Jeremaia 5 - Intas Etipup

NUARIN TAS ALUPAS 5.

1 Neruvaig u Atua irai nup u Juta va nedo imipalea ura, 7 vai ingeijid ura, 10 va neti ecen va Atua ura, 19 va namcel va Atua ura, 25 va nauatatimi u ilpu atimi alupas ura, 30 im lep u ilpu atimi ahlap ura.

¹ AKUMU athut jipe aijaua irai iji efalaig Jerusalem, um aespan, um ato, um ahilek irai iji uarin lah; kit aki ecet tah natimi aijaua, kit et eteuc tah natimi et ago nedo atoh aien, ka tah natimi et ahilek intas inveijec aien; ekpu atapnes neruvaig an maliyum ainyak.

² El era idim ika ara, Et idim umoh a Ihova; ja era mun asig yi aktit intas efaifa ara.

³ Ak Ihova, na mun idim ati nesganimtam aiek irai ra sji igki era ago nedo inveijec ara; na mun aredei ra aiek, ja era mun eti taigtaig ara; na mun auahas ra aiek, ja era ika ara eri eti leh nesege unyum ara: era mun ago ipjin nesganimtara ara um esjilid an nij; era ika ara eri eti adumoij pam ara.

⁴ Kis ika ainyak, Era idim tup atimi ara sji igki; et ti lelra ara: vaig inig nikavaig, era eti ato nedo o Ihova ara, im nedo atoh o Atua ura.

⁵ Ekpu apan ehele ilpu atimi alupas ainyak, um tas ehele ra; vaig inig nikavaig, era mun ato nedo o Ihova ara, im nedo atoh o Atua ura: ja era mun ehrahtasvi ehni nitai ahelwei ura ara sji igki, um asjamud niji itai arore ra.

⁶ Va nitai inigki etpu atgei ra laion ahes an nesei, etpu atoraliak itai ura a kuri aleg an namasacen, etpu imiiris niji maliyum ura a lepart: uhpu ces yi oplecoplec ra asega erupu apan itac ara: vaig inig nikavaig, et ahinag nedo imipalea ura, et lep esjilid nedo has ura.

⁷ Et ehka vai nyak par ohpodohpod nedo has unyimia va nitai inigki; era mun udei nyak a ilpu hal unyimia, um asig yi aktit intas vai ra sji igki era eti atua ara: kis wat alaa ra upene nitai caig ainyak, eris ago ingeijid ara, um asjapicnaig irai eom u ilpu takata has, eris ahinag ara.

⁸ Era mun idivaig hors atamaig an nuhialeg ara: era mun ilmu ara asega vai ehgai ilpu atimi eblaamnem ura, athi um athi ehni.

⁹ Et ika a Ihova, Ekpu idim aru ira ra ainyak va nitai iji igki; ekpu lep aru ainyak vai nup urau pece et uce nedo ura.

¹⁰ Akumu aridjipan aijaua irai athatahau o un, um alcapdicraig; jam jim auahas ehni: akumu iknipagki niji eom emda o un aijaua, et idim eti ohuun ra a Ihova.

¹¹ Et ika a Ihova, Era mun ago nedo efaifa esjilid vai nyak a nup Isreel im nup u Juta.

¹² Eris ateri Ihova ara, um ika, Et ti aien; inyi eti yetpam irama nitai has; ecrupu idim eti ecetai nedoa ka numlaig has aijama:

¹³ erupu idivaig intakitai a ilpu profeta, et eti amen ehele ra intas o Atua: uhpu ago ira ra inyi uce.

¹⁴ Et ika a Ihova Atua esjilid acen, Vaig inig nikavaig, eka mun idim asaig intas inigki aijaua, namu ato aiek mika, ekpu ago intas unyak an nipjineucsem ainyak et idivaig incap, im lep nup igcaki et idivaig incai, mika yi atnamud ra.

¹⁵ Et ika a Ihova, Ak nup Isreel, ekpu imiapam nup uran pece itac acen ainyak par aat iramia: era emda a nup uran pece iyehki; eris eteuc itu acen ara, akupu eti ato intas ura aijaua, akupu eti ato aijaua mika era asaig inhe ara.

¹⁶ Et idivaig netheso eris eti athei incedpoi efana ura, era ilpu atimi emda ara asega.

¹⁷ Erupu auahas niji ohwai itai unyimia im niji itai hegaig unyimia ara; erupu auahas ilpu halav atamaig unyimia im ilpu halav atahig unyimia ara; erupu auahas siip unyimia im kurimatau unyimia ara: erupu auahas vaine unyimia im nateg unyimia ara: erupu ati nedoa ara, um atoraliak itai irai maliyum emda iji ig unyimia akis asgeig iran aijaua.

¹⁸ Ja, et ika a Ihova, ekpu eti auahas ehni caua ainyak au nopan iyehki.

¹⁹ Im lep inig, aku wit ika aijaua, Et mun ago nitai iji igki asega vai caija a Ihova Atua uja vanhe? napu ika aiek ehele ra, Eka mun udei nyak aijaua um aheca u ilpu atmas u atimi an taka pece an pece unyimia, etpu idim uco, akupu aheca u ilpu atimi et eche aijaua an pece iyehki et ti unyimia.

²⁰ Akumu asaig intas inigki aijaua ehele ilpu mapoi Jekob, um asuptecnaig an pece Juta, um ika,

²¹ Akumu atahaijeg intas inigki aijaua, ak ilpu atimi auatatimi, et ti lelmia aijaua; et eteuc nesganimtamia, ja eka eti alum itai aijaua; et eteuc intikgamia, ja eka eti atahaijeg itai aijaua:

²² et ika a Ihova, Eka imtitaig nyak aijaua,ka oʼo? akupu eucjeucjeucaij aijaua an nuhup unyak, ka oʼo? ainyak aigki, kis ati nauanavig ainyak mika yi atapnes injap an tas alep unyak irai iji mesese, et ehka par ahtaregdei: et agrei niji epeau, ja era auatialidi; et auoc injap, ja et ehka par ahtaregdei.

²³ Ja era imipalea a nup igcaki um adumoij pan itac an liinmopora; era mun imipalea ara um atga ura.

²⁴ Era lep eti ika ara an liinmopora, Va nitai inigki intumu imtitaig Ihova Atua uja akaija, aien aigki et alupai caija incopda aien, incopda uhup im incopda apitac marom, an nopan o un: et lep aminjinaig vai caija aien niji opan eris ati par asjapicnaig nohwai itai iran.

²⁵ Et mun imiadumoij pam nitai iji igki nedo acalacal unyimia, et mun lep atapnes niji itai upene vai caua nedo has unyimia.

²⁶ Era amen a ilpu atimi auatatimi irai ilpu atimi unvak: era atpaijinai atimi ara, et idivaig ilpu atimi ahilek man; era ati nitai apro atirai ara, era lep arop ira atimi ara.

²⁷ Et idim ohua nedo efaifa irai iyum ura, et idivaig et ohua niji man an naratga ura: va nitai inigki era atimi alupas ara, um atimi ikni itai.

²⁸ Era idim alupas ara, um athod: maiya, era lep esjilid irai ilpu atimi auatatimi ara va nedo has ura: era eti atahaijeg upene intas ara, intas u ilpu umnij marom, ja era amen upene ara; era lep eti atahaijeg upene intas o ilpu ihki atimi ara.

²⁹ Et ika a Ihova, Ekpu idim ara ira ra ainyak va nitai iji igki; ekpu idim ara ainyak vai nup uran pece et uce nedo ura.

³⁰ Era mun ago an pece inigki ara nitai inig er imiali vaig, er lep amcel vaig.

³¹ Era mun asuptecnaig intas ahcil a ilpu profeta, era mun atau ira ra a ilpu atimi ahlap; era lep merit vai nedo inigki a ilpu atimi unvak: ja aki ago inhe aijaua an nehni o un?