Jeremaia 39 - Intas Etipup

NUARIN TAS ALUPAS 39.

1 Eh atoraliak Jerusalem. 4 Er ago apat nesganimtai Setekaia um imiapan yin Babelon. 8 Eh auahas inmaliyum, 9 er imiapan atimi Babelon. 11 Intas alep u Nebukatnesar par ago nedo upene vai Jeremaia. 15 Intas upyi asaig u Atua imi Ibet-milek.

¹ AN mesese naind irai Setekaia natimarid an pece Juta, an mohoc tend, is yetpam Jerusalem a Nebukatnesar natimarid an pece Babelon im inpak an nedoa asega o un, eris aat iran ara um arehed.

² Im, lep inig, an mesese elevend irai Setekaia, an mohoc ford, an nadiat naind an mohoc iyehki, eris ahopdicraig inmaliyum iyehki.

³ Eris apam anliin maliyum a ilpu atimi alupas asega u natimarid an pece Babelon, um ateuc an neucse nathatahau juju, nan, Nercal-Sarisar, im Samcar-nibo, im Sarsekim natimi alupas u ilpu aheca esjilid, im Nercal-sarisar natimi alupas u ilpu atimi arapakau, im ilpu atimi alupas asega is eche u natimarid an pece Babelon.

⁴ Is wat ecet ra a Setekaia natimarid an pece Juta, im ilpu eucsupo asega o un, eris ahapan ara, um udei inmaliyum, um apan itac an nepig, an nefalaig u nahapol u natimarid, an neucse nirahed an niblan nathatahau is ero: is atga aien an nefalaig inig et yetpan an nuarin marara.

⁵ Ja eris ahau pan ra a ilpu eucsupo u nup u Kaltia, um uhum Setekaia irai uarin marara Jeriko: eris wat arop iran ara, eris imiapan yin ara ehele Nebukatnesar natimarid an pece Babelon, is amen Ribla aien an pece Hemad, is asaig neruvaig vai yin eahki aien.

⁶ In um atgei ilpu halav atamaig u Setekaia an nuhup o un a natimarid an pece Babelon Ribla: im lep inig, is atgei ilpu atimi alupas asega u nup u Juta a natimarid an pece Babelon.

⁷ Im lep inig, is ago apat nesganimtai Setekaia aien, um arore yin irai atau bras, mika yi imiapan yin Babelon.

⁸ Eris lep atnamud nimnim u natimarid an cap a nup u Kaltia, im lep niji imnim u atimi, um alcapdicraig niji athatahau Jerusalem.

⁹ Is arore nahri atimi iji ig eris amen an maliyum ara a Nebusaratan natimi alupas u ilpu eucsupo, um imiapan ra Babelon, im lep ra sji ig eris aha ara um leh imi yin, nahri atimi marom eris amen ara.

¹⁰ Ja is udei an pece Juta ilpu ihki atimi iji ig is eti eteuc tah naga ura a Nebusaratan natimi alupas u ilpu eucsupo, um alupai ra okoro vaine im lep uari obohtan an nopan iyehki.

¹¹ Is um tas alep vai Jeremaia a Nebukatnesar natimarid an pece Babelon ehele Nebusaratan natimi alupas u ilpu eucsupo, um ika,

¹² Namu leh yin aiek, um aminjinaig upene yin, um jim ago tah nedo has vai yin; jam ago vai yin et idivaig intas inig etpu asaig ehelum aien.

¹³ Is abraig pan atimi a Nebusaratan natimi alupas u ilpu eucsupo, im Nebusasban natimi alupas u ilpu aheca esjilid, im Nercal-sarisar natimi alupas u ilpu atimi arapakau, im ilpu atimi alupas asega u natimarid an pece Babelon;

¹⁴ maiya, eris abraig pan atimi ara, um atipagki Jeremaia an nokoro u neom ipjin, um ati yin ehele Cetalaia inhal u Ahaikam inhal u Sefan, mika yi imiapan yin an nimnim o un: is um amen aien ehele atimi.

¹⁵ Is um yetpam intas o Ihova ehele Jeremaia, eris wat atapnes yin an nokoro u neom ipjin, um ika,

¹⁶ Namu apan aiek um tas ehele Ibet-milek nup Idiopia, um ika, Et ika a Ihova esjilid acen, Atua u nup Isreel; Namu ato aiek mika, ekpu imiapam intas unyak ainyak an maliyum inigki va niji itai has, jam eti va niji itai upene; uhpu lep ehneijid an nopan iyehki an nuhup unyum.

¹⁷ Ja et lep ika a Ihova, Ekpu imiaras euc ainyak an nopan iyehki: uhpu eti atcijaig euc an nikmai ilpu atimi iji ig na imtitai ra aiek.

¹⁸ Et lep ika a Ihova, Ekpu idim imiatamaig euc ainyak, uhpu eti atgei euc an nedoa, napu umoh ache aiek, intup naiheuc u Atua vai euc nigki: vaig inig nikavaig, na mun asgeig irak aiek.