Jeremaia 43 - Intas Etipup

NUARIN TAS ALUPAS 43.

1 Et imipalea intas upyi asaig u Jeremaia a Johenan, ja et par imiapan Jeremaia im ilpu ahri atimi aien an pece Ijipt. 8 Et asan tas upyi asaig a Jeremaia an nitai asjaaicnaig mika eri esjilid irai nup Ijipt a nup u Babelon.

¹ IS wat asaig ehni a Jeremaia ehele atimi asega intas asega o Ihova Atua ura, is abraig pan yin vaig ehele ra a Ihova Atua ura, intas asega iji igki marom,

² eris tas ara sji ehki, nan, Asaraia inhal u Hoseaia, im Johenan inhal u Karia, im ilpu atimi asega is ijinies inliinmopora ara, um ika ehele Jeremaia, Na asan tas ahcil aiek: et mun eti abraig pam euc a Ihova Atua uja par ika, Akumu jim apan au pece Ijipt aijaua mika aki amen eahki aijaua:

³ ja et abraig pam euc vai cama a Beruk inhal u Niraia, par atcijaig cama an nikmai nup u Kaltia, mika eri atgei cama, ka arore cama um imiapan cama an pece Babelon.

⁴ Is uce is eti atahaijeg intas o Ihova a Johenan inhal u Karia, im ilpu atimi alupas asega u ilpu eucsupo, im lep natimi asega, par amen an pece Juta.

⁵ Ja is apan a Johenan inhal u Karia, im ilpu atimi alupas asega u ilpu eucsupo, um lucsei ilpu ahri nup u Juta asega, eris ahes irai iji pece asega ara, eris ahau pan ra iran, mika eri amen an pece Juta;

⁶ nikavaig, ilpu atamaig, im ilpu takata, im ilpu halav, im ilpu halav atahig u natimarid, im lep atimi asega iji ig is udei ra a Nebusaratan natimi alupas u ilpu eucsupo ehele Cetalaia inhal u Ahaikam inhal u Sefan, im lep Jeremaia naprofeta, im Beruk inhal u Niraia.

⁷ Eris par apan an pece Ijipt ara: eris idim eti atahaijeg intas o Ihova ara: eris um yetpan Tahapanes ara.

⁸ Is um yetpam intas o Ihova ehele Jeremaia Tahapanes, um ika,

⁹ Namu lucsei hat alupas an nikmam ero aiek, um adenaig an tan apol, an mun tan, an nimtidin an nimnim u Fero Tahapanes, an nuhup u nup u Juta;

¹⁰ um ika ehele ra, Et ika a Ihova esjilid acen, Atua u nup Isreel; Akumu ato aijaua mika, ekpu abraig pan hal ainyak um leh pam Nebukatnesar natimarid an pece Babelon, naheca unyak, ekpu ati nitai ateuc o un ainyak ijinies irai hat, iji igki ek mun adenaig ainyak; etpu ahled napelumai esjilid u neom atga o un aien um adahpoi inhat iji igki.

¹¹ Etu wit ham aien, etpu auud nup uran pece Ijipt aien, um atcijaig ra sji igki er ika eri emesmas ara mika eri emesmas ara; im lep ra sji igki er ika eri arore ra um imiapan ra an taka pece, mika uhpu arore ra um imiapan ra an taka pece; im lep ra sji igki er ika eri atgei ra an nedoa mika uhpu atgei ra an, nedoa.

¹² Ekpu adnan cap ainyak irai eom u ilpu atmas u nup Ijipt; etpu atnamud hal atmasimai aien, um imiapan hal ra an taka pece: etpu aso yin aien an pece Ijipt, et idivaig et ahelig pam yin a natimi asgi siip an napelumai itac o un; etpu ahes igcaki aien um atga o un an nigpa.

¹³ Etpu lep ahtagrei niji atmasimai an neom u nagesega aien an pece Ijipt; etpu lep atnamud niji eom u ilpu atmas u nup Ijipt aien an cap.