Jeremaia 49 - Intas Etipup

NUARIN TAS ALUPAS 49.

1 Neruvaig irai nup Amon. 6 Eh imiadumoij pam ra. 7 Neruvaig irai nup Itom, 23 irai nup u Tamaskus, 28 irai nup u Kitar, 30 irai nup u Hesor, 34 irai nup Ilam. 39 Eh imiadumoij pam nup Ham.

¹ INTAS vai nup Amon nigki; et ika a Ihova, Era eti eteuc a ilpu halav atamaig u nup Isreel, ka oʼo? era eti eteuc a ilpu atimi asjeupigmoig ra, ka oʼo? et a uri a Milkom par ohuun inpece Cat, im ilpu atimi o un par amen irai iji maliyum iran?

² Et ika a Ihova, Va nitai inigki etpu idim yetpam nopan iyehki, Ekpu ika ainyak eri ahgei naunyauwaig an nedoa Raba u nup Amon; etpu idivaig nijih irai itai inmaliyum iyehki um ahyuahyu, uhpu atnamud niji maliyum haklin o un an cap: ja et ika a Ihova, erupu asjeupigmoig ra sji igki a nup Isreel eris uhup ara um asjeupigmoig ra.

³ Akumu aunyauwaig aijaua, ak nup u Hesbon, eh mun idim auahas nup Eai: akumu ehtigtaig aijaua, ak nup urai iji maliyum haklin u Raba, um aso caua ira apelumai uucai; akumu aunyauwaig aijaua, um athut jipe iraili irahed; vaig inig nikavaig, uhpu imiapan Milkom an taka pece, erupu lep ehrahced yin a ilpu atimi alaacan im ilpu atimi alupas o un.

⁴ Eka a uri aijaua, ak ilpu atimi imipalea, par tas ijinies vai niji iskanse, niskanse esjilid unyimia marom? eka tas ijinies vai inpadiaig unyimia aijaua, um ika, Etpu yetpam iraija a di?

⁵ Et ika a Natimarid Ihova esjilid acen, Akumu ato aijaua mika, ekpu ika ainyak akupu imtitaig alupas aijaua vai ra sji igki asega era amen ehelemia ara; uhpu ahau pan caua an nuhup ura, athi um athi ehni; etpu eti eteuc tah par asjapicnai ra sji ig era melga ara.

⁶ Ja, et ika a Ihova, etu wit ti pan itac nitai iji igki, ekpu lep imi adumoij pam ilpu ohna u nup Amon ainyak.

⁷ Intas vai nup Itom nigki; et ika a Ihova esjilid acen, Et mun eti lep eteuc narapakau Timan, ka oʼo? et mun udei ilpu atimi arapakau naktaktai upene ura, ka oʼo? et mun tup tiih pan narapakau ura, ka oʼo?

⁸ Akumu ahapan aijaua, ak nup u Titan, um atidjimia, um amen irai mai ij uhca; ekpu imiapan ehele nup Itom nohocred ura ainyak, nopan inig marom ekpu aru nedo ura ainyak.

⁹ El era apam ehelemia a ilpu atimi aldei nohwai vaine, el era tup udei hal ohwan era eti merit vaig ara; el era apam ehelemia a ilpu atimi ehneg itai an nepig, el era atoraliak itai ara iji ig era merit vaig ara.

¹⁰ Ja ek mun ahilek ehni itai u nup Itom ainyak, ek mun ehvaig niji uarin adenaig ura ainyak, etpu ehka vai ra par adenai ra: eh mun auahas ilpu hal ura, im ilpu etwara, im ilpu atimi eblaamnem ura, era idim tup ti ara.

¹¹ Akumu udei ilpu umnij unyimia aijaua, ekpu imiatamai ra ainyak mika eri umumoh ara; erumu asgeig irak a ilpu takata unyimia eris emesmas a ilpu atamnyu ura.

¹² Et ika a Ihova, Akumu ato aijaua mika, era mun idim umwig an nipjinitai inigki ara sji igki eris idim ika eri jim umwig ara; akupu eti leh tah neruvaig aijaua, ka oʼo? akupu idim leh neruvaig aijaua, akupu idim umwig an nipjinitai inigki aijaua.

¹³ Et ika a Ihova, Ek mun asig yi aktit intas ainyak vai nyak mika, etpu idivaig nitai imiali Bosra, im nitai imiafakahcil, im nuarin ahyuahyu, im nitai er asaig intas ahlaijaig vaig; etpu ahyuahyu niji maliyum asega iran um yetpan irai iji mesese.

¹⁴ Ek mun atahaijeg intas ainyak et ahes ehele Ihova, eris lep abraig pan tah natimi asuptecnaig intas ehele nup urai iji pece, um ika, Akumu asjapicnaig caua aijaua, um apam um aat ira ra, um atidai par ati nedoa.

¹⁵ Akumu ato aijaua mika, ek mun ika ainyak, eka takitai aijaua ehele nup urai iji pece, er amcel vai caua ehele atimi.

¹⁶ Et mun imiahnag caua nedo unyimia er imtitaig vaig, et ijinies inliinmopomia aijaua, ak ilpu atimi amen irai mai ij, um ohuun nuarin ijinies an nedoon: et ika a Ihova, El eka ago asiom unyimia an nuarin ijinies acen et idivaig inmeijcop alupas, ekpu erekhaigse caua eahki ainyak.

¹⁷ Etpu idim umaruma inpece Itom: erupu imiali ara asega, erupu atga pan o un ara, um ika, Awe, awe, vai niji itai has asega iran!

¹⁸ Et ika a Ihova, Et idivaig eris wat auahas Sotom im Comora, im niji maliyum ubutpotet pan o un, etpu eti amen iran tah natimi, uhpu eti ecetai tah inhal u natimi eahki.

¹⁹ Akumu ato aijaua mika, etpu aridjipam aien et idivaig laion et wat ahes an nuarin ahgarero nofowai Jortan aien, um aat an nuarin amen iran u ilpu atimi emda; ja ekpu ika ainyak yi fi auroauro aien um aat iran: ja et atimi esjilid a di mika yi imiaras ra? Et idivaig nyak a di? etpu tas alep ehelek a di? im lep natimi asgi siip yek eda et emda aien par imiisjis ehelek?

²⁰ Va nitai inigki akumu atahaijeg intas o Ihova aijaua, et mun asaig aien vai nup Itom; im intas anacanac o un is anacanac aien vai nup u Timan: um ika, Erupu idim ahau pan ra a ilpu ihki atimi an pak an nedoa o un; etpu idim ika aien yi ahyuahyu niji uarin amen iran ura.

²¹ Et amaamai nobohtan an motjai neropropse ura, er ahgei inmotjai nahlaig ura an jap Cap.

²² Akumu ato aijaua mika, etpu aridjipan aien et idivaig inmeijcop alupas um ae pan, um elgelgei nehpan ehro ijinies an maliyum Bosra: an nopan iyehki etpu auatialidi inliinmopoi ilpu atimi emda an pece Itom, um idivaig inliinmopoi intakata inig et ika aien yi apos inhal o un.

²³ Intas vai nup u Tamaskus nigki. Era ehcamai a nup u Hemad, im lep nup Arpat: era mun idim ahgei intas has ara: et auatialidi inliinmopora ara; et idivaig injap nohocred ura, et ehka naropse vaig.

²⁴ Era arici a nup u Tamaskus, era mun ahidai ra ara mika eri ahapan, era imtitaig alupas ara, um ohocred, um etehto, um idivaig intakata inig et ahka aien um ika yi apos inhal o un.

²⁵ Et echamecha era mun eti tup udei inmaliyum inig eris imiahpas ara, inmaliyum inig ek imiacitak vaig ainyak!

²⁶ Va nitai inigki, et ika a Ihova, an nopan iyehki erupu eropropse a ilpu takuras ura irai iji efalaig iran, uhpu lep atgei ilpu eucsupo asega.

²⁷ Ekpu adnan cap ainyak an nathatahau u Tamaskus, etpu atnamud niji imnim atimi u Benhetat.

²⁸ Intas vai nup u Kitar nigki, im lep vai nup urai elcau iji ig u Hesor etpu auahas a Nebukatnesar natimarid an pece Babelon. Et ika a Ihova, Akumu atidai aijaua, um apan Kitar, um auahas nup uran pece an ridjai o un.

²⁹ Erupu imiaha niji eom atga ura ara, im niji pak irai siip ura, im lep niji apelumai adahpoi eom ura, im niji ipjinitai asega ura; erupu lep imiaha niji kamela ura ara vai ra; erupu ahlaig ehele ra ara, um ika, Er imtitaig marehed mihtag.

³⁰ Et ika a Ihova, Akumu ahapan aijaua, ak nup u Hesor, um apan itac acen, um amen irai mai ij uhca; vaig inig nikavaig et mun aktaktai an liinmopon vai caua a Nebukatnesar natimarid an pece Babelon, et mun asan tas anacanac vai caua aien.

³¹ Et ika a Ihova, Akumu atidai aijaua, um yetpan ehele nup urai pece ikni itai iji ig era amen ara jam eti imtitaig, et eti eteuc ehele ra niji itai atapnes im niji itai ago ipjin itai atapnes, era echim amen ara.

³² Uhpu atoraliak niji kamela ura, uhpu lucsei niji itai eklim edo irai pece ura et ahinag an nedoa: et ika a Ihova, Ekpu imiterimterim ra sji igki ainyak irai iji imtinjap asega era amen irai iji ilpui pece ara; ekpu lep imiapam nohocred vai ra ainyak etpu ahes irai iji uarin asega iran.

³³ Etpu umaruma Hesor, etpu amen an pece iyehki nimyeuv irai iji mesese: inyi eti amen iran tah natimi, maiya, inyi eti tup amen iran tah inhal u natimi.

³⁴ Is wat atupun a Setekaia ura atimarid an pece Juta, is ahes ehele Ihova intas inigki vai nup Ilam, um yetpam ehele Jeremaia naprofeta, um ika,

³⁵ Et ika a Ihova esjilid acen; Akumu ato aijaua mika, ekpu ahtasvi niji ceen nefana u nup Ilam ainyak, nuarin esjilid an nemda ura marom.

³⁶ Ekpu imiapam vai nup Ilam ainyak niji imtinjap et for etpu ahes an nesvi va nohatag et for, ekpu lep imiterimterim ra ainyak an nuhup u nimtinjap iji igki ase-ga; etpu eti eteuc tah inpece inig erupu eti apan iran a ilpu ohna u nup Ilam.

³⁷ Et ika a Ihova, Ekpu ika ainyak eri imtitaig a nup Ilam an nuhup u ilpu atimi tak atimi ira ra, im lep an nuhup u ra sji igki era ika ara eri atgei ra ara: ekpu lep imiapam nohocred vai ra ainyak, nedemda alupas unyak marom; ekpu lep ati nedoa ainyak par apitac ra, um auahas ehni ra.

³⁸ Et ika a Ihova, Ekpu ati natimi alupas unyak ainyak an pece Ilam, ekpu auahas ilpu atimarid im ilpu atimi alupas eahki ainyak.

³⁹ Et ika a Ihova, An nopan iyehki ekpu lep imiadumoij pam ilpu ohua u nup Ilam ainyak.