Jeremaia 4 - Intas Etipup

NUARIN TAS ALUPAS 4.

1 Et imiacaij nup Isreel a Atua an tas upyi asaig o un. 3 Et ahugni nup u Juta aien irai aruvaig esjilid mika eri adumoij pam an liinmopora ara. 19 Nehtigtaig esjilid va nohocred u nup u Juta.

¹ ET ika a Ihova, El eka merit aijaua par adumoij pam, ak nup Isreel, akumu adumoij pam ehelek aijaua: im lep inig, el eka iknipagki niji itai er amcel vaig unyimia aijaua an nuhup unyak, akupu eti apan aijaua an taka uarin.

² Akumu lep asig yi aktit intas aijaua, um ika, Et umoh a Ihova, an tas inveijec, im lep an nedo atoh, im lep an nedo upene; erupu lep asan tas acis yi alwai ra iran a nup urai iji pece, erupu lep imiahpas ra iran ara.

³ Et idim ika a Ihova ehele nup u Juta im nup u Jerusalem, Akumu acujitai upene aijaua, um jim ahwai upsiitai upene u itai upunupun.

⁴ Akumu aperitome iramia aijaua vai Ihova, um iknipagki arasi liinmopomia uhup, ak nup u Juta im ilpu atimi amen Jerusalem: vai yi jim ehcohos pan nedemda unyak et idivaig incap, um atnamud, etpu elika vaig tah par ahni, vaig inig nikavaig, eka mun ago nedo has aijaua.

⁵ Akumu asan tas aijaua an pece Juta, um asuptecnaig an maliyum Jerusalem; um ika, Akumu ahlai intoho an pece aijaua: ahlaig ijinies irai iji uarin asega, um ika, Akumu asjapicnaig aijaua, intumu apan akaija irai maliyum iji ig et arehed iran nathatahau.

⁶ Akumu atijai nitai ahlaig lahpan Saion aijaua: akumu ehra ahapam aijaua, um jim aiji: vaig inig nikavaig, ekpu imiapam nitai has alupas ainyak, im nitai auahas itai esjilid, etpu ahes an pece inig et ahes narutu iran.

⁷ Et mun ahes anliin tucjip laion um ehcohos pam, et atga an nefalaig a natimi auahas nup urai iji pece; et mun ahes an nuarin o un aien, mika yi auahas inpece unyimia; uhpu alcapdicraig niji maliyum unyimia, mika yi jim amen iran tah natimi.

⁸ Va nitai inigki akumu aso caua aijaua ira apelumai uucai, akumu ehtigtaig aijaua um aunyauwaig: inyi eti fi adumoij pan vai caija nedemda alupas u Ihova.

⁹ Et ika a Ihova, Etpu idim uco an nadiat iyehki, etpu auatialidi inliinmopoi natimarid, im inliinmopoi ilpu atimi alupas; erupu lep imtitaig a ilpu atimi ahlap; erupu lep imiali a ilpu profeta.

¹⁰ Kis um ika ainyak, Awe! ak Ihova Natimarid, na mun idim ika aiek eri ahnag esjilid a nup igcaki im lep nup u Jerusalem; eris ika a ilpu profeta efaifa, Akupu amen igpa aijaua; ja uhpu atgei atimi an nedoa.

¹¹ An nopan iyehki uhpu ika ehele nup igcaki im lep ehele nup u Jerusalem, Nimtinjap inig et ces niji uarin ijinies an namasacen et apam ehele ilpu atimi unyak, jam eti ika yi ahlaadaig hwiit, um eti ika yi ahre nohok.

¹² Etpu ahes eahki nimtinjap inig etpu esjilid irai ra sji ehki um apam ehelek: im lep inig, ekpu asuptecnaig neruvaig vai ra ainyak.

¹³ Akumu ato aijaua mika, etpu aridjipam aien et idivaig niji apat, etpu idivaig narakiraki niji jariot o un: erupu athut niji hors o un um esjilid irai meijcop alupas. Kaiheuc vai caija! era mun atoraliak niji itai uja ara.

¹⁴ Ak nup u Jerusalem, akumu yiri inliinmopomia aijaua, vai nedo has, mika uhpu imiatamaig caua. Etpu amen ehelemia naktaktai has unyimia um yetpan an nahopan?

¹⁵ Et ahlaig pam nohran tah Tan, um asuptecnaig nohocred an nedoon Ifreem.

¹⁶ Akumu efehtas aijaua ehele nup urai iji pece, um lep asuptecnaig ehele nup u Jerusalem, mika era ahes an pece itac acen a ilpu atimi ati nedoa um apam; erupu aunyauwaig ara vai niji maliyum an pece Juta.

¹⁷ Et ika a Ihova, Era arehed ira ra ara par yiat ira ra, et idivaig ilpu atimi aminjinaig ahapol: vaig inig nikavaig, era mun imipalea intas unyak ara.

¹⁸ Et mun yetpam iramia nitai iji igki va nedo has unyimia, im nauritai has unyimia; nohocred unyimia nigki, et idim acen: et yetpan an liinmopomia.

¹⁹ Et ohocred inliinmopok, et emda inliinmopok! et ehioehio inliinmopok; et taig inliinmopok; et ehka vai nyak par eucsup, vaig inig nikavaig, as mun atahaijeg aiek, ak nesgak, nohran toho, um lep naunyauwaig u ilpu atimi ati nedoa.

²⁰ Era eti atumop ara par auahas itai; eh mun idim auahas inpece asega: ek mun auroauro um auahas niji imnim an pece unyak, er anvai pam nohpoditai an pece unyak an nopan ipjidipjid.

²¹ Ekpu almoi nitai ahlaig ainyak, um ahgei nohran toho, um yetpan an nahopan?

²² Era idim ahnag a ilpu atimi unyak, era mun eti ato nyak ara; era idivaig ilpu halav et eti eteuc lelra, era eti aktaktai ara: era arapakau ara par ago nedo has, ja era eti ato ara par ago nedo upene.

²³ Kis almoi nobohtan ainyak, ja is tup upudupud, um ti nitai iran; im lep nohatag, ja is ti inlah iran.

²⁴ Kis almoi niji edoon ainyak, ja eris idim amaamai; is lep asjusjaig niji au asega va nomoi.

²⁵ Kis almoi ainyak, ja is idim eti eteuc tah natimi, eris lep ae pan niji man asega an nauanohatag.

²⁶ Kis almoi ainyak, ja is idim amasacen nuarin pece upene, eris lep alcapdicraig niji maliyum asega iran an nuhup u Ihova, im lep an nuhup u nedemda alupas o un.

²⁷ Is idim ika a Ihova, Etpu umaruma inpece asega; ja ekpu eti auahas ehni ainyak.

²⁸ Va nitai inigki etpu taig nobohtan, etpu lep apig nohotag ijinies: vaig inig nikavaig, ek mun asaig intas ainyak, ek mun tas anacanac ainyak, ekpu eti adumoij an liinmopok ainyak vaig, ekpu eti lep atidjik iran ainyak.

²⁹ Erupu ahapan a nup urai iji maliyum asega vai nohrai ilpu atimi ateuc irai hors im ilpu atimi apos efana; erupu apan ara irai iji esei, erupu ahei nij ara mika eri atpuh: etpu ahyuahyu niji maliyum asega, inyi eti amen iran tah natimi.

³⁰ Uhu wit atoraliak itai unyum, napu ago inhe aiek? El et aso euc aiek ira apelumai cap, el et yecrei euc aiek irai itai ahnaig colt, el et atapni nesganimtam aiek, el et takitai mika na eklim upene aiek; erupu amcel vai euc a ilpu atimi merit vai euc, erupu ika ara eri atgei euc.

³¹ Ek mun ahgei nohran tah ainyak et idivaig nohrai intakata et apos inhal o un aien, im lep nohocred et idivaig nohocred o un et apos inhal o un inmeto, nikavaig, nohrai inhalav atahig u Saion, et imitaig yin aien, um adan nikman ero, um ika, Awe! kaiheuc vai nyak! et auatialidi inliinmopok ainyak vai ilpu atimi atgei atmas.