Jeremaia 34 - Intas Etipup

NUARIN TAS ALUPAS 34.

1 Et asan tas upyi asaig a Jeremaia mika eri imiapan Setekaia im nup u Jerusalem an taka pece. 8 Era atcijaig ilpu aheca ura a ilpu atimi alupas an pece im natimi, ja par apitac um atladwi intas etipup u Atua um imiadumoij pam ra. 12 Et atcijai ra im Setekaia a Jeremaia irai ikmai ilpu atimi tak atimi ira ra, va nedo imipalea ura.

¹ AN nopan iyehki, eris wat aat irai Jerusalem im niji maliyum asega ubutpotet pan iran a Nebukatnesar natimarid an pece Babelon, im niji pak an nedoa asega o un, im nup urai iji elcau asega an nobohtan is atimarid ira ra aien, im lep natimi asega, is ahes ehele Ihova intas inigki um yetpam ehele Jeremaia, um ika,

² Et ika a Ihova, Atua u nup Isreel; Namu apan aiek um tas ehele Setekaia natimarid an pece Juta, ura ika ehelen, Et ika a Ihova, Namu ato aiek mika, ekpu atcijaig inmaliyum inigki ainyak an nikmai natimarid an pece Babelon, etpu lep atnamud au cap aien:

³ napu eti ahapan aiek vai nikman, uhpu idim arop iram, uhpu lep atcijai pan euc an nikman; napu almoi nesganimtai natimarid an pece Babelon aiek, erupu tas jipe aijaurau, napu apan Babelon aiek.

⁴ Ja namu atahaijeg intas o Ihova aiek, ak Setekaia natimarid an pece Juta; Et ika a Ihova vai euc, Napu eti mas aiek an nedoa:

⁵ napu mas aiek an nigpa: erupu atnamud nitai auanipin upene vai euc ara, et idivaig eris atnamud vai ilpu retpom ara, ilpu atimarid itu iji ig eris uhup iram ara; erupu imitaig euc ara, um ika, Awe, ak natimarid! vaig inig nikavaig, et ika a Ihova, ek mun asaig intas inigki ainyak.

⁶ Is asan tas iji igki asega a Jeremaia naprofeta ehele Setekaia natimarid an pece Juta Jerusalem,

⁷ an nopan iyehki eris wat aat irai Jerusalem a ilpu eucsupo u natimarid an pece Babelon, im lep niji maliyum asega an pece Juta iji ig eris eti fi auahas, nikavaig, eris lep aat irai Lekis, im lep Asika ara: vaig inig nikavaig, is amen inmaliyum emda eraigki irai maliyum an pece Juta.

⁸ Is ahes ehele Ihova intas inigki um yetpam ehele Jeremaia, is wat ti pan itac nasaig intas etipup iyehki is ati a Setekaia natimarid ehele atimi asega eris amen Jerusalem ara, par asuptecnaig intup eklim amen upene ehele ra;

⁹ mika eri atcijaig ilpu aheca atamaig ura, im ilpu aheca atahig ura, ara asega athi um athi ehni, nikavaig, ilpu atamaig Hibru im ilpu atahig Hibru; mika yi jim ika tah natimi yi auanaheca o un a etwan, el et up u Juta aien.

¹⁰ Eris wat atahaijeg a ilpu atimi alupas asega iji ig, im lep natimi asega iji ig, eris ati intas etipup iyehki ara, mika eri atcijaig ilpu aheca atamaig ura, im ilpu aheca atahig ura, ara asega athi um athi ehni, um eti ika tah natimi ehelen tah yi lep auanaheca o un, eris idim atahaijeg ara, um atcijai ra.

¹¹ Ja eris par apitac ara um adumoij pan, um imiadumoij pam ilpu aheca atamaig iji ig im ilpu aheca atahig iji ig ara, eris upyi atcijai ra ara, um imiasuol ra mika eri ilpu aheca atamaig ura im ilpu aheca atahig ura.

¹² Va nitai inigki is ahes ehele Ihova intas o Ihova um yetpam ehele Jeremaia, um ika,

¹³ Et ika a Ihova, Atua u nup Isreel; Kis ati intas etipup ehele ilpu retpomia ainyak au nopan iyehki kis iknipagki ra ainyak an pece Ijipt, an nuarin iyehki eris tup auanaheca iran ara jam eti leh nimtan, um ika,

¹⁴ Etu wit ti pan itac inmesese inyi seven akumu atcijaig ilpu etwamia ilpu Hibru iji ig aijaua asega, athi um athi ehni, eris ahtai ra imi caua; etu wit auanaheca unyum aien irai mesese inyi siks, namu atcijaig yin aiek: ja eris eti atahaijeg nyak a ilpu retpomia, um eti atgeig pam intikgara.

¹⁵ Ja akis wat adumoij pam aijaua an nopan inig, um ago nedo atoh an nuhup unyak, um asuptecnaig intup eklim amen upene ehele ilpu atimi eblaamnem unyimia, aijaua asega athi um athi ehni; akis lep ati intas etipup aijaua an nuhup unyak an nimnim inig eris anvi nidak iran:

¹⁶ ja eka mun adumoij pan aijaua um auahas nidak, um imiadumoij ilpu aheca atamaig unyimia, im ilpu aheca atahig unyimia, akis atcijai ra aijaua, athi um athi ehni, mika eri ago nitai merit ura, um imiasuol ra, mika eri auaraheca unyimia, um idivaig ilpu aheca atamaig unyimia im ilpu aheca atahig unyimia.

¹⁷ Va nitai inigki et ika a Ihova; Akis eti atahaijeg nyak aijaua, par asuptecnaig intup eklim amen ehele ilpu etwamia, im ilpu atimi eblaamnem unyimia, aijaua asega athi um athi ehni: akumu ato aijaua mika, ek atcijaig pan caua ainyak an nedoa, im lep an mas alupas, im lep an numlaig has; ekpu lep ika ainyak eri imiapan caua irai iji elcau asega an nobohtan. Et uce intas o Ihova.

¹⁸ Ekpu atcijaig pan ilpu atimi iji ig ainyak, era mun auahas intas etipup unyak ara, um eti imiaiji niji tas an tas etipup iyehki, eris ati ara an nuhup unyak, eris wat ucsakowai inhakli kurimatau iyehki ara, um atga an niblan nahaijin im nahaijin;

¹⁹ ekpu atcijaig pan ainyak ilpu atimi alupas an pece Juta, im ilpu atimi alupas Jerusalem, im ilpu aheca esjilid, im ilpu atimi ahlap, im lep atimi asega an pece iji ig, eris atga ara an niblan nahaijin im nahaijin u inhakli kurimatau;

²⁰ ekpu idim atcijaig pan ra ainyak an nikmai ilpu atimi tak atimi ira ra, im lep an nikmai ilpu atimi iji ig era ika ara eri atgei ra ara: erupu hegaig nohura emesmas niji man an nauanohatag, im lep niji itai eklim edo irai pece.

²¹ Ekpu atcijaig Setekaia natimarid au pece Juta ainyak im lep ilpu atimi alupas o un an nikmai ilpu atimi tak atimi iran, im lep an nikmai ilpu atimi iji ig era ika ara eri atgei ra ara, im lep an nikmai ilpu eucsupo u natimarid an pece Babelon, era mun udei caua ara um atga ura.

²² Et ika a Ihova, Akumu ato aijaua mika, ekpu tas alep ainyak um imiadumoij pam ra an maliyum inigki; erupu aat iran ara, um atoraliak, um atnamud an cap: ekpu ika ainyak yi ahyuahyu niji maliyum an pece Juta inyi eti amen iran tah natimi.