Jeremaia 48 - Intas Etipup

NUARIN TAS ALUPAS 48.

1 Neruvaig irai nup u Moab, 7 va nijinies u inliinmopora, 11 va neti aktaktai ura, 14 va nasgeig ira nemda ura, 26 im lep vai intas imiafakahcil ura vai Atua im ilpu atimi o un. 47 Eh imiadumoij pam nup u Moab.

¹ INTAS vai nup u Moab nigki; et ika a Ihova esjilid acen, Atua u nup Isreel; Kaiheuc vai nup u Nibo! eh mun atoraliak itai ura: era ehcamai a nup u Kirjadeem, eh mun arop ira ra: era ehcamai a nup u Miscab um imtitaig.

² Uhpu eti lep imiahpas nup u Moab: era mun aktaktai nitai has par ago vai ra a nup u Hesbon, um ika, Ti apan akaija, um iknipagki ra, mika eri jim up urai pece ara. Im lep inig, uhpu atgei caua, ak nup u Matmena; etpu lep apitac caua nedoa.

³ Uhpu ahgei naunyauwaig u nup u Horoneem, uhpu atoraliak itai ura, uhpu auahas alupas ra.

⁴ Eh mun auahas nup u Moab; er ahgei intaig u ilpu halav haklin ura.

⁵ Eru wit aridjipan Luhid ara erupu ehtigtaig alupas ara; eru wit asuol Horoneem ara erupu ahgei naunyauwaig u ilpu atimi ohocred a ilpu atimi tak atimi ira ra.

⁶ Akumu ahapan aijaua, um imiatamaig caua, um idivaig incai inig an namasacen et eti eteuc nerin.

⁷ Vaig inig nikavaig, eka mun asgeig irai auritai unyimia aijaua im inpadiaig unyimia, uhpu idim arop iramia: uhpu imiapan Kimos an taka pece, erupu ehrahced yin a ilpu atimi alaacan im lep ilpu atimi alupas o un.

⁸ Erupu apam irai iji maliyum a ilpu atimi atoraliak itai, erupu apam irai iji maliyum asega ara: erupu atiih a nup urai iskanse: uhpu lep auahas nup urai uarin marara, et idivaig intas o Ihova.

⁹ Uhmu alupai nup u Moab niji ehpara, mika eri ae um ahapan: etmu ahyuahyu niji maliyum ura, etmu jim amen tah natimi iran.

¹⁰ Uhmu asan tas ahlaijaig va natimi inig et ago nauritai u Ihova aien jam efaifa, uhmu lep asan tas ahlaijaig va natimi inig et atapnes nij va atimi o un aien vai yi jim atgei atimi.

¹¹ Eris amen upene a nup u Moab ahes an nopan iyehki itu acen, eris atumop ara irai iji itai upene ura, eris eti lucsei nohocred ara, eris eti imiapan ra an taka pece: va nitai inig is tup ethi ache nedo ura, is lep eti eche namen ura.

¹² Ja et ika a Ihova, Etpu yetpam nopan iyehki ekpu abraig pan ehele ra ilpu eucsupo iji ig ainyak, erupu imiapan ra an taka pece ara, erupu auahas niji maliyum ura ara, um ika yi amasacen inpece ura.

¹³ Erupu ehcamai vai Kimos a nup u Moab, et idivaig eris ehcamai vai Bedel a nup Isreel, eris asgeig pan iran ara.

¹⁴ Eka evika aijaua, Ecra emda aijama um atimi eucsupo vai nedoa?

¹⁵ Et ika a Natimarid inig et idan Ihova esjilid acen, Et mun aridjipan a natimi inig, etpu auahas nup u Moab aien im niji maliyum ura; era mun asuol a ilpu takuras esjilid o un mika eri atgei atimi.

¹⁶ Era ubutpotet ara sji igki, erupu auahas nup u Moab ara, et lep auroauro nohocred ura par apam.

¹⁷ Akumu imitaig ra aijaua asega eka amen ehele ra aijaua; akumu lep ika aijaua asega eka ato ra aijaua, Et echamecha eh mun auahas ilpu atimarid emda, im ilpu atimi alupas esjilid?

¹⁸ Akumu asuol aijaua, ak nup u Taibon, udei natimi alupas unyimia, um ateuc an nobohtan inig et eti inwai iran; vaig inig nikavaig, etpu yetpam iramia a natimi inig et mun auahas nup u Moab aien, etpu lep auahas niji imnim emda unyimia aien.

¹⁹ Akumu aiji an nahaijin nefa-laigaijaua,ak nup Aroer, um iaspan; um ahodai natimi inig et athut pan aien, im intakata inig et ahapan aien, um ika, Eris mun ago inhe?

²⁰ Era ehcamai a nup u Moab; vaig inig nikavaig, eh mun imiasuol ra: akumu aunyauwaig aijaua um ehtigtaig; akumu asuptcenaig aijaua Amon, um ika eh mun auahas nup u Moab.

²¹ Et mun yetpam neruvaig irai nup uran pece marara; irai Holon, im lep Jahesa, im lep Mifead,

²² im lep Taibon, im lep Nibo, im lep Bed-tibladeem,

²³ im lep Kirjadeem, im lep Bed-cemul, im lep Bed-mion,

²⁴ im lep Keraiod, im lep Bosra, im lep irai maliyum asega an pece Moab, ubutpotet im lep itac acen.

²⁵ Et ika a Ihova, Eh mun atipagki natimarid an pece Moab, eh mun auahas ilpu eucsupo ura.

²⁶ Akumu ika aijaua eri idivaig ilpu atimi ahnag vai kava a nup u Moab: eris asan tas ijinies vai Ihova ara: erupu lep ereuc ara irai itai era alo iran ara, erupu lep imiafakahcil ra natimi.

²⁷ Akis idim imiafahahcil nup Isreel aijaua, ak nup u Moab; akis asaig intas ijinies vai ra aijaua, um auhohaig nidjinimia et idivaig vai ilpu atimi ehnegitai.

²⁸ Akumu udei niji maliyum unyimia aijaua, ak nup u Moab, um amen irai mai ij, um ago nedo et idivaig nalaupa inig et ago nasiom o un an nahaijin nohmun isas.

²⁹ Ecra atahaijeg aijama mika, et ijinies inliinmopoi nup u Moab, et akrai nesganimtara ara um esjilid, um lep ijinies inliinmopora; era tas ijinies ara, era ispara tas ara.

³⁰ Et ika a Ihova, Ek ato ainyak nedemda alupas u nup Moab ja et takitai; erupu eti ago ara et idivaig intas ahcil ura.

³¹ Va nitai inigki ekpu aunyauwaig ainyak vai nup u Moab, ekpu taig ainyak vai nup u Moab asega; ekpu imitaig nup u Kirharesed ainyak.

³² Ekpu taig ainyak va caua, ak nup u Sibma, et idivaig intaig vai nup u Jesar: eh mun imiapan ilpu hal unyimia irai iji hakli pece an jap, ja eris imiapan nup u Jesar um yetpan an jap ache: et mun ham a natimi auahas itai, um atgei ilpu takuras unyimia im ilpu eucsupo unyimia.

³³ Uhpu atipagki nimiacitak im incediaig irai iji uari pece upene, an pece Moab marom; ek mun ika ainyak inyi eti eteuc nide vaine irai itai ahtaijiraig nohwai vaine iran: erupu eti auwihise nohwai vaine natimi um aunyauwaig; etpu takitai naunyauwaig ura.

³⁴ Er ahgei naunyauwaig ura ahes Hesbon um yetpan ehele Eliale, er ahgei nohrara um yetpan ehele Jehas, et lep ahes Soar um yetpan ehele Horoneem, et idivaig kurimatau atahig et eteuc iran inmesese et dri: etpu idim umaruma niji wai Nimrim.

³⁵ Et ika a Ihova, Ekpu ika ainyak inyi eti eteuc an pece Moab natimi inig et ahlap an nitai ahlap o un aien an nuarin ijinies, im natimi inig et atnamud nitai auanipin upene aien vai ilpu atmas oun.

³⁶ Va nitai inigki etpu taig inliinmopok ainyak vai nup u Moab et idivaig inhutlavlav, etpu lep taig inliinmopok ainyak vai nup u Kirharesed et idivaig inhutlavlav: vaig inig nikavaig, et mun ti inpadiaig inig eris asjapicnaig ara.

³⁷ Etpu igpit nidjinira asega, uhpu ucsei ingeijira asega: uhpu attai nikmara asega, uhpu aso inwauahid ura ira apelumai uucai.

³⁸ Er ehtigtaig alupas irai iji lolan neom asega an pece Moab, im lep irai iji efalaig ura: et ika a Ihova, Ek mun auahas nup u Moab ainyak, et idivaig er ahtagrei nipjinitai inig er esjum vaig.

³⁹ Era mun aunyauwaig ara, um ika, Et echamecha eh mun imiasuol nup u Moab! et echamecha era mun atidjira ara, era mun ehcamai ara! erupu imiafakhcil nup u Moab ara asega era amen ehele ra ara um lep imtitai ra.

⁴⁰ Et ika a Ihova, Etpu idim ae pan tah inyi ethi et idivaig inmeijcop alupas, um elgelgei nehpan ehro ijinies an pece Moab.

⁴¹ Eh mun atoraliak niji maliyum, eh mun atcijaig niji imnim emda; an nopan iyehki etpu auatialidi inliinmopoi ilpu atimi emda u nup u Moab, um idivaig inliinmopoi intakata inig et ika aien yi apos inhal o un.

⁴² Uhpu auahas nup u Moab mika eri jim lep up uran pece, vaig inig nikavaig, eris tas ijinies vai Ihova ara.

⁴³ Et ika a Ihova, Etpu yetpam iramia, ak nup u Moab, nitai imtitag vaig, im nehpanitai, im nitai apro itai.

⁴⁴ Aien et ahapan vai nitai imtitaig vaig aien, etpu ee an nehpanitai aien; aien et ahes an nehpanitai aien um aridjai, etpu apro yin nitai apro itai: et ika a Ihova, ekpu imiapan ehele ra ainyak, ehele nup u Moab marom, inmesese inig an neruvaig nedo has ura.

⁴⁵ Eris aiji an naiyu Hesbon a ilpu ohna van pak an nedoa: ja etpu ahes irai Hesbon incap, etpu lep ahes irai Saihon juju nalaume u un cap, um auahas niji maliyum an pece Moab, im lep u ilpu atimi ehtauo.

⁴⁶ Kaiheuc vai caua, ak nup u Moab, eka idim atiih aijaua, ak ilpu atimi u Kimos: eh mun arop irai ilpu halav atamaig unyimia um imiapan ra irai iji taka pece, eh mun lep imiapan ilpu halav atahig unyimia irai iji taka pece.

⁴⁷ Et ika a Ihova, An tah nopan itu acen ekpu lep imiadumoij pam nup u Moab iji ig ainyak eh mun imiapan ra irai iji taka pece. Et mun ti intas va neruvaig vai nup u Moab.