Jeremaia 42 - Intas Etipup

NUARIN TAS ALUPAS 42.

1 Et ugyi Jeremaia a Johenan mika yi ahodai Atua vai ra, um ika eri imiaiji intas o un. 7 Et asaig aktit a Jeremaia mika eri amen upene ara an pece Juta, 13 ja uhpu auahas ra an pece Ijipt. 19 Et acaiji ra aien vai intas efaifa ura, par ahodaig Ihova va nitai inig eris eti merit vaig ara.

¹ ERIS apam ubutpotet a ilpu atimi alupas asega u ilpu eucsupo, im Johenan inhal u Karia, im Jesanaia inhal a Hoseaia, im lep natimi asega ahes ehele ilpu atimi alupas um yetpan irai tup atimi,

² um ika ehele Jeremaia naprofeta, Namu idim adai intas unyima aiek, um alaigaheni vai cama vai Ihova Atua unyum, vai ilpu ahri atimi asega iji igki marom; ecris ahinag aijama jam eti elpat an nopan inig, et idivaig na alum cama aiek an nesganimtam:

³ mika yi asuptecnaig ehelema a Ihova Atua unyum nefalaig inig et upene vai cama par atga iran, im nedo inig et upene vai cama par ago.

⁴ Is um ika ehele ra a Jeremaia naprofeta, Ek mun atahaijeg caua ainyak; akumu ato aijaua mika, ekpu alaigaheni vai Ihova Atua unyimia ainyak et idivaig intas unyimia; im lep inig, ekpu asuptecnaig ehelemia ainyak intas asega i ji ig etpu asaig ehelemia a Ihova; ekpu eti adenaig tah nitai vai caua ainyak.

⁵ Eris um ika ehele Jeremaia ara, Etmu idivaig natimi asuptecnaig itai inveijec um atoh a Ihova an niblaija, el ecra eti ago aijama et idivaig intas asega iji ig etpu abraig pam euc vaig ehelema a Ihova Atua unyum.

⁶ El et upene, ka el et has, ecrupu atahaijeg intas o Ihova Atua uja inig aijama, ecra abraig pan euc ehelen aijama; mika yi upene vai cama, ecru wit atahaijeg intas o Ihova Atua uja aijama.

⁷ Is wat ti pan itac nadiat is ten, is yetpam intas o Ihova ehele Jeremaia.

⁸ Is um ahlaig vai Johenan inhai u Karia aien, im ilpu atimi alupas asega iji ig u ilpu eucsupo eris amen ehelen ara, im lep atimi asega ahes ehele ilpu atimi alupas um yetpan irai tup atimi,

⁹ um ika ehele ra, Et ika a Ihova, Atua u nup Isreel, aien ahki akis abraig pan nyak ehelen aijaua mika ki asuptecnaig intas ugyi unyimia an nuhup o un ainyak;

¹⁰ El eka idim amen an pece inigki aijaua, ekpu uctaig caua ainyak, um eti alcapdicraig caua, ekpu ahwaig caua ainyak, um eti atecrei caua: vaig inig nikavaig, ek adumoij an liinmopok ainyak va nohocred inig ek mun ati vai caua ainyak.

¹¹ Akumu jim imtitaig natimarid an pece Babelon inig aijaua, eka imtitaig yin aijaua; et ika a Ihova, Akumu jim imtitai yin aijaua: ekpu amen ehelemia ainyak par imiatamaig caua, um imiaras caua va nikman.

¹² Ekpu aiheuc vai caua ainyak, mika yi aiheuc vai caua aien, um ika aki adumoij pam aijaua an pece unyimia.

¹³ Ja el eka ika aijaua, Ecrupu eti amen an pece inigki aijama, um eti atahaijeg intas o Ihova Atua unyimia aijaua,

¹⁴ um ika, Oʼo: ja ecrupu apan an pece Ijipt aijama, ecrupu eti ecetai nedoa eahki aijama, um eti ahgei nohran toho, inyi eti ehtele cama an ti vaig u nitai caig; ecrupu idim amen eahki aijama:

¹⁵ va nitai inigki akumu atahaijeg intas o Ihova aijaua, ak ilpu ahri nup u Juta; Et ika a Ihova esjilid acen, Atua u nup Isreel; El eka idim imiisjis aijaua par apan an pece Ijipt, um apan mika aki amen eahki;

¹⁶ etpu uhum caua eahki an pece Ijipt nedoainig eka imtitaig vaig aijaua, etpu lep apitac caua eahki an pece Ijipt numlaig has inig eka taigtaig vaig aijaua; akupu lep emesmas eahki aijaua.

¹⁷ Etpu idim uco va atimi asega iji ig era imiisjis ara par apan an pece Ijipt mika eri amen eahki; erupu emesmas ara va nedoa, im lep va numlaig has, im lep vai inmas alupas: etpu eti amen tah et ethi um eti ahapan tah et ethi va nohocred inig ekpu ati vai ra ainyak.

¹⁸ Et ika a Ihova esjilid acen, Atua u nup Isreel; Ek mun idim atladwi nedemda unyak ainyak im intavaitap unyak vai nup u Jerusalem; et idim uco, ekpu atladwi intavaitap unyak ainyak iramia, aku wit yetpan an pece Ijipt aijaua: akupu idivaig nitai has aijaua, im nitai imiali, im nitai asaig intas ahlaijaig vaig, im nitai imiafakahcil; akupu eti lep almoi inpece inigki aijaua.

¹⁹ Intas o Ihova vai caua nigki, ak ilpu ahri nup u Juta; nikavaig, Akumu jim apan an pece Ijipt aijaua: akumu idim ato aijaua mika, ek mun acaiji caua ainyak an nadiat inigki.

²⁰ Eka mun ago nedo efaifa an liinmopomia aijaua, akis wat abraig pan nyak ehele Ihova Atua unyimia aijaua, um ika, Namu alaigaheni vai cama aiek vai Ihova Atua uja; um asuptecnaig ehelema intas asega iji ig etpu asaig a Ihova Atua uja, ecrupu lep ago aijama.

²¹ Ek mun idim asuptecnaig ehelemia ainyak an nadiat inigki; ja eka mun eti atahaijeg intas o Ihova Atua unyimia aijaua, ka tah nitai inig et mun abraig pam nyak vaig ehelemia aien.

²² Va nitai inigki akumu idim ato aijaua mika, akupu emesmas aijaua an nedoa, im lep va numlaig has, im lep van mas alupas, an pece iyehki eka merit aijaua par apan mika aki amen eahki aijaua.