Jeremaia 32 - Intas Etipup

NUARIN TAS ALUPAS 32.

1 Et ati Jeremaia an neom, ipjin a Setekaia vai intas asuptecnaig o un. 6 Et auanimtan nuarin nobohtan u Hananiil a Jeremaia. 13 Eris idim ika ui aminjinaig itaasviitai iran a Beruk, mika yi itai a jaaicnaig va nimiadumoij pam u atimi. 16 Et alaigaheni a Jeremaia um asan tas ehti ehele Atua. 26 Et asan tas aktit a Atua mika uhpu imiapan atimi irai taka pece va nedo has ura, 36 ja et lep ika aien yi aiheuc vai ra um imiadumoij pam ra.

¹ INTAS inig is ahes ehele Ihova um yetpam ehele Jeremaia nigki, an mesese tend irai Setekaia natimarid an pece Juta, inmesese eetiind irai Nebukatnesar iyehki.

² An nopan iyehki eris arehed Jerusalem a ilpu eucsupo u natimarid an pece Babelon um ati nedoa iran: eris lep atapnes Jeremaia naprofeta an nimnim u neom ipjin iyehki, is eteuc anliin nokoro u natimarid an pece Juta.

³ Is atapnes yin eahki a Setekaia natimarid an pece Juta, um ika, Na a uri aiek par asuptecnaig intas, um ika, Et ika a Ihova, Akumu ato aijaua mika, ekpu atcijaig inmaliyum inigki ainyak an nikmai natimarid an pece Babelon; etpu idim atoraliak aien;

⁴ etpu eti ahapan va nikmai nup u Kaltia a Setekaia natimarid an pece Juta, ja uhpu idim atcijai yin an nikmai natimarid Babelon, arupu tas jipe arau, arupu lep alum jipe rau arau;

⁵ et lep ika a Ihova, etpu imiapan Setekaia Babelon aien, etpu amen eahki aien um yetpan an nopan iyehki ekpu ateghe yin ainyak: aku wit ago nedoa vai nup u Kaltia aijaua, akupu eti esjilid ira ra aijaua.

⁶ Is um ika a Jeremaia, Is yetpam ehelek intas o Ihova, um ika,

⁷ Namu ato aiek mika, etpu yetpam ehelum a Hanamiil inhalav atamaig u Sallum etwai etmam, um ika, Namu auanimtan aiek imtam nuarin nobohtan unyak inig et eteuc Anadod: vaig inig nikavaig, et tau iram par auanimtan.

⁸ Is yetpam ehelek a Hanamiil inhalav atamaig u etwai etmak an nimnim u neom ipjin et idivaig intas o Ihova, um ika ehelek, Ek ika ainyak namu auanimtan aiek imtam nuarin nobohtan unyak inig et eteuc Anadod, an pece Benjamin: vaig inig nikavaig, et tau iram par auanimtan, et lep tau iram par ohuun; namu auanimtan aiek imtam. Kis idim ato ainyak mika, is ahes ehele Ihova intas inigki.

⁹ Kis auanimtan nuarin nobohtan iyehki ainyak ehele Hanamiil inhalav atamaig u etwai etmak, is eteuc Anadod, um asjaaicnaig mune imi yin, nikavaig, niji uari silver is seventiin.

¹⁰ Kis aged nitaasviitai ainyak, um atapnes ipjin, um lucsei ilpu atimi ecetai, um asjaaicnaig mune iyehki imi yin an nitai asjaaicnaig.

¹¹ Kis leh nitaasviitai va nauanimtai itai erahki ainyak, nikavaig, iyehki eris atapnes ipjin is eteuc iran intas atcijaig nobohtan im intas asuptecnaig vaig, im lep iyehki eris eti atapnes:

¹² kis lep alupai Beruk inhal u Niraia, inhal u Measiya, nitaasviitai va nauanimtai itai erahki ainyak, an nuhup u Hanamiil inhalav atamaig u etwai etmak, im lep an nuhup u ilpu atimi ecetai eris aged nidara ara an nitaasviitai auanimtai itai erahki, im lep an nuhup u nup u Juta asega eris ateuc ara an nimnim u neom ipjin.

¹³ Kis lep tas emda ehele Beruk ainyak au nuhup ura, um ika,

¹⁴ Et ika a Ihova esjilid acen, Atua u nup Isreel; Namu leh nitaasviitai eraigki aiek, nikavaig, nitaasviitai auanimtai itai inig eris atapnes ipjin, im lep inig eris eti atapnes; um atise an nipjinitai an tan apol, mika yi amen irai adiat inyi ahinag.

¹⁵ Et idim ika a Ihova esjilid acen, Atua u nup Isreel; Erupu aketo natimi um ohuun imnim im uari obohtan im okoro vaine an pece inigki.

¹⁶ Kis wat alupai Beruk inhal u Niraia nitaasviitai auanimtai itai iyehki ainyak, kis alaigaheni vai Ihova ainyak, um ika,

¹⁷ Awe, ak Ihova natimarid! as idim ago nohatag aiek im lep nobohtan an nemda alupas unyum, im lep an nikmam as atgeig yi apidi aiek, et lep eti ehka vai euc tah nitai:

¹⁸ na aiheuc va atimi et ahinag acen aiek, um lep aru nedo has u ilpu atimil ura irai ilpu hal ura era asjeupigmoig ra ara: na Atua alupas aiek, um emda, et idam Ihova esjilid acen;

¹⁹ et esjilid intas anacanac unyum, et lep ahinag acen niji auritai unyum: na almaijidjid nedo o atimi asega aiek, mika an aru et idivaig nedo ura asega, um idivaig nauritai iji ig era ago ara, athi um athi ehni:

²⁰ as ago niji itai asjaaicnaig aiek im lep niji itai imiali an pece Ijipt, um imihum pam an nopan inig, im lep an pece Isreel, im lep ira atimi an taka pece; as lep ika aiek yi esjilid nidam, et idivaig au nopan inig;

²¹ as lep iknipagki nup Isreel ilpu atimi unyum aiek an pece Ijipt irai iji itai asjaaicnaig, im lep irai iji itai imiah, im lep an nemda unyum, im lep an nikmam as atgeig yi apidi aiek, im lep an nimtitaig alupas;

²² as lep alupai ra inpece inigki aiek, as asaig yi aktit intas vaig aiek ehele ilpu mapora par alupai ra, inpece inig et amen alupas nidenided im hune iran;

²³ eris lep apam ara um ohuun inpece inigki; ja eris eti atahaijeg nohram ara, um eti imiaiji intas alep unyum; eris eti ago tah nitai ara irai itai iji igki as tas alep vaig ehele ra aiek mika eri ago: va nitai inigki as ika aiek yi yetpam ehele ra nohocred asega inigki:

²⁴ et idim ubutpotet u inmaliyum niji edoon an nobohtan ura eris uctaig ara, mika eri atoraliak; eh mun atcijaig inmaliyum pan an nikmai nup u Kaltia iji ig era aat iran ara, va nedoa, im lep va numlaig has, im lep van mas alupas: et idim eteuc nitai inig as upyi asaig aiek; na idim almoi aiek.

²⁵ Ja na mun ika ehelek aiek, ak Ihova Natimarid, Namu aua-nimtan nuarin nobohtan inigki aiek irai mune, um lucsei ilpu atimi mika eri ecetai; ja eh mun atcijaig inmaliyum pan an nikmai nup u Kaltia.

²⁶ Is yetpam intas o Ihova ehele Jeremia, um ika,

²⁷ Namu ato aiek mika, ek Ihova ainyak, Atua u atimi asega: et eti elika vai nyak tah nitai.

²⁸ Va nitai inigki, et ika a Ihova; Namu ato aiek mika, ekpu atcijaig pan inmaliyum inigki ainyak an nikmai nup u Kaltia, im lep an nikmai Nebukatnesar natimarid an pece Babelon, etpu atoraliak aien:

²⁹ erupu apam a nup Kaltia iji ig era aat iran ara, um atnamud inmaliyum inigki an cap, im lep niji eom iji ig, eris ahlap irai itai auanipin upene irai lola eom imi Beal, um atladwi iran niji itai ahlap er umnyi imi ilpu atmas irai taka pece, mika eri auahas inliinmopok.

³⁰ Et ika a Ihova, Era mun ago nedo has ache a nup Isreel im nup u Juta an nuhup unyak ahes an nopan uhup um imihum pam an nopan inig: era mun auahas inliinmopok ache a nup Isreel an nauritai irai ikmara.

³¹ Kis edemda ainyak um atavaitap vai inmaliyum inigki ahes an nopan iyehki eris uctaig um imihum pam an nopan inig; mika ki atipagki an nuhup unyak,

³² va nedo has asega inig u nup Isreel, im nup u Juta, era mun ago ara par auahas inliinmopok, ara marom, im lep ilpu atimarid ura, im ilpu atimi alupas ura, im ilpu atimi ahlap ura, im ilpu profeta ura, im lep ilpu atimi an pece Juta, im ilpu atimi iji ig era amen Jerusalem ara.

³³ Era mun atidjira irak ara, um eti alum nyak: kis esege imi ra ainyak, maiya, kis atidai an nuhialeg ainyak um esege imi ra, ja et mun eti atahaijeg tah ira ra par leh nesege imi yin.

³⁴ Era mun ikni niji itai er amcel vaig ura ara an neom inig er anvi nidak iran, par auahas nuarin inig et itap.

³⁵ Era mun uctaig niji uarin ijinies iji ig ara vai Beal, et amen an niskanse u inhal u Hinnom, mika eri atnamud an cap ilpu halav atamaig ura im ilpu halav atahig ura vai Molok; kis idim acaiji nedo inigki ainyak, kis esjum ainyak vaig, mika eri ago nedo inig er amcel vaig, vai eri jim ago nedo has vaig a nup u Juta.

³⁶ Im lep inig, et ika a Ihova, Atua u nup Isreel, vai inmaliyum inig eka ika aijaua vaig, Uhpu atcijaig pan an nikmai natimarid an pece Babelon va nedoa, im lep va numlaig has, im lep van mas alupas;

³⁷ Akumu ato aijaua mika, ekpu asjapicnai ra ainyak ahes irai iji pece asega iji ig, ekmun ahau pan ra iran ainyak an nedemda unyak, im intavaitap unyak, im nehniv alupas unyak; ekpu lep imiadumoij pam ra ainyak an nuarin inigki, um ika eri amen upene iran ara:

³⁸ erupu lep ilpu atimi unyak ara, ekpu lep Atua ura ainyak:

³⁹ ekpu lep alupai ra inliinmopora inyi tup ethi ache ainyak, im nedo inyi tup ethi ache, mika eri imtitai nyak ara irai iji opan asega, mika eri amen upene ara, im lep ilpu hal ura eri asjeupigmoig ra:

⁴⁰ ekpu lep ati intas etipup inig ehele ra ainyak inyi eti lep ti, mika ki eti ahidaig pan nyak ainyak ehele ra, jam ago nedo upene vai ra; ja ekpu ika ainyak eri imtitai nyak ara an liinmopora, mika eri jim udei nyak ara.

⁴¹ Im lep inig, ekpu imiacitak ra ainyak par ago nedo upene vai ra, ekpu lep ikni aktit ra an pece inigki ainyak an liinmopok asega im lep an nesgak asega.

⁴² Et ika a Ihova, Kis idim imiapam nohocred alupas asega inigki ainyak imi nup igcaki, et idim uco, ekpu imiapam vai ra ainyak nitai upene asega iji igki kis upyi asaig ainyak ehele ra.

⁴³ Uhpu auarimtai uari obohtan an pece inig eka tas vaig aijaua, um ika, Et umaruma et eti amen iran tah natimi ka tah nitai eklim edo irai pece; eh mun atcijaig pan an nikmai nup u Kaltia.

⁴⁴ Erupu auarimtai uari obohtan irai mune natimi, um aged itaasviitai auanimtai itai, um atapnes ipjin, um ika ehele ilpu atimi ecetai eri aged nidara iran, an pece Benjamin, im lep irai uarin ubutpotet Jerusalem, im lep irai maliyum an pece Juta, im lep irai maliyum irai edoon, im lep irai maliyum an niskanse, im lep irai maliyum an pece inig et ahes nuritoga atahig iran: vaig inig nikavaig, et ika a Ihova, ekpu imiadumoij pam ilpu atimi iji ig ainyak eris imiapan ra irai iji taka pece.