Jeremaia 38 - Intas Etipup

NUARIN TAS ALUPAS 38.

1 Er asan tas ahcil, vai, Jeremaia, um, atise yin vaig an nehpanitai u neom, ipjin u Malkaia. 7 Et ugyi natimarid vai yin a Ibet-milek, va, nitai inigki er auata, aiheuc vai yin. 14 Erau echim, tas jipe aien im natimarid, et tas upene ehelen a, Jeremaia, mika, yi, imiaiji, intas o Nebukatnesar um, imiatamaig yin. 24 Et adenaig intas jipe uran aien ehele ilpu, atimi, alupas et idivaig intas acaiji yin u natimarid.

¹ ERIS ahgei intas o Jeremia a Sefataia inhal u Matan, im Cetalaia inhal u Pesur, im Jukal inhal u Selemaia, im Pesur inhal u Malkaia, intas iji igki marom is asaig aien ehele atimi asega, um ika.

² Et ika a Ihova, Aien et amen an maliyum inigki aien, etpu mas aien an nedoa, im numlaig has, im inmas alupas: ja aien et apan itac aien ehele nup u Kaltia, etpu umoh aien: intup naiheuc u Atua vai yin nigki, etpu umoh ache aien.

³ Et ika a Ihova, Uhpu idim atcijaig inmaliyum inigki an nikmai ilpu eucsupo u natimarid an pece Babelon, erupu atoraliak ara.

⁴ Va nitai inigki eris ika a ilpu atimi alupas an pece ehele natimarid, Ecra ugyi euc aijama mika, eri atgei natimi inigki: et idim auatiatidi nikmai ilpu eucsupo iji ig era amen an maliyum inigki ara, im lep nikmai atimi asega, vai intas iji ig et asaig aien ehele ra: et eti ahilek namen upene u nup igcaki a natimi inigki, ja et ahilek namen has ura aien.

⁵ Ja is par ika a Setekaia natimarid, Tup aijaua marom vai yin: et ehka vai natimarid par imiisjis ehelemia vaig tah nitai.

⁶ Eris um leh Jeremaia ara, um ethaigse yin an nehpanitai iyehki u Malkaia inhal u Hamelek, is eteuc an nokoro an neom ipjin: eris aiyihise Jeremaia irai jaula: ti inwai an nehpanitai, jam osalʼ: is um asuol an nosal a Jeremaia.

⁷ Is amen an nimnim u natimarid a Ibet-milek nup Idiopia, naheca esjilid is ethi, is wat atahaijeg aien mika eris ethaigse Jeremaia ara an nehpanitai; is lep ateuc a natimarid an neucse nathatahau u nup u Benjamin;

⁸ is apan itac an nimnim u natimarid a Ibet-milek, um tas ehele natimarid, um ika.

⁹ Ak natimarid natimi alupas unyak, era mun ago nedo maumau a ilpu atimi iji igki an nedo ura asega inig era mun ago ara vai Jeremaia naprofeta, era mun ethaigse yin an nehpanitai ara: etpu mas aien vai numlaig has an nuarin inig et amen iran aien: et mun tiih nitai caig an maliyum.

¹⁰ Is asaig a natimarid ehele Ibet-milek nup Idiopia, um ika, Namu lucsei atimi inyi dirte aiek igcaki, um aiyihijai Jeremaia naprofeta an nehpanitai iyehki, vai vi jim mas aien.

¹¹ Is um lucsei atimi iji ehki a Ibet-milek, eris um ahced yin ara, um apan an nimnim u natimarid, ithan, neom ikni itai, um lucsei nuari apelumai ahpati, im inmohta apelumai eahki, um aiyihise irai jaula an nehpanitai ehele Jeremaia.

¹² Is ika a Ibet-milek nup Idiopia ehele Jeremaia, Namu lucsei nuari apeluma ahpati iji igki im inmohta apelumai iji igki aiek, um ikni ithai nikmam ero van jaula. Is um ago a Jeremaia is idivaig intas o un.

¹³ Eris aiyihijai Jeremaia ara irai jaula, um atipagki yin an nehpanitai: is um amen a Jeremaia an nokoro an neom ipjin.

¹⁴ Is abraig pan atimi a Setekaia natimarid, um imiapan Jeremaia naprofeta ehelen an nefalaig esjilid iyehki is eteuc an nimnim u Ihova: is ika ehele Jeremaia a natimarid, ekpu ahodai euc van tas inyi ethi ainyak; namu jim adenaig tah nitai vai nyak aiek.

¹⁵ Is um ika a Jeremaia ehele Setekaia, El ek asuptecnaig intas ehelum ainyak, napu idim atgei nyak aiek, ka oʼo? el ek asuptecnaig atoh ehelum ainyak, napu eti atahaijeg nyak aiek.

¹⁶ Is asig yi aktit intas a Setekaia natimarid ehele Jeremaia, ja is adenaig aien, um ika, Et idim umoh a Ihova inig is ago nesgaijau aien, et idim uco, ekpu eti atgei euc ainyak, ekpu lep eti atcijaig euc ainyak ehele ilpu atimi iji ig era ika ara eri atgei euc ara.

¹⁷ Is um ika a Jeremaia ehele Setekaia, Et ika a Ihova Atua esjilid acen, Atua u nup Isreel; El et idim apan itac aiek ehele ilpu atimi alupas u natimarid an pece Babelon, napu umoh aiek, uhpu eti atnamud inmaliyum inigki an cap; napu umoh aiek, im lep nup an nimnim unyum:

¹⁸ ja el et eti apan itac aiek ehele ilpu atimi alupas u natimarid an pece Babelon, uhpu atcijaig inmaliyum inigki an nikmai nup u Kaltia, erupu atnamud an cap ara, napu lep eti aha vai nikmara aiek.

¹⁹ Is um ika a Setekaia natimarid ehele Jeremaia, Ek imtitaig nup u Juta iji ig ainyak era ahapan ehele nup u Kaltia ara, va eri jim atcijaig nyak ehele ra, erupu lep imiafakahcil nyak ara.

²⁰ Ja is ika a Jeremaia, Erupu eti atcijaig euc ara. Ek ugyi euc ainyak mika an atahaijeg intas inig o Ihova aiek, ek asuptecnaig ehelum ainyak: napu amen upene aiek, napu lep umoh aiek.

²¹ Ja el et imiisjis aiek um eti apan itac, et uce intas inig et mun asuptecnaig ehelek a Ihova:

²² Namu lep ato aiek mika, uhpu imiapan itac ilpu takata asega iji ig, era eti fi atga ura ara jam amen an nimnim u natimarid an pece Juta, ehele ilpu atimi alupas u natimarid an pece Babelon, erupu lep ika a ilpu takata, iji igki, Era mun imiisjis ehelum a ilpu apa unyum, um esjilid iram: era mun imiasuol neduom ero an nosal ara, ja era mun adumoij pan ara.

²³ Erupu imiapan itac ehele nup u Kaltia ilpu ehnaa asega unyum ara im lep ilpu hal unyum: napu eti aha va nikmara aiek, ja uhpu arop iram an nikmai natimarid an pece Babelon: uhpu atnamud inmaliyum inigki an cap vai euc.

²⁴ Is lep ika a Setekaia ehele Jeremaia, Etmu jim ato intas iji igki tah natimi, napu lep eti mas aiek.

²⁵ Ja el era ahgei a ilpu atimi alupas mika ek mun tas ehelum ainyak, el era apam ehelum ara, um ika ehelum, Namu idim asuptecnaig ehelema aiek intas inig na mun asaig aiek ehele natimarid, namu jim adenaig vai cama aiek, ecrupu eti atgei euc aijama; im lep inig, namu asuptecnaig ehelema intas inig et mun asaig ehelum a natimarid:

²⁶ namu ika aiek ehele ra, Ek mun ugyi natimarid ainyak, mika yi jim ika aien eri imiadumoij pan nyak an neom u Jonadan, vai ki jim mas ainyak eahki.

²⁷ Eris apan ehele Jeremaia a ilpu atimi alupas asega, um ahodai yin: is asuptecnaig ehele ra aien is idivaig intas asega iji ig is asaig ehelen a natimarid. Eris atga ura ara um eti lep tas ehelen; eris eti ahgei intas jipe iyehki.

²⁸ Is lep amen a Jeremaia an nokoro an neom ipjin um yetpan an nadiat iyehki eris atoraliak Jerusalem: eris wat atoraliak Jerusalem is amen eahki aien.