Jeremaia 30 - Intas Etipup

NUARIN TAS ALUPAS 30.

1 Et ehvaig nadumoij pam u nup u Juta ehele Jeremaia a Atua. 4 Etu wit ti pan itac nohocred ura uhpu imiatamai ra. 10 Et ago eropse inliinmopoi ilpu mapoi Jekob aien. 18 Etpu aiheuc vai ra a Atua um imiadumoij pam ra. 20 Uhpu auahas ilpu atimi auatatimi.

¹ INTAS inig is ahes ehele Ihova um yetpam ehele Jeremaia nigki, um ika,

² Et tas a Ihova Atua u nup Isreel, um ika, Namu aged an ni-taasviitai aiek intas asega iji ig, ek mun asuptecnaig ehelum ainyak.

³ Et ika a Ihova, Etpu idim yetpam nopan iyehki ekpu imiadumoij pam ilpu atimi unyak ainyak nup Isreel im nup u Juta iji ig eris arore ra um imiapan ra irai taka pece: et lep ika a Ihova, ekpu imiadumoij pani ra ainyak an pece inig kis alupai ilpu retpora ainyak, erupu idim ohuun ara.

⁴ Intas iji igki is asuptecnaig a Ihova vai nup Isreel im lep vai nupu Juta ji igki.

⁵ Et idim ika a Ihova; Inta mun ahgei nohrai ilpu atimi eucjeucjeucaij akaija, era imtitaig ara, et ti nigpa vai ra.

⁶ Akumu ahodaig aijaua um almoi, et ika a natamaig yi apos inhal o un, ka oʼo? et echamecha ek almoi ilpu atamaig asega ainyak et amen nikmara an wauahid ura, athi um athi ehni, et idivaig intakata inig et ika aien yi apos inhal o un, et lep imtimlai nesganimta atimi asega?

⁷ Awe! et esjilid nopan iyehki, et eti eteuc tah et idivaig: nopan ohocred u ilpu mapoi Jekob iyehki; ja uhpu imiatamai ra vaig.

⁸ Et ika a Ihova esjilid acen; An nopan iyehki ekpu ahtasvi nasore o un ainyak um atipagki an nauiwamia, um asuamud niji wau iramia, erupu eti lep ika a ilpu atimi irai taka pece aki aheca ura aijaua:

⁹ ja erupu aheca u Ihova Atua ura ara, im lep u Tevit natimarid ura, ekpu imiatidai jai yin vai ra ainyak.

¹⁰ Et ika a Ihova, Va nitai inigki namu jim imtitaig aiek, ak Jekob, naheca unyak, namu jim eucjeucjeucaij aiek, ak Isreel: vaig inig nikavaig, ekpu imiatamaig euc ainyak an pece itac acen, im lep ilpu hal unyimia an pece inig eris imiapan ra eahki; etpu adumoij pam a Jekob, etpu atumop aien, etpu amen igpa aien: etpu eti imiimtacimtac yin tah.

¹¹ Et ika a Ihova, Ek idim amen ehelum ainyak mika ki imiatamaig euc; el ek auahas ehni nup urai iji pece asega iji ig ainyak ek mun ahau pan euc iran ainyak, ekpu eti auahas ehni euc ainyak: ja ekpu eklim acaiji euc ainyak, um eti aru alupas iram.

¹² Et ika a Ihova, Et ehka par ago upene nuarin opapig ham, et esjilid inmocop iram.

¹³ Et eti eteuc tah natimi par atau iram, um arore inmocop iram: et ti tah inwai emehe par ucni inmocop iram.

¹⁴ Era mun ahnag iram a ilpu apa unyum asega; era eti ahodai euc ara; ek mun ahcai euc ainyak et idivaig nedo o natimi tak atimi iram, ek mun aredei euc ainyak et idivaig nedo o natimi edemda vai euc, vaig inig nikavaig, et ahinag acen nedo has unyum; et lep alupas acen nauatatimi unyum.

¹⁵ Na a uri aiek par taig vai nuarin opapig iram? et ehka par ago upene nuarin opapig iram, ek mun ago nedo inigki vai euc ainyak, vaig inig nikavaig, et ahinag acen nedo has unyum; et lep alupas acen nauatatimi unyum.

¹⁶ Ja uhpu auahas ra sji ig era auahas euc ara; uhpu imiapan an taka pece ilpu atimi tak atimi iram asega, inyi eti amen tah; uhpu atoraliak itai u ra sji ig era atoraliak itai unyum ara, uhpu ehcerucai ra sji ig asega era ehcerucai euc ara.

¹⁷ Et ika a Ihova, Ekpu ago cehcehe euc ainyak, ekpu ika ainyak yi mah inmocop iram; vaig inig nikavaig, eris anvi nidam ara par ika Nohna, um ika, Saion mun igki, et eti ahodaig vaig tah natimi.

¹⁸ Et ika a Ihova, Akumu ato aijaua mika, ekpu imiadumoij pam niji eom atga iji ig u Jekob ainyak, eris imiapan an taka pece, ekpu lep aiheuc vai niji imnim iran o un ainyak; uhpu uctaig inmaliyum an niji edoon o un, erupu amen natimi an nimnim atimi alupas et idivaig an nopan iyehki.

¹⁹ Etpu ahes ehele ra intas naaurinig im lep nohrai ilpu atimi imiacitak: ekpu ika ainyak eri ahinag ara, erupu eti tup eseij ache ara; ekpu ika ainyak eri ilpu atimi alupas ara, jam eti ilpu ihki atimi.

²⁰ Erupu eteuc a ilpu hal ura et idivaig an nopan iyehki, etpu amen aktit nasjapicnaig ura an nuhup unyak, ekpu idim aru nedo o atimi asega iji ig ainyak erupu ehcerucai ra ara.

²¹ Erupu ilpu atimi alupas ura hal ira ra, etpu ahes ira ra a natimarid ura: ekpu ika ainyak yi apam ubutpotet ehelek aien etpu apam ubutpotet ehelek aien: et ika a Ihova, Aien di aigki et asaig an liinmopon aien mika yi apam ubutpotet ehelek?

²² Akupu ilpu atimi unyak aijaua, ekpu lep Atua unyimia ainyak.

²³ Akumu ato aijaua mika, et ahes ehele Ihova narakiraki an nedemda o un, etpu auahas itai narakiraki ahidaig jipe itai inigki um itu: etpu auahas alupas idjini ilpu atimi auatatimi.

²⁴ Etpu eti adumoij pam intavaitap ere u Ihova, um yetpan an nopan iyehki etpu ago ehni aien, um atiid naktaktai u inliinmopon: an nopan apitac akupu ato aijaua.