setekaia, um ago apat nesganimtan ehro. 12 Et atnamud inmaliyum an eap a Nebusaratan, um atoraliak itai iran. 24 Et arore atimi aien um imiapan ra an pece Babelon. 31 Et imiaridjai Jehoiakin a Ivil-merotak.

¹ IS wat atupun a Setekaia, um atimarid, is eteuc inmesese twente wun iran, is atimarid Jerusalem aien an mesese is eleven: nidai risin Hamutal inhalav atahig u Jeremaia nup u Libna.

² Is ago nedo has aieu an nuhup u Ihova, et idivaig nedo asega inig is ago a Jehoiakim.

³ Is idim uco, vaig inig nikavaig, is edemda vai nup u Juta im nup u Jerusalem a Ihova, um yetpam an nopan iyehki is ahlo pan itac ra aien ahes an nuhup o un. Im lep inig, is imipalea intas o natimarid an pece Babelon a Setekaia.

⁴ Im lep inig, an mesese naind an nopan natimarid o un, an mohoc tend, an nadiat tend an mohoc iyehki, is apam a Nebukatnesar natimarid an pece Babelon, aien marom im inpak an nedoa asega o un, um aat irai Jerusalem, um amen o un par ati nedoa, um uctai iyum emda marehed mihtag.

⁵ Eris ati nedoa ara um arehed an maliyum um yetpan an mesese elevend an nopan natimarid u Setekaia,

⁶ an mohoc ford, an nadiat naind an mohoc iyehki, is wat alupas numlaig has an maliyum, is lep ti nitai hegaig vai nup uran pece;

⁷ eris alcapdicraig nathatahau, eris lep ahapan a ilpu eucsupo asega, um udei inmaliyum, um apan itac an nepig, an nefalaig u neucse nirahed an niblan nathatahau ehro, u nahapol u natimarid; (eris arehed mihtag an maliyum a nup u Kaltia): eris atga an nefalaig ara et yetpan an nuarin marara.

⁸ Ja eris apitac natimarid a ilpu eucsupo u nup u Kaltia, um uhum pan Setekaia irai uarin marara Jeriko; ja eris terimterim a ilpu eucsupo asega o un eris um udei yin ara um eti amen ehelen.

⁹ Eris um arop irai natimarid ara, um imiapan yin Ribla au pece Hemad ehele natimarid an pece Babelon; is asuptecnaig nimtan vai yin aieu eahki.

¹⁰ Is atgei ilpu halav atamaig u Setekaia an nuhup o un a natimarid au pece Babelon: is lep atgei ilpu atimi alupas asega an pece Juta aien Ribla.

¹¹ Is um auahas nesganimtai Setekaia aien; is um arore yin irai atau bras a natimarid an pece Babelon, um imiapan yin Babelon, um ati yin anliin neom ipjin um yetpan an nadiat inmas o un.

¹² An mohoc fifd, an nadiat tend an mohoc iyehki, is mesese naintiind inmesese iyehki an natimarid vaig u Nebukatnesar natimarid an pece Babelon, is yetpam Jerusalem a Nebusaratan, natimi alupas u ilpu eucsupo, is aheca esjilid is ethi u natimarid an pece Babelon aien.

¹³ Is atnamud neom u Ihova aien, im nimnim u natimarid; is lep atnamud niji inmim asega Jerusalem an cap aien, niji imnim alupas asega marom:

¹⁴ eris alcapdicraig niji athatahau asega Jerusalem marehed mihtag a ilpu eucsupo asega iji ig eris ahced natimi alupas u ilpu eucsupo ara.

¹⁵ Is imiapan Babelon ra sji ehki a Nebusaratan natimi alupas u ilpu eucsupo, nikavaig, nahaiji ilpu ihki atimi, im ilpu ahri atimi iji ehki eris amen au maliyum ara, im lep ra sji ehki eris aha ara, um leh imi natimarid au pece Babelon, ilpu ahri atimi asega marom.

¹⁶ Ja is udei nahaiji ilpu ihki atimi irai nup uran pece a Nebusaratan natimi alupas u ilpu eucsupo, mika eri ilpu atimi aminjinaig okoro vaine ara im ilpu atimi ahapol.

¹⁷ Im lep inig, eris apan a nup u Kaltia um ahtagrei noboatau bras ero is amen an neom u Ihova, im niji ededuon niji itai, im lep nipjinitai bras iyehki is alupas acen is amen an nimnim u Ihova, um imiapan bras asega iran Babelon.

¹⁸ Eris lep imiapan Babelon niji ipjiuru ara, im niji itai acale, im niji itai ehteti, im niji ipjiitai, im niji spuun, im niji ipjiitai bras asega eris auanaheca iran ara.

¹⁹ Is lep imiapan Babelon niji ipjibeson a natimi alupas u ilpu eucsupo, im niji ipjiitai eris ati incap iran, im niji ipjiitai, im niji ipjiuru, im niji lamp, im niji spuun, im niji ipjikup; is lucsei colt aien irai iji itai eris ago irai colt, im silver irai iji itai eris ago irai silver.

²⁰ Noboatau ero eraigko, im nipjinitai alupas acen is ethi, im kurimatau atamaig bras is twelv is amen ithai nipjinitai alupas acen iyehki, im niji ededuon niji itai iji ehki is ago a Solomon natimarid va nimnim u Ihova, is elika par asjaaicnaig nebras irai itai iji ehki asega, is idim alupas.

²¹ Intas va noboatau ero eraigko nigki, is apapa pan an nikmai atimi is eetiin nijinies u noboatau is ethi; is apapa pan an nikmai atimi is twelv narehed iran; is lep apapa pan an nakohiaig atimi nameseij iran: is nipjin ache.

²² Eris adgaig ijinies iran incat adgaig irai bras; is apapa pan an nikmai atimi is faiv nijinies u incat adgaig is ethi, is eteuc nauritai ijoijo im niji pumcranet an cat adgaig marehed mihtag, is bras asega; is lep uco va noboatau is eche im lep pumcranet iran.

²³ Is eteuc niji pumcranet is nainte siks an nahaijin is ethi; is wun huntret, niji pumcranet asega an nauritai ijoijo marehed mihtag.

²⁴ Is apan a natimi alupas u ilpu eucsupo, um lucsei Sereaia natimi esjilid an nahlap, im Sefanaia natimi ahlap esjilid, im natimi is dri ehtijis aminjinaig neucse neom ahtaij.

²⁵ Is lep leh naheca esjilid is ethi aien an maliyum, is aminjinaig ilpu eucsupo aien; im lep natimi is seven irai ra sji ig eris amen ubutpotet ehele natimarid ara, eris ecet ra an maliyum, im lep natimi aged itaasviitai esjilid u inpak an nedoa, is esvi nup uran pece aien, im lep natimi is sikste irai nup uran pece, eris ecet ra anliin maliyum.

²⁶ Is lucsei ra a Nebusaratan natimi alupas u ilpu eucsupo, um imiapan ra ehele natimarid an pece Babelon Ribla.

²⁷ Is um auud ra a natimarid an pece Babelon, um atgei ra Ribla, an pece Hemad: is lep lucsei nup u Juta aien ahes an pece ura, um imiapan ra an pece Babelon.

²⁸ Natimi sji ig is imiapan ra Babelon a Nebukatnesar: nikavaig, an mesese sevend nup u Juta is dri dausant im twente dri:

²⁹ au mesese eetiind irai Nebukatnesar is arore atimi is eet huntret im dirte tu aieu Jerusalem um imiapan ra Babelon:

³⁰ an mesese twente dirt irai Nebukatnesar is arore nup u Juta is seven huntret im forte faiv a Nebusaratan natimi alupas u ilpu eucsupo um imiapan ra Babelon: eris for dausant im siks huntret natimi asega.

³¹ Im lep inig, an mesese dirte sevend an namen u Jehoiakin natimarid an pece Juta Babelon, an mohoc twelfd, an nadiat twente fifd an mohoc iyehki, is ahiyi Jehoiakin natimarid an pece Juta a Ivil-merotak natimarid an pece Babelon an mesese uhup is atimarid aien, um imialau ijo yin an neom ipjin,

³² um tas upene ehelen, um ati nitai ateuc o un ijinies irai itai ateuc u ilpu atimarid iji ig eris amen ehelen ara Babelon;

³³ is atipagki napelumai o un aien is aso yiu iran aien au neom ipjin um aso yin ira apelumai is eche: is caig nitai caig aien an nuhup o un irai mesese asega iji ig is umoh aien.

³⁴ Is ika a natimarid an pece Babelon eri alaan nuarin nitai caig incan irai iji adiat, athi um athi ehni, um yetpan an nadiat inig is mas aien, irai adiat asega iji ig is umoh aien.