Jeremaia 33 - Intas Etipup

NUARIN TAS ALUPAS 33.

1 Et asan tas upyi asaig a Atua mika yi aiheuc vai ilpu ohna um imiadumoij pam ra. 9 Erupu amen upene ara. 12 Erupu aminjinaig upene ra a ilpu atimarid ura. 15 Erupu lep eteuc ehele ra a ilpu atimarid ura im ilpu atimi ahlap ura. 20 Erupu lep amen aktit a ilpu mapora um upene.

¹ ERIS wat atapnes Jeremaia an nimnim an neom ipjin, is aketo intas o Ihova um yetpam ehelen, um ika,

² Et ika a Ihova, aien aigki et ago itai aien, Ihova marom, aien aigki et anacanac aieu, mika yi ati aktit; et idan Ihova;

³ Namu ahlaig vai nyak aiek, ekpu ho ainyak, um asuptecnaig ehelum niji itai alupas im niji itai esjilid iji ig, na mun eti ato aiek.

⁴ Et idim ika a Ihova, Atua u nup Isreel, va neom iji ig an maliyum inigki, im lep va neom iji ig u ilpu atimarid an pece Juta, eris alcapdicraig irai edoon obohtan eris assijai, im lep an nedoa;

⁵ Era mun ham ara mika eri ati nedoa vai nup u Kaltia, ja etpu ohua iran nohui ilpu atimi iji ig, ek mun atgei ra ainyak an nedemda unyak im lep an tavaitap unyak, im lep inig, ek mun adenaig nesganimtak ainyak vai inmaliyum inigki vai nedo has asega ura.

⁶ Akumu ato aijaua mika, ekpu imiapam nitai cehcehe vai ra ainyak, eri umumoh ara; ekpu ago cehcehe ra ainyak, um ehvaig ehele ra mika et alupas nigpa im ninveijec.

⁷ Ekpu imiadumoij pam nup u Juta iji ig ainyak im lep nup Isreel iji ig eris imiapan ra irai iji taka pece, um ikni aktit ra, et idivaig an nopan uhup.

⁸ Ekpu ago adicinadicin ra ainyak vai nedo has asega ura, era mun ago vai nyak vaig ara; ekpu ohpodohpod nedo has asega ura ainyak, era mun ago vai nyak vaig ara, um imipalea intas unyak vaig ara.

⁹ Erupu itai imiacitak ara vai nyak, im lep nitai cediaig, im nitai esjilid, an nuhup u nup urai iji pece asega an nobohtan iji ig, erupu ahgei intas vai itai upene asega iji ig ara ek alupai ra ainyak: erupu lep imtitaig ara um eucjeucjeucaij vai niji itai upene asega im namen upene asega inig ek leh vai ra ainyak.

¹⁰ Et ika a Ihova, An nuarin inigki eka asaig vaig aijaua, um ika. Et ahyuahyu, et eti amen iran tah natimi, um eti amen iran tah nitai eklim edo irai pece, nikavaig, irai maliyum iji ig an pece Juta, im lep irai efalaig iji ig an maliyum Jerusalem, et ahyuahu, um umaruma, et eti amen iran tah natimi, ka tah nitai eklim edo irai pece,

¹¹ uhpu lep ahgei nohrai ilpu atimi imiacitak iran, im nohrai ilpu atimi cediaig, im nohrai ilpu atamaig atidai, im nohrai ilpu atahig atidai, im nohrai ilpu atimi iji ig erupu ika ara, Akumu imiahpas Ihova esjilid acen aijaua: et idim upene a Ihova; et amen naiheuc o un irai iji mesese: im lep nohrai ilpu atimi iji ig erupu imiapam anliin neom u Ihova nitai ahlap imiahpas ara. Vaig inig nikavaig, et ika a Ihova, Ekpu imiadumoij pam nup uran pece inigki ainyak eris imiapan ra irai iji taka pece, mika eri idivaig an nopan uhup.

¹² Et ika a Ihova esjilid acen; An nuarin inig et ahyuahyu, et eti amen iran tah natimi, ka tah nitai eklim edo irai pece, im lep irai maliyum asega iran, erupu aketo a ilpu atimi asgi siip, um amen, um asgi niji pak irai siip ura.

¹³ Et ika a Ihova, Etpu aketo niji pak irai siip um atga itlian nikmai natimi esvi ra, irai maliyum irai edoon, im lep irai maliyum an niskanse, im lep irai maliyum an pece inig et ahes nuritoga atahig iran, im lep an pece Benjamin, im lep irai uarin ubutpotet Jerusalem, im lep irai maliyum an pece Juta.

¹⁴ Et ika a Ihova, Akumu ato aijaua mika, etpu yetpam nopan iyehki ekpu ehneijed intas upene iyehki ainyak kis upyi asaig ainyak ehele nup Isreel im lep ehele nup u Juta.

¹⁵ Etpu idim uco, irai adiat iji ehki, im lep an nopan iyehki, ekpu ika ainyak yi ahes irai Tevit Inran va nedo atoh, um edel; etpu aru an nedo inveijec aieu um tas alep atoh an pece inigki.

¹⁶ An nopan iyehki uhpu imiatamaig nup u Juta, erupu lep amen upene a nup u Jerusalem: etpu anvi nidan inigki a Ihova, par ika, NEDO ATOH UJA.

¹⁷ Vaig inig nikavaig, et ika a Ihova, Inyi eti ti tah irai ilpu mapoi Tevit par atimarid irai nup Isreel;

¹⁸ im lep inig, inyi eti ti an nuhup unyak a natimi inig etpu ahes ehele ilpu atimi ahlap ilpu mopoi Livai par ahlap irai iji itai ahlap er atnamud, um atnamud nahaiji itai ahlap er hegaig, um lep ahlap irai itai ahlap irai iji opan asega.

¹⁹ Is lep yetpam intas o Ihova ehele Jeremaia, um ika,

²⁰ Et ika a Ihova, El et ehka vai caua par auahas intas etipup unyak vai nadiat, im lep intas etipup unyak va nepig, mika yi jim eteuc nadiat im lep nepig an nopan urau;

²¹ et idim uco, et lep ehka par auahas intas etipup unyak vai Tevit naheca unyak, mika yi jim isjeupigmoig yin tah mapon, um atimarid; im lep vai ilpu mapoi Livai ilpu atimi ahlap marom, ilpu aheca unyak.

²² Et idim ehka par esvi niji moijeuv an nohatag, um asjaaicnaig nauanavig an nohmunjap: et idim uco, ekpu ika ainyak eri ahinag acen a ilpu mapoi Tevit naheca unyak, im lep ilpu mapoi Livai iji ig era auanaheca unyak ara.

²³ Is lep yetpam intas o Ihova ehele Jeremaia, um ika,

²⁴ Namu idim aktaktai intas inigki aiek era mun asaig a nup igcaki, um ika, Et mun atcijaig ilpu ahri natimi et ero a Ihova, is ehtai ra aien; era mun amcel vai ilpu atimi unyak ara, mika eri jim up uran nelcau unyak ara an nuhup u ra sji igki.

²⁵ Et ika a Ihova, Ek mun ati aktit intas etipup unyak ainyak va nadiat im lep va nepig, im lep inig, ek mun idim ikni aktit ainyak niji edo irai itai an nohatag im nobohtan;

²⁶ et idim uco, ekpu idim ikni aktit ainyak ilpu mapoi Jekob; im lep ilpu mapoi Tevit naheca unyak, mika ki ehtai hal irai ilpu mapon par atimarid irai ilpu mapoi Ebraham, im Aisak, im Jekob: vaig inig nikavaig, ekpu imiadumoij pam ilpu atimi ura iji ig ainyak eris imiapan ra irai iji taka pece, ekpu lep aiheuc vai ra ainyak.