Jeremaia 45 - Intas Etipup

NUARIN TAS ALUPAS 45.

1 Et wat imtitaig a Beruk, 4 et esege imi yin a Jeremaia um ago eropse inliinmopon.

¹ INTAS inig is asaig a Jeremaia naprofeta ehele Beruk inhal u Niraia nigki, is wat aged intas iji igki a Beruk an nitaasviitai is asaig a Jeremaia, an mesese ford irai Jehoiakim inhal u Josaia natimarid an pece Juta, um ika,

² Et ika a Ihova, Atua u nup Isreel, vai euc, ak Beruk:

³ As ika aiek, Awe, kaiheuc vai nyak! Et mun ehcilpun nohocred ehele intaig unyak a Ihova; ek auatialidi ainyak van lelesjai unyak, um eti ecetai nuarin atumop imi nyak.

⁴ Namu ika aiek ehelen, Et ika a Ihova, Namu ato aiek mika, ekpu alcapdicraig nitai inig ainyak ek mun uctaig ainyak, ekpu lep atecrei nitai inig ainyak ek mun ahwaig ainyak, inpece inigki asega marom.

⁵ Na ahilek niji itai alupas vai euc aiek, ka oʼo? namu jim ahilek aiek: vaig inig nikavaig, et ika a Ihova, Namu ato aiek mika, ekpu imiapam nohocred vai atimi asega ainyak: ja ek ika ainyak napu umoh aiek irai uarin asega iji ig napu apan iran aiek, intup naiheuc u Atua vai euc nigki.