Jeremaia 51 - Intas Etipup

NUARIN TAS ALUPAS 51.

1 Neruvaig egilid u Atua irai nup u Babelon, nimtan nedo ura vai nup Isreel. 59 Et alupai Sereaia nitaasviitai an tas upyi asaig inigki a Jeremaia, mika yi ethaigse an nofowai Yufretes, nitai asjaaicnaig mika eri ete a nup u Babelon um yetpan irai iji mesese.

¹ ET ika a Ihova, Akumu ato aijaua mika, ekpu ati nehio ainyak, etpu auahas itai vai nup u Babelon, im lep vai ra sji ig era amen ehele ilpu atimi tak atimi irak;

² ekpu abraig pan ilpu atimi ahre itai ainyak ehele nup u Babelon, erupu ahre ra ara, um lucsei niji itai asega au pece ura um arahon: vaig inig nikavaig, erupu aat ira ra ara marehed mihtag an nopan ohocred ura.

³ Erumu aiyihi niji cee efana ura a ilpu atimi atcijaig efana vai ilpu atimi atcijaig efana, um lep vai ra era aijisji atoh ira ra ira apelumai nisil hat ura: akumu jim itai vai ilpu takuras ura aijaua, jam auahas ehni inpak an nedoa asega ura.

⁴ Erupu eropropse a ilpu atimi eris atgei ra an pece u nup u Kaltia, erupu lep ilpu atimi eris asvajiji ra irai efalaig ura.

⁵ Is ohua nedo has vai Atua upene u nup Isreel an pece ura; ja et mun eti ahnag irai nup Isreel a Atua ura, et mun eti udei nup u Juta a Ihova esjilid acen.

⁶ Akumu ahes anliin maliyum Babelon aijaua um ahapan, um imiatamaig caua, athi um athi ehni: va uhpu auahas caua pan an neruvaig imi ra; vaig inig nikavaig, nopan aruvaig u Ihova nigki; etpu ati neruvaig imi ra aien.

⁷ Era ipjicolt a nup uran pece Babelon an nikmai Ihova, eris ika ara eri idivaig natimi ahnag vai waina ura a nup urai iji pece asega: era mun umnyi waina ura a nup urai iji pece; va nitai inigki era tas ijimes a nup urai iji pece, um ika,

⁸ Era mun auroauro a nup u Babelon um eropropse, maiya, eh mun auahas ra: akumu aunyauwaig vai ra ajaua; akumu lucsei wai emehe aijaua va nohocred ura, kit erupu cehcehe upene ara.

⁹ Intis ika akaija ti ago cehcehe nup u Babelon akaija, ja era eti cehcehe ara: intumu udei ra akaija, um apan irai iji pece uja, athi um athi ehni: vaig inig nikavaig, et yetpan an nauanohatag neruvaig imi ra, et aridjipan ijinies acen.

¹⁰ Et mun ehvaig nedo atoh uja a Ihova: intumu apan akaija, um asuptecnaig nauritai u Ihova Atua uja Saion.

¹¹ Akumu ago naunau niji idjai efana unyimia aijaua, um asjapicnaig niji itai ahtaipup: et mun ago emda inliinmopoi ilpu atimarid u nup u Mitya a Ihova: et mun anacanac aien irai nup u Babelon, par auahas ra; vaig inig nikavaig, neruvaig u Ihova nigki, neruvaig va neom ahlap o un.

¹² Akumu atijai nitai ahlaig aijaua ijinies irai athatahau irai Babelon, um aminjinaig upene, um ikni ilpu atimi iasias, um aniv ilpu atimi atpaijinaig: et mun ago nedo inig vai nup u Babelon a Ihova, is upyi anacanac aien vai ra um lep asaig.

¹³ Ak ilpu atimi iji ig, eka amen ui wai et ahinag aijaua, et alupas naga unyimia, et mun yetpam nahni u namen unyimia, neruvaig u inhas iramia itai nigki.

¹⁴ Et mun asig yi aktit intas a Ihova vai yin, um ika, Ekpu idim ika ainyak eri ohua natimi an maliyum unyimia, et idivaig inpak irai lag; erupu aunyauwaig ara vai caua anliin maliyum unyimia.

¹⁵ Et mun ago nobohtan aien va nemda o un, et mun ikni niji uari pece asega aien va narapakau o un, is lep elgelgei nohatag aieu an naktaktai upene o un.

¹⁶ Et wat efehtas aien, et ahes an nohatag incopda alupas: et ika aien yi ahes an tid an nobohtan inmoso um aridjai: et ago nauwainapit aien im lep incopda, et lep ika aieu yi ahes irai eom ikni itai o un nimtinjap um ehcohos pam.

¹⁷ Era ahnag natimi asega, et ti nato itai ura; era ehcamai a ilpu atimi wud ugyit asega va niji atmasimai ugyit ura: et ahcil niji almuitai ura, et eti umoh tah.

¹⁸ Et takitai nitai iji igki, nauritai u ilpu atimi ahnag: etpu idim ti an nopan neruvaig iran.

¹⁹ Et eti idivaig nitai iji igki a Atua inig et alayi ilpu mapoi Jekob aien; et Atua ago niji itai asega aien: era lep ilpu atimi an pece o un a nup Isreel: et idan Ihova esjilid acen.

²⁰ Eka pas unyak aijaua, ak nup u Mitya, um ij va atimi: ekpu ika ainyak aki auoh opleoplec nup urai iji pece aijaua, um lep ika aki auahas nup urai iji elcau aijaua;

²¹ um lep ika aki auoh oplecoplec niji hors im ilpu atimi ateuc iran aijaua; um lep ika aki auoh oplecoplec niji jariot im ilpu atimi ateuc iran aijaua;

²² um lep ika aki auoh oplecoplec ilpu atamaig im ilpu takata aijaua; um lep ika aki auoh oplecoplec ilpu efatimi im ilpu dualep aijaua; um lep ika aki auoh oplecoplec ilpu takuras im ilpu atahig aijaua;

²³ um lep ika aki auoh oplecoplec ilpu atimi asgi siip im niji pak irai siip ura aijaua; um lep ika aki auoh oplecoplec ilpu atimi ahapol im niji kurimatau ura aijaua; um lep ika aki auoh oplecoplec ilpu atimarid im ilpu atimi alupas ura aijaua.

²⁴ Et ika a Ihova, Ekpu lep aru vai nup u Babelon ainyak im lep vai nup u Kaltia asega nedo has asega eris ago ara Saion an nuhup unyimia.

²⁵ Et ika a Ihova, Ek idim edemda ainyak vai euc, ak nedoon auahas itai, nai auahas nup urai iji pece asega aiek: ekpu adaigjai nikmak ainyak vai euc, um atcelcaise euc ahes irai hehteuc, um ika an nedoon cas aiek.

²⁶ Et ika a Ihova, Erupu eti leh iram ara tah inhat va nesvi va neom, ka tah inhat vai nededuon neom; ja na umaruma aiek irai iji mesese.

²⁷ Akumu atijai nitai ahlaig an pece ura aijaua, um ahlai intoho vai nup urai iji pece, um ikni nup urai iji pece par aat ira ra, um ika eri asjapicnaig nup urai elcau Ararat, im Minai, im Askenas, par aat ira ra; akumu ati natimi alupas irai ilpu eucsupo aijaua par aat ira ra; um ika eri apam a ilpu atimi ateuc irai hors, et idivaig niji heled et eteuc nalau iran.

²⁸ Akumu ikni nup urai iji pece par aat ira ra, im lep ilpu atimarid u nupu Mitya, im ilpu atimi esjilid ura, im ilpu atimi alupas ura, im nup urai iji pece asega era esjilid ira ra ara.

²⁹ Etpu amaamai inpece um omoi: uhpu ehneijid intas anacanac asega u Ihova vai nup u Babelon, mika yi umaruma inpece Babelon, etpu lep eti amen iran tah natimi.

³⁰ Era mun tup amen a ilpu atimi emda u nup u Babelon um eti ati nedoa, era mun amen irai uarin emda ura ara: et mun ti nemda ura ara, era mun idivaig ilpu takata ara: eh mun atnamud niji eom ura; eh mun ahtasvi niji itai ago ipjin niji tapnes ura.

³¹ Etpu athut a natimi asuptecnaig intas et ethi par aubilid natimi asuptecnaig intas et eche, im natimi eris abrai yin et ethi, par aubilid natimi eris abrai yin et eche, par asuptecnaig ehele natimarid an pece Babelon mika eh mun atoraliak nahaijin maliyum o un et ethi,

³² um lep atapnes niji efalaig iran, um atnamud niji auanieg an cap, um imtitaig a ilpu eucsupo o un.

³³ Et ika a Ihova esjilid acen, Atua a nup Isreel; Era idivaig nuarin auud hwiit iran a nup u Babelon, et mun yetpam nopan nauud ra: etpu yetpam nopan asjapicnaig ohwai itai ura tupko.

³⁴ Et mun auahas cama a Nebukatnesar natimarid an pece Babelon et mun auoh oplecoplec cama aien, et mun ikni cama aien et idivaig nipjiitai et ti nitai iran, et mun atleg cama aieu et idivaig nipciv, et mun ika aien yi ohua niji itai hegaig adale unyima an nipjinetgan, et mun ahlo pan itac cama aien.

³⁵ Erupu ika a nup u Saion, Uhpu atijai irai nup u Babelon nedo has inig eris ago vai cama im lep vai ilpu atimi ehpan irama. Erupu lep ika a nup u Jerusalem, Uhpu atijai irai nup u Kaltia nedo has ura par atgei cama.

³⁶ Va nitai inigki et ika a Ihova: Akumu ato aijaua mika, ekpu tas alep vai caua ainyak, um aru nedo has ura inig eris ago vai caua ara; um lep ika yi ame nofowai ura, um lep ame niji wai ahlau ohua sjai ura.

³⁷ Etpu tup idivaig nijih irai itai inmaliyum Babelon, etpu uarin amen iran niji imyeuv, etpu itai imiali, im nitai amcel vaig, etpu eti amen iran tah natimi.

³⁸ Erupu ehraunyauwaig ara et idivaig niji laion: erupu ahlaig ijinies ara et idivaig ilpu hal u laion.

³⁹ Et ika a Ihova, Ekpu alumara waina unyak ainyak an cediaig ura, um ika eri ahnag vaig, mika eri imiacitak ara, um umjeg irai iji mesese, um eti lep aiji lahlah.

⁴⁰ Ekpu imiapan ra ainyak et idivaig niji hakli siip par atgei ra, um idivaig niji siip atamaig im niji anin atamaig.

⁴¹ Et echamecha, eh mun atoraliak Sisak! et echamecha, par etehto inmaliyum inig eris imiahpas an nobohtan asega! et echamecha, et itai imiali inmaliyum Babelon vai nup urai iji elcau!

⁴² Et mun erijai injap Babelon: et mun talulu va nepeau et ahinag.

⁴³ Et umaruma niji maliyum ura, et ti inwai an pece iyehki, et lep amasacen, et eti amen tah natimi an pece iyehki, et eti atga iran tah inhal u natimi.

⁴⁴ Ekpu aru nedo o Bel ainyak Babelon, ekpu lep atipagki an nipjineucsen ainyak nitai iji ig et mun atleg aien: erupu eti lep asjapicnaig ehelen a nup urai iji pece: etpu lep eropse nathatahau Babelon.

⁴⁵ Akumu ahes anliin maliyum inigki aijaua, ak ilpu atimi unyak, um apan itac, um imiatamaig caua, athi um athi ehni, va nedemda alupas u Ihova.

⁴⁶ Etmu jim auatialidi inliinmopomia aijaua, um jim imtitaig aijaua van tas inig akupu atahaijeg vaig aijaua an pece; etpu apaahni intas au mesese inyi ethi, etpu par aketo intas um lep apaahni an mesese inyi eche, erupu ehtauo jipe an pece ura a ilpu atimi alupas.

⁴⁷ Ja par apitac, akumu ato aijaua mika, etpu yetpam nopan iyehki ekpu auahas niji atmasimas ugyit u nup u Babelon ainyak: erupu ehcamai a nup uran pece ura asega, erupu lep eropropse an niblara a ilpu atimi asega ura eris atgei ra.

⁴⁸ Et ika a Ihova, Erupu acesaces nohranitai vai nup u Babelon a nup uran nohatag, im lep nup uran nobohtan, im niji itai asega amen iran: vaig inig nikavaig, erupp ahes an pece inig et ahes narutu iran a ilpu atimi atoraliak itai um apam ehele ra.

⁴⁹ Eris idim eropropse a nup Isreel eris atgei ra a nup u Babelon, et idim uco, erupu idim eropropse Babelon a nup urai pece asega eris atgei ra.

⁵⁰ Akumu atga unyimia aijaua, ak ilpu atimi eka aha va nedoa aijaua, um jim aiji: akumu imiehva Ihova aijaua an pece itac acen, um aktaktai upene Jerusalem, um ika,

⁵¹ Ecra mun ehcamai aijama, vaig inig nikavaig, ecra mun atahaijeg intas amcel vaig aijama: et mun imtimlai nesganimtama aijama: era mun apau a nup urai taka pece irai iji uarin itap an neom u Ihova.

⁵² Va nitai inigki, et ika a Ihova, Akumu ato aijaua mika, etpu yetpam nopan iyehki ekpu auahas niji atmasimai ugyit ura ainyak: erupu lep lesjai a ilpu atimi iji ig eris ahcai ra an pece ura asega.

⁵³ Et ika a Ihova, El era mun aridjipam an nohatag a nup u Babelon, im lep inig, el era mun ago emda nuarin ijinies an nemda ura ara, ja erupu ahes ehelek a ilpu atimi atoraliak itai, um apan ehele ra.

⁵⁴ Er ahgei nohran tah et ahlaig aien Babelon, er lep ahgei inmotjan nauahas itai alupas an pece u nup u Kaltia:

⁵⁵ vaig inig nikavaig, et mun auahas Babelon a Ihova, um atipagki nohran alupas iran; et idim idivaig inmotjan jap nohra atimi eahki, et ahelu naunyauwaig ura.

⁵⁶ Era idim apam a ilpu atimi atoraliak itai par aat ira ra, nup u Babelon marom, eh mun arop irai ilpu eucsupo ura, eh mun ahtasvi niji cee efana asega ura: etpu idim ara nedo ura a Ihova, Atua inig et aru nedo o atimi aien.

⁵⁷ Et ika a Natimarid inig et idan Ihova esjilid acen; Ekpu alumai ilpu atimi alupas ma Waina ainyak, im ilpu atimi arapakau ura, im ilpu atimi esjilid ura, im ilpu atimi tas alep ura, im ilpu eucsupo ura, mika eri ahnag ara, um umjeg irai iji mesese, um eti lep aiji lahlah.

⁵⁸ Et ika a Ihova esjilid acen; Uhpu alcapdicraig ehni niji athatahau iji ig et alupas Babelon; uhpu lep atnamud an cap niji tapnes ijinies iran; erupu lep auritai natimi ura vai takitai, um lep auritai a nup urai pece an cap, ja erupu arici ara.

⁵⁹ INTAS inig is asaig a Jeremaia naprofeta ehele Sereaia inhal u Niraia, inhal u Measia nigki, is wat apan Babelon aien vai Setekaia natimarid an pece Juta an mesese ford u natimarid o un. Is um atimi alupas igpa a Sereaia.

⁶⁰ Is um aged an nitaasviitai is ethi a Jeremaia va niji ohocred asega, etpu yetpan ehele nup u Babelon, intas iji igki asega marom eris aged vai nup u Babelon.

⁶¹ Is um ika a Jeremaia ehele Sereaia, Nau wit yetpan Babelon aiek, um alum itai, um esvi intas iji igki asega;

⁶² namu ika aiek, Ak Ihova, na mun asaig intas aiek va nuarin pece inigki, par auahas, mika eri jim amen iran tah nitai, natimi ka nitai eklim edo irai pece, ja etpu ahyuahyu irai iji mesese.

⁶³ Im lep inig, nau wit esvi ehni nitaasviitai inigki aiek, namu athai inhat iran aiek, um ethaigse juju an nofowai Yufretes:

⁶⁴ namu lep ika aiek, Etpu idim uco, erupu ete a nup u Babelon, um eti ahloohos va nohocred inig ekpu imiapam vai ra ainyak: erupu lep arici ara. Et mun ti intas o Jeremaia