Jeremaia 31 - Intas Etipup

NUARIN TAS ALUPAS 31.

1 Nimiadumoij pam u nup Isreel. 10 Nasuptecnaig vaig iran. 15 Er ago eropse inliinmopoi Rejel an nehtigtaig o un. 18 Et wat adumoij an liinmopon a Ifreem er imiadumoij pam yin. 22 Era ahau pan ilpu atimi emda a nup an nakalasia u Kristo. U Et aminjinai ra a Kristo. 31 Intas etipup o un. 35 Era amen aktit a nup an nakalasia u Kristo. 38 Era ahinag acen ara.

¹ ET ika a Ihova, An nopan iyehki ekpu Atua u ilpu eteuc asega u nup Isreel ainyak, erupu ilpu atimi unyak ara.

² Et ika a Ihova, Eris aiheuc vai ilpu atimi iji ig an namasacen eris eti atgei ra an nedoa; nup Isreel marom, kis wat apan ainyak um ika eri atumop ara.

³ Is ehcohos pam ehelek a Ihova itu acen, um ika, Kis aiheuc vai euc ainyak an nopan iyehki itu acen: va nitai inigki et mun eteuc naiheuc unyak vai euc itu um lep uhum pam an nopan inig.

⁴ Ekpu aketo ainyak um uctai euc, uhpu lep uctai euc, ak inhalav atahig u nup Isreel: napu aketo aiek um aso upene euc, um ehcohos pam, um aliaujai ehele ilpu atimi imiacitak.

⁵ Napu aketo aiek um ahwaig okoro vaine irai edoon Sameria: erupu ahwaig vaine a ilpu atimi ahwaig, um hegaig nohwai vaine et idivaig tup nitai hegaig.

⁶ Etpu yetpam nopan iyehki, erupu ahlaig a ilpu atimi aminjinaig itai an nedoon Ifreem, um ika. Akumu atidai aijaua, intumu aridjipan Saion akaija ehele Ihova Atua uja.

⁷ Et ika a Ihova, Akumu acesaces nohranitai aijaua um imiacitak vai ilpu mapoi Jekob, um asaig intas cediaig ehele nup urai pece iji ig era esjilid ara: akumu asuptecnaig aijaua, akumu imiahpas Atua aijaua, um ika, Ak Ihova, namu imiatamaig ilpu atimi unyum aiek, ilpu ahri nup Isreel marom.

⁸ Akumu ato aijaua mika, ekpu lucsei ra ainyak an pece inig et ahes iran narutu um imiapam ra, ekpu lep asjapicnai ra ainyak irai tid an nobohtan, erupu ahced ra a ilpu atimi apat nesganimtara, im ilpu atimi asvahteuc neduora, im ilpu takata opoc, im ilpu takata iji ig erupu ika ara eri apos ilpu hal ura: erupu ehradumoij pam igcaki niji ira atimi inyi alupas.

⁹ Eru wit apani ara, erupu ehtigtaig ara, eku wit imiapam ra ainyak, erupu alaigaheni ara: ekpu atau ira ra ainyak ui ofowai an nefalaig atoh, erupu eti epihtau iran ara: ek idim etmai Isreel ainyak, et hal unyak inmeto a Ifreem.

¹⁰ Akumu atahaijeg intas o Ihova aijaua, ak nup urai iji pece, um asuptecnaig ehele nup urai iji pece u unjap itac acen, um ika, Aien is imiterimterim nup Isreel aien etpu asjapicnai ra aien, um aminjinai ra, et idivaig et aminjinaig inpak irai siip o un a natimi asgi siip.

¹¹ Et mun imiatamaig ilpu mapoi Jekob a Ihova, um imiaras ra vai nikmai natimi inig is emda aien um esjilid ira ra.

¹² Va nitai inigki erupu apam ara um acesaces nohranitai an nuarin ijinies Saion, erupu ehrahtag pam ara par asipiai niji itai upene u Ihova, vai hwiit, im lep vai nide vaine, im lep vai narakei oliv, im lep vai hakli siip, im lep vai hakli kurimatau: etpu imiacitak inliinmopora um idivaig nahapol eh leh inwai urin; erupu eti lep taigtaig ara va nehtele ra.

¹³ Erupu ehracesaces nohranitai a ilpu atahig, im lep ilpu takuras im ilpu efatimi, inyi tup ethi ache nimiacitak ura: ekpu ika ainyak yi isjeupigmoig nehtigtaig ura incediaig, ekpu tas upene ehele ra ainyak, um ika eri imiacitak ara um ahnag an nohocred ura.

¹⁴ Et ika a Ihova, Ekpu ika ainyak eri geije a ilpu atimi ahlap vai niji itai hegaig adale, erupu lep geije a ilpu atimi unyak va niji itai hegaig upene unyak.

¹⁵ Et ika a Ihova, Eris ahgei nohran tah Rema, intaigvaig, im nehtigtaig alupas; is imitaig ilpu hal o un a Rejel, is ika aien inyi eti eropse inliinmopon vai ilpu hal o un, nikavaig, eris atiih ara.

¹⁶ Et ika a Ihova, Akumu atinau aijaua, um jim yah nidiimtamia: vaig inig nikavaig, et ika a Ihova, Uhpu aru nauritai unyimia; erupu ahes an pece u ilpu atimi tak atimi iramia ara um adumoij pam igcaki.

¹⁷ Et ika a Ihova, Akumu aitgaig niji itai upene aijaua an nopan apitac unyimia, erupu adumoij pam a ilpu mapomia um yetpam irai iji uari pece ura.

¹⁸ Ek mun idim ahgei Ifreem ainyak is imitaig yin aien, ika. As aredei nyak aiek eh mun aredei nyak, ek idivaig kurimatau inig ainyak is eti umjijeuc an nasore: namu imiadumoij pam nyak aiek, ekpu adumoij pam ainyak; na idim Ihova Atua unyak aiek.

¹⁹ Is wat, imiadumoij pam nyak aien, kis adumoij an liinmopok ainyak; is wat acaiji nyak aien, kis ahpu neduok ainyak: kis ehcamai ainyak, maiya, is imtimlai nesganimtak ainyak, vaig inig nikavaig, kis apos nitai ehcamai vaig u intakuras unyak ainyak.

²⁰ Et ika a Ihova, Et idim halav cap unyak a Ifreem; et halav atimi unyak aien; ek mun imiehva upene yin ainyak ahes an nopan iyehki kis tas ehelen ainyak um imihum pam an nopan inig: va nitai inigki ek aiheuc vai yin ainyak; ekpu idim eti eriss iran ainyak.

²¹ Namu atijai niji itai asjaaicnaig an nefalaig imtam aiek, namu aduwi niji auicai opra aiek: etmu aktaktai nefalaig asega inliinmopom aiek: namu adumoij pam aiek an nefalaig inig as apan iran aiek, ak inhalav atahig u nup Isreel, adumoij pam aiek irai maliyum iji igki unyum.

²² Na ahced jipe aiek um yetpan an nahopan, ak inhalav atahig imipalea? et mun ago nitai mat an pece a Ihova, Etpu ahau pan natamaig emda a intakata.

²³ Et ika a Ihova esjilid acen, Atua u nup Isreel; Erupu asaig intas inigki ara an pece Juta im lep irai maliyum iran, eku wit imiadumoij pam ilpu atimi iji ig ainyak eris imiapan ra an taka pece, um ika, Etmu asan tas acis yi alwai euc a Ihova, ak nuarin era amen iran a ilpu atimi asaig intas atoh, im nedoon era amen iran a ilpu atimi upene.

²⁴ Erupu ehramen an pece Juta, im lep irai iji maliyum asega iran, a ilpu atimi ahapol, im lep ilpu atimi asgi siip.

²⁵ Ek mun alumai ilpu atimi ahvig wai ainyak, ek mun ika ainyak eri geije a ilpu atimi ehtele ra asega.

²⁶ Is wat ti pan itac nitai inigki, kis aiji lahlah ainyak, um alum itai; kis idim umjeg upene ainyak.

²⁷ Et ika a Ihova, Akumu ato aijaua mika, etpu yetpam nopan iyehki ekpu ika ainyak ehele nup Isreel im lep ehele nup u Juta eri ahinag natimi ura, im lep niji itai eklim edo irai pece ura.

²⁸ Et ika a Ihova, Ek mun idim aminjinaig ra ainyak, mika ki atecrei ra, um alcapdicrai ra, um amejatpuh ra, um auahas ra, um ehcerucai ra; etpu idim uco, ekpu aminjinaig ra ainyak, mika ki lep uctai ra, um ahwai ra.

²⁹ An nopan iyehki erupu eti lep ika ara, Era mun hegaig nohwai vaine acen a ilpu etmara, eh lep asjakai nipjineucse ilpu hal ura.

³⁰ Ja erupu emesmas va nedo has ura natimi asega, athi um athi ehni: uhpu asjakai nipjineucse atimi asega era hegaig nohwai vaine acen ara, athi um athi ehni.

³¹ Et ika a Ihova, etpu yetpam nopan iyehki ekpu ati intas etipup mat ainyak ehele nup Isreel, im lep ehele nup u Juta:

³² inyi eti idivaig intas etipup iyehki kis ati ainyak ehele ilpu retpora an nopan iyehki kis asjiraig nikmara ainyak mika ki iknipagki ra ahes an pece Ijipt; vaig inig nikavaig, et ika a Ihova, eris eti apos intas etipup unyak iyehki ara, kis wat idivaig natamnyura ainyak:

³³ jai intas etipup inig ekpu ati ainyak ehele nup Isreel nigki; et ika a Ihova, Etu wit ti pan itac nadiat iji ehki, ekpu ati intas alep unyak ainyak irai aktaktai ura, um lep aged irai liimopora; ekpu Atua ura ainyak, erupu lep ilpu atimi unyak ara.

³⁴ Et ika a Ihova, Erupu eti lep esege imi ilpu atimi eblaamnem ura, im lep ilpu etwara natimi asega, athi um athi ehni, um ika, Namu ato Ihova aiek: vaig inig nikavaig, erupu ato nyak ara asega ahes irai ilpu atimi alupas ira ra um yetpan irai tup atimi ira ra: ekpu ohpodohpod nedo acalacal ura ainyak, um eti lep imiehva nedo has ura.

³⁵ Et ika a Ihova, aien aigki is ati nagesega aien mika yi itai lah an nadiat, um esiaig inmohoc im niji moijeuv, mika yi itai lah an nepig, et ika aien yi ahuisahuis nigpa injap et wat auoc nepeau; et idan Ihova esjilid acen:

³⁶ et ika a Ihova, El et ehka par iknipagki nitai iji igki ek mun ikni ainyak, et idim uco, et elika par iknipagki nup Isreel mika eri jim amen an nuhup unyak ara um yetpan irai iji mesese.

³⁷ Et ika a Ihova, El et ehka par asjaaicnaig nohatag ijinies, um ahilek nededuon nobohtan sepamki, et lep ika a Ihova, et idim uco, et ehka vai nyak par atcijaig nup Israel asega va nedo asega inig eris mun ago ara.

³⁸ Et ika a Ihova, Akumu ato aijaua mika, etpu yetpam nopan iyehki uhpu uctaig inmaliyum vai Ihova, ahes an neom ijinies u Hananiil um yetpan an neucse nathatahau an nesvi vai inmaliyum.

³⁹ Erupu lep aketo ara um ahiaig pan inya asjaaicnaig juju an nedoon Cereb, um lep arehed irai Coad.

⁴⁰ Etpu lep itap vai Ihova niskanse asega inig et amen iran nohui atimi emesmas, im nohpa, im lep niji ahapol asega um yetpan an wai yah Kitron, um lep yetpan an nesvi vai inmaliyum an neucse nathatahau inig era atga iran niji hors an ridjai o un; uhpu eti atecrei, um eti lep alcapdicraig, um yetpan irai iji mesese,