Jeremaia 44 - Intas Etipup

NUARIN TAS ALUPAS 44.

1 Et asuptecnaig a Jeremaia mika et ahyuahyu inpece u nup u Juta va nedo apat ura. 11 Et asan tas upyi asaig aien mika, uhpu auahas ra ji igki era ago nedo apat ara an pece Ijipt. 15 Nedo ipjin u nup u Juta. 20 Et asan tas eduahpan ehele ra vaig a Jeremaia. 29 Et asan tas upyi asaig aien mika uhpu auahas nup Ijipt, nitai asjaaicnaig imi ra nigki.

¹ IS yetpam intas inigki ehele Jeremaia vai nup u Juta asega iji ig eris amen an pece Ijipt ara, im lep ra eris amen Mictol ara, im lep Tahapanes, im lep Nof, im lep an pece Pedros, um ika,

² Et ika a Ihova esjilid acen, Atua u nup Isreel; Eka mun almoi nohocred asega inig aijaua, ek mun imiapam ainyak vai nup u Jerusalem, im lep vai nup urai maliyum asega an pece Juta; et idim ahyuahyu inmaliyum iji igki an nadiat inigki, et eti amen tah natimi iran,

³ va nedo has inig ura, eris ago ara par auahas inliinmopok, nikavaig, eris apan ara par atnamud nitai auanipin upene vai ilpu atmas irai taka pece iji ig, um aheca ura, eris eti ato ra ara, ara marom, im lep aijaua, im lep ilpu retpomia.

⁴ Ja kis abraig pan ehelemia ainyak ilpu aheca asega unyak, ilpu profeta marom, kis atidai ainyak an nuhialeg um abraig pan ra, um ika, Ek ugyi caua ainyak, mika aki jim ago nedo has esjilid inig aijaua ek amcel vaig ainyak.

⁵ Ja eris eti atahaijeg ara, um eti atgeig pam intikgara, par adumoij pam vai nedo has ura, um udei par atnamud nitai auanipin upene vai ilpu atmas irai taka pece.

⁶ Va nitai inigki eris atladwi intavaitap unyak im nedemda unyak, is lep ere um aat irai maliyum an pece Juta im lep irai efalaig Jerusalem; eh mun auahas, et lep ahyuahyu, et idivaig an nopan inig.

⁷ Va nitai inigki et ika a Ihova Atua esjilid acen, Atua u nup Isreel; Eka a uri aijaua par ago nedo has esjilid inigki vai nesgamia, um ika eri emesmas a ilpu atamaig, im ilpu takata, im ilpu halav, im ilpu hadi, irai nup u Juta, inyi eti amen tah nahrin iramia;

⁸ eka auahas inliinmopok aijaua va nauritai unyimia, nikavaig, eka atnamud nitai auanipin upene aijaua vai ilpu atmas nai taka pece an pece Ijipt marom, eka amen iran aijaua, mika eri atgei caua, im lep mika aki idivaig nitai er asaig intas ahlaijaig vaig aijaua im nitai imiafakahcil ehele nup urai iji pece asega an nobohtan?

⁹ Eka mun idim eti ahnag an nedo has u ilpu retpomia aijaua, im nedo has u ilpu atimarid an pece Juta, im nedo has u ilpu ehnaa ura, im nedo has unyimia, im nedo has u ilpu ehnaa unyimia, eris ago ara an pece Juta, im lep irai efalaig Jerusalem.

¹⁰ Et mun eti upoupo inliinmopora ara um yetpam an nopan inig, era mun eti ecen vai nyak ara, um eti imiaiji intas alep unyak, im intas unyak iji ig kis ikni ainyak an nuhup unyimia, im lep an nuhup u ilpu retpomia.

¹¹ Va nitai inigki et ika a Ihova esjilid acen, Atua u nup Isreel; Ekpu alum caua ainyak mika aki ohocred aijaua, ekpu lep atgei nup u Juta asega ainyak.

¹² Ekpu lucsei ilpu ahri nup u Juta iji ig ainyak, era mun imiisjis ara par apan au pece Ijipt mika eri amen eahki ara, uhpu auahas ra asega an pece Ijipt; uhpu atgei ra an nedoa, uhpu auahas ra an numlaig has: erupu emesmas ara an nedoa, im lep an numlaig has, ahes irai ilpu atimi alupas um yetpan ehele tup atimi: erupu idivaig nitai amcel vaig ara, im nitai imiali, im nitai er asaig intas ahlaijaig vaig, im nitai imiafakahcil.

¹³ Ekpu aru nedo o ra sji ig ainyak era amen an pece Ijipt ara, et idivaig kis aru nedo o nup u Jerusalem ainyak, an nedoa, im lep an numlaig has, im lep an mas alupas:

¹⁴ etpu eti ahapan tah, ka amen tah, irai ilpu ahri nup u Juta iji ig era yetpam an pece Ijipt ara mika eri amen igcaki, mika eri adumoij pan an pece Juta inig, era merit alupas ara mika eri adumoij pan mika eri amen eahki, erupu eti adumoij pan iran ara: erupu adumoij pan iran a ilpu atimi ahapan tup eseij ache.

¹⁵ Eris tas ehele Jeremaia a ilpu atimi asega iji ig eris ato ara mika eris atnamud nitai auanipin upene vai ilpu atmas irai taka pece a ilpu ehnaa ura, im ilpu takata asega iji ig eris aiji ubutpotet ara, natimi is ahinag, natimi asega iji ig marom eris amen Pedros ara, an pece Ijipt, um ika,

¹⁶ Ecrupu eti atahaijeg euc aijama vai intas inig na mun asaig aiek ehelema an nidai Ihova.

¹⁷ Ja ecrupu idim ago nitai asega iji ig aijama ecris asaig aijama, par atnamud nitai auanipin upene vai natmas atahig esjilid an nohatag, um atladwi niji itai ahlap er umnyi vai yin, et idivaig ecris ago aijama, im lep ilpu retpoma, im ilpu atimarid unyima, im ilpu atimi alupas unyima, irai maliyum an pece Juta, im lep irai efalaig Jerusalem: vaig inig nikavaig, ecris geije aijama an nopan iyehki an nitai caig, ecris amen upene aijama, um eti ecetai tah nohocred.

¹⁸ Ja ahes an nopan iyehki ecris eti atnamud nitai auanipin upene aijama vai natmas atahig esjilid an nohatag, um eti atladwi niji itai ahlap er umnyi vai yin, et mun ti imi cama niji itai asega, eh mun auahas cama an nedoa im lep an numlaig has.

¹⁹ Ecris wat atnamud nitai auanipin upene aijama va natmas atahig esjilid an nohatag, um atladwi niji itai ahlap er umnyi vai yin, eris idim atau imi cama a ilpu atamnyu unyima, par ago biskit par ahlap vai yin, um atladwi niji itai ahlap er umnyi vai yin.

²⁰ Is um tas a Jeremaia ehele atimi asega, nikavaig, ehele ilpu atamaig, im lep ilpu takata, ehele atimi asega iji ig marom eris asaig intas iji ehki ehelen ara, um ika,

²¹ Is idim imiehva um aktaktai vaig nitai auanipin upene iyehki a Ihova, akis atnamud aijaua irai maliyum au pece Juta, im lep irai efalaig Jerusalem, aijaua marom, im ilpu retpomia, im ilpu atimarid unyimia, im ilpu atimi alupas unyimia, im ilpu atimi an pece;

²² va nitai inigki is ehka vai Ihova par ago nedo eti auatiemda vai caua, va nedo has unyimia, im lep va nedo inig er amcel vaig, akis ago aijaua; va nitai inigki et umaruma inpece unyimia, um itai imiali, um lep itai er asaig intas ahlaijaig vaig, et eti amen tah natimi iran, et idivaig an nopan inig.

²³ Vaig inig nikavaig, eka mun atnamud nitai auanipin upene aijaua, um lep ago nedo has vai Ihova, um eti atahaijeg intas o Ihova, um eti imiaiji intas alep o un, im intas asaig o un, im intas asuptecnaig o un; va nitai inigki et mun yetpam ehelemia nohocred inigki, et idivaig an nopan inig.

²⁴ Im lep inig, is ika a Jeremaia ehele atimi asega, im lep ehele ilpu takata asega, Akumu atahaijeg intas o Ihova aijaua, ak nup u Juta asega eka amen an pece Ijipt aijaua:

²⁵ et tas a Ihova esjilid acen, Atua u nup Isreel, vai caua im lep vai ilpu ehnaa unyimia, um ika, Era mun tas ara irai ipjieucsemia, era lep ehneijid intas ura ara irai ikmamia, um ika, Ecrumu idim ehneijid intas upyi asaig unyima iji ig aijama, ecra mun upyi asaig aijama, par atnamud nitai auanipin upene vai natmas atahig esjilid an nohatag, um atladwi niji itai ahlap er umnyi vai yin: akupu idim ehneijid intas upyi asaig unyimia aijaua, um idim ago intas upyi asaig unyimia.

²⁶ Va nitai inigki akumu atahaijeg intas o Ihova aijaua, ak nup u Juta asega eka amen an pece Ijipt aijaua; et ika a Ihova, Akumu ato aijaua mika, ek mun asig yi aktit intas ainyak vai nidak alupas, um ika etpu eti lep aniv nidak tah nup u Juta an pece Ijipt asega, um ika, Et umoh a Ihova Natimarid.

²⁷ Akumu ato aijaua mika, ekpu atpaijinai ra ainyak mika eri amen an nohocred ara, jam eti amen upene: uhpu auahas nup u Juta asega iji ig era amen an pece Ijipt ara an nedoa, im lep an numlaig has, erupu atiih ara.

²⁸ Erupu ahes an pece Ijipt um adumoij an pece Juta nahaiji atimi eti elpat uhpu eti atgei ra an nedoa, ja erupu ato nitai inig a ilpu ahri nup u Juta asega iji ig era mun apam an pece Ijipt ara par amen iran, nikavaig, etpu amen aktit intas u di, unyak, ka ura.

²⁹ Et ika a Ihova, Etpu itai asjaaicnaig imi caua nitai inigki, mika ekpu aru nedo unyimia ainyak an nuarin inigki, mika aki ato aijaua, nikavaig, etpu idim amen aktit intas unyak vai caua aki has vaig aijaua:

³⁰ et ika a Ihova, Akumu ato aijaua mika, ekpu atcijaig Fero-hofra natimarid an pece Ijipt ainyak an nikmai ilpu atimi tak atimi iran, im lep an nikmai ilpu atimi iji ig era ika ara eri atgei yin; et idivaig kis atcijaig Setekaia natimarid an pece Juta ainyak an nikmai Nebukatnesar natimarid an pece Babelon, is atimi tak atimi iran aien, is lep ika aien yi atgei yin.