Jeremaia 41 - Intas Etipup

NUARIN TAS ALUPAS 41.

1 Et ahiyek Cetalaia im lep hal ra a Ismeel um atgei ra, ja et par ika aien eri ehrahapan aien im ilpu ahri atimi um yetpan irai nup Amon. 11 Et imiadumoij pam ilpu atimi eris arore ra a Johenan, um aktaktai mika yi ahapan Ijipt.

¹ AN mohoc sevend is yetpan Mispa ehele Cetalaia inhal u Ahaikam a Ismeel inhal u Nedanaia, inhal u Elisama, is mapoi natimarid aien, im lep ilpu atimi alupas u natimarid, eris ahced yin natimi is ten; eris ehrihag ara Mispa.

² Is um atidai a Ismeel inhal u Nedanaia, im natimi is ten iji ehki eris ahced yin ara, um auud Cetalaia inhal u Ahaikam inhal u Sefan an nauitoga, um atgei yin, aien ahki is ati yin a natimarid an pece Babelon mika yi atimi alupas an pece aien.

³ Is lep atgei nup u Juta asega iji ig a Ismeel eris amen ehele Cetalaia ara Mispa, im lep nup u Kaltia iji ig eris ecet ra eahki, ilpu eucsupo marom.

⁴ Is wat atgei Cetalaia aien um ti pan itac nadiat is ero, is lep eti ato tah natimi,

⁵ eris yetpan eahki hal atimi eris ahes irai Sikem ara, im lep Sailo, im lep Sameria, natimi is eete marom, eris mun ekpei ingeijira ara, um ahpati napelumai ura um attai ra; eris lep apos pan niji itai ahlap ara, im nitai auanipin upene, mika eri imiapan an nimnim u Ihova.

⁶ Is ahes Mispa a Ismeel inhal u Nedanaia um apan itac mika yi aubilid ra, is atga aien um taig: is wat ehtet ira ra aien, is ika ehele ra aien, Akumu apam aijaua ehele Cetalaia inhal u Ahaikam.

⁷ Eris wat apan ara an nuarin juju an maliyum, is atgei ra a Ismeel inhal u Nedanaia, um erekhaigse ra anliin nehpanitai, aien, im ilpu atimi iji ehki eris ahced yin ara.

⁸ Ja eris amen ira ra sji ehki natimi is ten eris ika ara ehele Ismeel, Namu jim atgei cama aiek: et eteuc ehelema niji itai esjilid eris adenaig anliin pece, nikavaig, hwiit, im barle, im narakei oliv, im hune. Va nitai inigki is udei ra aien, um eti atgei ra ehele ilpu etwara.

⁹ Is ago a Esa natimarid, vai Beasa natimarid an pece Isreel, nehpanitai iyehki is erekhaigse iran a Ismeel niji ohui ilpu atimi emesmas asega iji ig is atgei ra aien vai Cetelaia: is ika a Ismeel inhal u Nedanaia eri ohua an nehpanitai iyehki ara sji igki eris atgei ra.

¹⁰ Is um arore ilpu ahri asega iji ig a Ismeel eris amen Mispa ara, nikavaig, ilpu halav atahig u natimarid, im lep atimi asega iji ig eris amen Mispa ara, ra sji igki marom is ikni ra a Nebusaratan natimi alupas u ilpu eucsupo ehele Cetalaia inhal u Ahaikam: is idim arore ra a Ismeel inhal u Nedanaia mika yi imiapan ra an taka ualin, is um atga o un aien alaig apan ehele nup Amon.

¹¹ Ja is wat ahgei intas a Johenan inhal u Karia, im ilpu atimi alupas asega u ilpu eucsupo iji ig eris amen ehelen ara, va nedo has asega iyehki is ago a Ismeel inhal u Nedanaia,

¹² eris lucsei ilpu dualep ura asega ara, um apan mika eri ati nedoa vai Ismeel inhal u Nedanaia, eris lep uhum yin ara ui wai alupas Cibeon.

¹³ Eris imiacitak natimi asega amen ehele Ismeel, eris wat ecet Johenan inhal u Karia ara, im ilpu atimi alupas asega u ilpu eucsupo eris amen ehelen ara.

¹⁴ Eris lep ahidai ra um adumoij pam ehele Johenan inhal u Karia natimi asega iji ig is arore ra Mispa a Ismeel um imiapan ra.

¹⁵ Ja is ahapan vai Johenan a Ismeel inhal u Nedanaia im lep natimi is eet ehelen um apan ehele nup Amon.

¹⁶ Ja is par apitac a Johenan inhal u Karia, im ilpu atimi alupas asega u ilpu eucsupo eris amen ehelen ara, um lucsei ilpu ahri atimi asega is atoraliak ra aien irai Ismeel inhal u Nedanaia Mispa, is wat atgei Cetalaia inhal u Ahaikam aien, nikavaig, ilpu eucsupo emda, im ilpu takata, im ilpu halav, im ilpu aheca esjilid, ra sji igki marom is iknipagki ra Cibeon aien um imiadumoij ra:

¹⁷ eris apan ara, um amen an nuarin inig is amen iran a Kimham, et ubutpotet Bedleem, mika eri han ara um yetpan Ijipt, vai nup u Kaltia:

¹⁸ eris idim imtitai ra ara, vaig inig nikavaig, is atgei Cetalaia inhal u Ahaikam a Ismeel inhal u Nedanaia, aien ahki is ati yin a natimarid an pece Babelon mika yi atimi alupas an pece.