Jeremaia 46 - Intas Etipup

NUARIN TAS ALUPAS 46.

1 Et asan tas upyi asaig a Jeremaia mika uhpu auahas inpak an nedoa u Fero u nofowai Yufretes, 13 um lep mika yi esjilid irai nup Ijipt a Nebukatnesar. 27 Et ago eropse inliinmopoi ilpu mapoi Jekob aien an nacaiji ra vaig.

¹ INTAS o Ihova inig is yetpam ehele Jeremaia naprofeta vai nup urai iji pece nigki;

² Intas vai nup Ijipt nigki, im lep van pak an nedoa u Fero-niko natimarid an pece Ijipt, eris amen u nofowai Yufretes ara i Karkemis, is ahau ra a Nebukatnesar natimarid an pece Babelon an mesese ford irai Jehoiakim inhal u Josaia natimarid au pece Juta.

³ Akumu esiaig niji itai atapnes unyimia aijaua im niji itai ahtaipup unyimia, um apan ubutpotet par ati nedoa.

⁴ Akumu arore niji hors unyimia irai jariot aijaua, um aridjai iran, ak ilpu atimi ateuc irai hors; akumu aiji aijaua irai cat adgaig unyimia, um ago naunau mopul unyimia, um aso caua irai apelumai u ilpu eucsupo.

⁵ Ek mun ecet ra ainyak par imtitaig vanhe? era mun ahidaig pam ra ara, eh mun erekhaigse ilpu atimi emda ura, era mun idim ahapan ara, era eti hedidai ra ara: et ika a Ihova, vaig inig nikavaig, eris imtitaig marehed mihtag.

⁶ Erumu jim aha a ilpu atimi athut emda, erumu jim ahapan a ilpu atimi emda; erupu epihtau ara, um eropropse an pece inig et ahes narutu iran u nofowai Yufretes.

⁷ Di nigki et aridjipam aien et idivaig inwai yah, et yah alupas inwai oun et idivaig niji ofowai?

⁸ Era aridjipam a nup Ijipt et idivaig nofowai, era athut pam ara et idivaig inwai yah; era ika ara, Intupu aridjipan akaija, intupu ataluopni inpece aikaija; intupu auahas inmaliyum inigki aikaija im lep ilpu atimi amen iran.

⁹ Akumu aridjai irai hois aijaua, um emda par ati nedoa; akumu athut jipe irai jariot aijaua; erumu lep apan itac a ilpu atimi emda; nikavaig, nup Idiopia im lep nup u Libya, era apos niji itai ahtaipup ara; im lep nup u Litya, era apos efana ara um aiyihi niji ceen nefana.

¹⁰ Nadiat u Natimarid nigki, nadiat u neruvaig nigki, et ahes ehele Ihova esjilid acen, mika yi leh neruvaig aien ehele ilpu atimi tak atimi iran: uhpu auahas ra an nedoa, uhpu atladwi alupas inja ira ra: vaig inig nikavaig, et eteuc nitai ahlap vai Ihova Natimarid esjilid acen an pece inig et ahes narutu iran u nofowai Yufretes.

¹¹ Namu aridjipan an pece Cileat aiek, um leh nitai auanipin upene, ak natahig, inhalav atahig u nup Ijipt: as ago inwai emehe is ahinag aiek, ja et takitai; napu eti cehcehe upene aiek.

¹² Era mun ahgei intas va nehcamai unyum a nup urai iji pece, et mun ohua intaig unyum an nobohtan: era mun epihtau a ilpu atimi emda vai ilpu atimi emda era mun ehreropropse ara.

¹³ Intas inig nigki is asuptecnaig a Ihova ehele Jeremaia naprofeta, va napam u Nebukatnesar natimarid an pece Babelon, mika yi auahas inpece Ijipt aien, nikavaig,

¹⁴ Akumu asaig aijaua Ijipt, akumu asuptecnaig aijaua Mictol, maiya, akumu asuptecnaig aijaua Nof, akumu efehtas aijaua Tahapanes: um ika, Namu aiji aktit aiek, namu amatata aiek; eh mun auahas ra sji ig an nedoa eris arehed iram ara.

¹⁵ Eh mun auahas natimi emda unyum van he? Is eti aiji aktit aien, vaig inig nikavaig, is auhaigse yin a Ihova.

¹⁶ Is ika aien eri epihtau natimi is ahinag, um lep eropropse jipe: va nitai inigki eris ika ehele ra jipe ara, Intumu atidai akaija, um adumoij pan ehele nup uran pece uja, im lep an pece inig eris apos caija iran, va nedoa et ago a natimi ehcerucai atimi.

¹⁷ Eris ahlaig ara eahki, Ak Fero natimarid an pece Ijipt, is eteuc nehtauo, um atapnes nasjapicnaig u atimi iji ig eris aniv ra.

¹⁸ Et ika a Natimarid inig et idan Ihova esjilid acen, Ek umoh ainyak, et eteuc Tebor irai edoon, im lep Karmel u unjap, etpu idim uco napam o un tah.

¹⁹ Namu asjapicnaig naga unyum aiek par apan an taka uarin, ak inhalav atahig na amen an pece Ijipt aiek: etpu ahyuahyu inmaliyum Nof um umaruma, etpu eti amen iran tah natimi.

²⁰ Et idivaig kurimatau esjilid inpece Ijipt, ja et ham nitai auahas itai; et ahes an pece inig et ahes narutu iran.

²¹ Era idivaig kurimatau alupas a ilpu eucsupo o un eris ahes irai taka pece um amen ehelen; ja era mun atidjira ara sji igki, era mun ehrahapan ara: eris eti aiji aktit ara, vaig inig nikavaig, is ham nadiat auahas ra, is yetpam vai ra nopan aru nedo ura.

²² Etpu ehcohos pan nohran um idivaig nohrai imyeuv; erupu ebraham ara im inpak an nedoa ura, erupu aat iran ara um apos pas, um idivaig ilpu atimi attai cai.

²³ Et ika a Ihova, Erupu attai nesei o un ara, ja et ehka par esvi niji cai iran; vaig inig nikavaig, et idivaig niji heled jam esjilid, et ehka nesvi vaig.

²⁴ Et ehcamai a inhalav atahig u nup Ijipt; eh mun atcijaig yin an nikmai nup uran pece inig et ahes narutu iran.

²⁵ Et ika a Ihova esjilid acen, Atua u nup Isreel; Akumu ato aijaua mika, ekpu aru nedo o Natmas esjilid an maliyum No ainyak, im nedo o Fero, im lep nedo o nup Ijipt, im ilpu atmas ura, im ilpu atimi alupas ura; Fero marom, im ilpu atimi asega iji ig era asgeig iran ara:

²⁶ ekpu atcijai ra ainyak an nikmai ilpu atimi iji ig era ika ara eri atgei ra, an nikmai Nebukatnesar marom natimarid an pece Babelon, im lep an nikmai ilpu aheca o un: ja par apitac, et ika a Ihova, erupu amen iran natimi, et idivaig itu acen.

²⁷ Ja akumu jim imtitaig aijaua, ak ilpu aheca unyak ilpu mapoi Jekob, akumu jim etehto aijaua, ak nup Isreel: akumu idim ato aijaua mika, ekpu imiatamaig caua ainyak an pece itac acen, im lep ilpu hal unyimia an pece inig eris imiapan ra eahki; erupu adumoij pam a ilpu mapoi Jekob um atumop, erupu amen upene ara um eti imtitaig vaig tah.

²⁸ Et ika a Ihova, Akumu jim imtitaig aijaua, ak ilpu mapoi Jekob ilpu aheca unyak: et idim amen ehelemia ainyak; ekpu auahas ehni nup urai pece asega iji ig ainyak ek mun ahau pan caua iran ainyak: ja ekpu eti auahas ehni caua ainyak, jam aru nedo unyimia um eti alupas, um eti ika yi umaruma ehni inpece unyimia.