Jeremaia 36 - Intas Etipup

NUARIN TAS ALUPAS 36.

1 Et asan tas a Jeremaia ehele Beruk mika yi aged niji tas upyi asaig o un, 5 um esvi ehele atimi asega. 11 Et asuptecnaig nedo inigki a Maikeya ehele ilpu atimi alupas an pece, era abrai Jehutai ara mika yi imiapam nitaasviitai iyehki, um esvi ehele ra. 19 Era asaig ehele Beruk ara mika yi atpuh aien im Jeremaia. 20 Et wat ato vaig a Jehoiakim natimarid, et ahgei nahaijin aien, ja par atnamud nitaasviitai iyehki. 27 Et asuptecnaig neruvaig iran a Jeremaia. 32 Et aged nitaasviitai mat a Beruk.

¹ AN mesese ford irai Jehoiakim inhal u Josaia natimarid an pece Juta, is ahes intas inigki irai Ihova um yetpam ehele Jeremaia, um ika,

² Namu leh nitaasviitai aiek, um aged iran intas asega iji ig ek mun asuptecnaig ehelum ainyak vai nup Isreel, im lep vai nup u Juta, im lep vai nup urai iji elcau asega, ahes an nadiat iyehki kis uhup um tas ehelum ainyak, ahes irai adiat u Josaia marom um imihum pam an nadiat inigki.

³ Kit erupu atahaijeg nohocred asega inig a nup u Juta et ika ainyak ki ati imi ra; mika eri adumoij pam ara um udei efalaig has ura, athi um athi ehni; mika ki ohpodohpod nedo acalacal ura ainyak im lep nedo has ura.

⁴ Is imiacaij Beruk inhal u Niraia a Jeremaia: is asaig a Jeremaia niji tas asega is asuptecnaig ehelen a Ihova, ja is par aged a Beruk an nitaasviitai.

⁵ Is acaiji Beruk a Jeremaia, um ika, Eh mun atapnes nyak; et ehka vai nyak par apan an nimnim u Ihova:

⁶ va nitai inigki namu apan aiek, um esvi an nitaasviitai inig, ek mun asaig intas iran ainyak, nikavaig, niji tas o Ihova ehele atimi an nimnim u Ihova an nadiat atwakam: namu lep esvi intas iji igki aiek ehele nup u Juta asega era ahes irai maliyum ura ara um apam Jerusalem.

⁷ Kit erupu atpuse ara an nuhup u Ihova um alaigaheni vai yin, um lep adumoij pam um udei efalaig has ura, athi um athi ehni: et idim alupas nedemda im intavaitap is asuptecnaig a Ihova vai nup igcaki.

⁸ Is ago a Beruk inhal u Niraia is idi vaig intas asega iji ig is asaig ehelen a Jeremaia, um esvi an nitaasviitai niji tas o Ihova an nimnim u Ihova.

⁹ Au mesese fifd irai Jehoiakim inhal u Josaia natimarid an pece Juta, an mohoc naind, eris asuptecnaig nadiat atwakam an nuhup u Ihova ehele nup u Jerusalem asega, im lep ehele atimi asega eris ahes irai maliyum an pece Juta ara um apam Jerusalem.

¹⁰ An nopan iyehki is esvi a Beruk an nitaasviitai niji tas u Jeremaia an nimnim u Ihova, an nuarin neom u Cemaraia inhal u Sefan natimi aged itaasviitai, an nokoro ijinies, an nuhup u neucse nathatahau mat u nimnim u Ihova, ehele atimi asega.

¹¹ Is wat ahgei intas asega o Ihova an nitaasviitai iyehki a Maikeya inhal u Cemaraia, inhal u Sefan,

¹² is asuol aien um apan an neom u natimarid, an nuarin neom u natimi aged itaasviitai: eris idim ateuc eahki a ilpu atimi alupas asega, nan, Elisama natimi aged itaasviitai, im Teleaia inhal u Simeya, im Elnedan inhal u Akbor, im Cemaraia inhal u Sefan, im Setekaia inhal u Hananaia, im lep ilpu atimi alupas asega.

¹³ Is lep asuptecnaig ehele ra a Maikeya intas asega iji ig is ahgei aien, is wat esvi an nitaasviitai iyehki a Beruk ehele atimi.

¹⁴ Va nitai inigki eris ika a ilpu atimi alupas asega yi apan ehele Beruk a Jehutai inhal u Nedanaia, inhal u Selemaia, inhal u Kusai, um ika, Namu apos an nikmam aiek nitaasviitai iyehki na mun esvi aiek ehele atimi, um apam. Is idim apos an nikman nitaasviitai iyehki a Beruk inhal u Niraia, um apan ehele ra.

¹⁵ Eris ika ehelen ara, Namu ateucse aiek um esvi an nitaasviitai, ecrupu atahaijeg aijama. Is um esvi an nitaasviitai a Beruk, eris um atahaijeg ara.

¹⁶ Eris wat ahgei intas asega iji igki ara, eris alum jipe ra ara, um imtitaig, um ika ehele Beruk, Lerupu idim asuptecnaig intas asega, iji igki ehele natimarid aijama.

¹⁷ Eris ahodaig Beruk ara, um ika, Namu idim asuptecnaig ehelema aiek, Na mun evaged intas asega iji igki aiek is asaig aien?

¹⁸ Is lep ika ehele ra a Beruk, Is asaig intas asega iji igki ehelek aien an nipjineucsen, kis lep aged ainyak an wai apig an nitaasviitai inigki.

¹⁹ Eris lep ika ehele Beruk a ilpu atimi alupas, Namu apan aiek, um atpuh, aiek im Jeremaia; um jim asuptecnaig ehelen tah natimi nuarin amen iran unyimirau.

²⁰ Eris apan ara ehele natimarid an nokoro; ja eris ati nitaasviitai iyehki ara an nuarin neom u Elisama natimi aged itaasviitai, um asuptecnaig intas asega iji ehki ehele natimarid.

²¹ Is abrai Jehutai a natimarid mika yi apan um leh nitaasviitai iyehki: is leh pan aien an nuarin neom u Elisama natimi aged itaasviitai. Is um esvi intas iran a Jehutai ehele natimarid, im lep ehele ilpu atimi alupas asega iji ig eris amen ehele natimarid.

²² Is um ateuc a natimarid an neom o un vai inmesese an mohoc naind: is eteuc incap an nuhup o un an nuarin adgan cap.

²³ Is wat esvi nuarin tas alupas is dri ka for a Jehutai, is ucsamud a natimarid an nauitoga, um ethaigjai an cap iyehki is amen an nuarin adgan cap, ja eris par atnamud ehni nitaasviitai iyehki an cap iyehki is amen an nuarin adgan cap.

²⁴ Is ahgei intas asega iji igki a natimarid im ilpu aheca o un, ja is eti imtitaig tah ira ra; um eti ahpati napelumai o un.

²⁵ Ehtijis idim ugyi natimarid ahtaij, nan, Elnedan im Teleaia im Cemaraia mika yi jim atnamud nitaasviitai aien: ja is esjum aieu par atahaijeg ehtaij.

²⁶ Ja is tas alep a natimarid ehele Jeramiel inhal u Haniel ek, im Sereaia inhal u Asriel, im Selemaia inhal u Abtiel, mika taijpu arop irai Beruk natimi aged itaasviitai im Jeremaia naprofeta ahtaij: ja is adenai rau a Ihova.

²⁷ Is atnamud nitaasviitai iyehki a natimarid, im lep intas iji ig is asaig a Jeremaia um aged a Beruk, ja is par apitac intas o Ihova um apam ehele Jeremaia, um ika,

²⁸ Namu aketo aiek um leh nitaasviitai inyi eche, um aged iran intas asega iji ehki eris aged an nitaasviitai iyehki uhup, et mun atnamud a Jehoiakim natimarid an pece Juta.

²⁹ Namu lep ika aiek ehele Jehoiakim natimarid an pece Juta, Et ika a Ihova; Na mun atnamud nitaasviitai iyehki aiek, um ika, Na a uri aiek par aged iran, um ika, Etpu idim ham a natimarid an pece Babelon um auahas inpece inigki, um ika inyi eti amen iran natimi im lep nitai eklim edo irai pece?

³⁰ Va nitai inigki et ika a Ihova vai Jehoiakim natimarid an pece Juta; Inyi eti eteuc tah natimi inig et ahes iran par atimarid um isjeupigmoig Tevit: uhpu lep ethaig pan itac nohun mas vai nihlup an nadiat, im lep vai nara an nepig.

³¹ Ekpu ateghe yin ainyak im ilpu hal o un im ilpu aheca o un va nedo has ura; ekpu lep imiapam ehele ra ainyak, im lep ehele nup u Jerusalem, im lep ehele nup u Juta, nohocred asega inigek mun asuptecnaig vai ra ainyak; ja era mun eti atahaijeg ara.

³² Is lep leh nitaasviitai is eche a Jeremaia, um alupai Beruk natimi aged itaasviitai, inhal u Niraia; is lep aged iran aien intas is asaig a Jeremaia, intas asega marom an nitaasviitai iyehki is atnamud an cap a Jehoiakim natimarid an pece Juta: eris lep aged pan o un intas is ahinag is idivaig iji ehki uhup,