Jeremaia 3 - Intas Etipup

NUARIN TAS ALUPAS 3.

1 Nedo aiheuc esjilid, u Atua era wat ago ingeijid has a nup u Juta. 6 Et esjilid nedo has u nup u Juta irai edo has u nup Isreel. 12 Intas upene et upyi asaig a Atua ehele ilpu atimi era adumoij pam an liinmopora ara. 20 Et wat acaiji nup Isreel a Atua, um imiacaij ra, era asuptecnaig nedo has ura um ehcamai.

¹ ERA ika ara, El et abraig pagki ehgan tah natimi, el et lep udei jin aien, um apan um amen ehele intak atamaig um ehgan, etpu lep adumoij pan a natimi uhup um leh yin ehgan, ka oʼo? Oʼo; el eh ago nedo inigki, uhpu auahas alupas inpece iyehki; na mun idim ago ingeijid aiek ehele ilpu atamaig et ahinag; ja et ika a Ihova, Namu adumoij pam ehelek aiek.

² Namu iasjipan aiek irai uarin ijinies um almoi; nuarin inig yek eda as eti ago ingeijid iran aiek ehele atimi? As imiiris ra aiek irai efalaig, um aitgaig ra, et idivaig tah nup Arebia an namasacen; na mun auahas inpece inigki aiek an geijid unyum im lep an nedo has unyum.

³ Va nitai inigki et mun eti ehe, et mun lep eti asuol incopda apitac; ja et eteuc; ehelum nesganimtai intakata ago ingeijid, na mun imiisjis aiek, et ehka vai euc mika an ehcamai aiek.

⁴ Namu idim ahlaig vai nyak aiek ahes an nopan inig um yetpan irai iji adiat, um ika, Ak etmak, aiek ahki as atau irak aiek an natahig unyak.

⁵ Etpu idim eti edemda aien irai iji mesese; etpu idim eti atavaitap aien irai iji opan asega; na mun idim asan tas has aiek um lep ago nedo has, na lep emda aiek um imiisjis.

⁶ IS lep ika ehelek a Ihova an nopan iyehki is wat umoh a Josaia natimarid, Na mun ecetai nedo inig aiek et mun ago a intakata imipalea inigki, Isreel marom; nikavaig, et mun aridjai irai iji edoon ijinies asega aien im lep ithai cai mat asega, um ago ingeijid eahki.

⁷ Is wat ago nitai iji igki asega aien, kis ika ainyak, Namu adumoij pam ehelek aiek. Ja et mun eti adumoij pam aien. Is almoi nedo o un a etwan efaifa Juta.

⁸ Im lep inig, kis wat atcijaig intakata imipalea iyehki Isreel ainyak, um alupai yin nitaasviitai vai nabraig pagki yin, va nitai iji igki asega is ago ingeijid vaig aien; kis ecetai ainyak mika et mun eti imtitaig a etwan efaifa Juta, ja et mun lep apan aien um ago ingeijid.

⁹ Is idim uco, is auahas inpece inigki aien vai ingeijid has o un, um ago nedo has vai hat im nilpui cai.

¹⁰ Ja et ika a Ihova, Eris wat ago nitai iji igki asega et mun eti adumoij pam ehelek a etwan efaifa Juta au liinmopon asega, ja et ahcil vai nyak aien.

¹¹ Is ika ehelek a Ihova, Va nitai inigki et esjilid nedo has u intakata efaifa inigki Juta, nai nedo has u intakata imipalea iyehki Isreel.

¹² Namu apan aiek um yiaspan an pece inig et ahes narutu iran, um asuptecnaig intas iji igki, um ika, Et ika a Ihova, Namu adumoij pam ehelek aiek, ak Isreel intakata imipalea, ekpu eti edemda vai euc ainyak; et lep ika a Ihova, Ek aiheuc vai euc ainyak, ekpu eti atavaitap ainyak irai iji mesese.

¹³ Namu idim asuptecnaig nedo has unyum aiek, mika na mun imipalea intas o Ihova Atua unyum aiek, um ago nedo has ehele ilpu atimi wai iji taka pece ithai cai mat asega; et lep ika a Ihova, Na mun eti atahaijeg intas unyak aiek.

¹⁴ Et ika a Ihova, Akumu adumoij pam ehelek aijaua, ak ilpu atimi imipalea, ek mun atimarid unyimia ainyak: ekpu lucsei caua ainyak, nikavaig, natimi et ethi an maliyum et ethi, im natimi et ero an pece et ethi, um imiapam caua Saion:

¹⁵ ekpu alupai caua ilpu atimi aminjinaig caua ainyak et idivaig inliinmopok, erupu aminjinaig caua ara an nato itai im narapakau.

¹⁶ Etpu idim uco, aku wit asvalav aijaua um ahinag an pece, et ika a Ihova, An nopan iyehki erupu eti lep aketo ara um ika, Nelcau an tas etipup u Ihova: erupu eti lep imiacitak vaig an liinmopora ara: erupu eti lep imiehva ara, erupu eti lep aktaktai vaig ara; uhpu idim eti lep ago nelcau inigki.

¹⁷ An nopan iyehki erupu anvi nidan Jerusalem ara par ika nitai ateuc u Ihova nigki; erupu asjapicnaig Jerusalem a nup urai iji pece asega vai nidai Ihova: erupu eti lep ago ara et idivaig naktaktai u inliinmopora has.

¹⁸ An nopan iyehki erupu apan a nup u Juta ehele nup Isreel, erupu ehratga ara ahes an pece inig et ahes narutu iran, um ehrapam an pece inig kis ika ainyak ki alupai ilpu retpomia mika eri amen iran ara.

¹⁹ Ja kis ika ainyak, Ekpu ehvati euc ainyak ehele ilpu halav unyak, um alupai euc inpece esjilid, nuarin upene mika eri ahtag pam iran a nup urai iji pece? kis lep ika ainyak, Namu anvi nidak aiek par ika Etmak, um eti lep adumoij pan vai nyak.

²⁰ Et ika a Ihova, Et idim inveijec eka mun ago nedo efaifa vai nyak aijaua, ak nup Isreel, et idivaig et ago nedo efaifa vai natamnyu un tah intakata.

²¹ Eh mun ahgei nohra atimi irai uarin ijinies, era mun ehtigtaig a nup Isreel um alaigaheni: vaig inig nikavaig, era mun ago nedo imipalea ara, era mun ahnag irai Ihova Atua ura ara.

²² Akumu adumoij pam ehelek aijaua, ak ilpu atimi imipalea, ekpu ika ainyak aki eti lep imipalea aijaua. Namu alum cama aiek, ecra mun ham ehelum aijama; na idim Ihova Atua unyima aiek.

²³ Et idim takitai niji edoon im lep niji au et ahinag: ja et idim imiatamaig nup Isreel a Ihova Atua unyima.

²⁴ Et, mun auahas nauritai u ilpu atmil unyima im ilpu retpoma a natmas inig er amcel vaig, ahes an nopan iyehki um uhum pam an nopan inig; nikavaig, siip ura im kurimatau ura, im ilpu halav atamaig ura im ilpu halav atahig ura.

²⁵ Ecra mun asjeuc aijama um ehcamai, et ataluopni cama inreiman jipe unyima: vaig inig nikavaig, ecra mun ago nedo has aijama vai Ihova Atua unyima, aijama im ilpu retpoma im lep ilpu atmil unyima, ahes an nopan iyehki um yetpam an nopan inig: ecra mun eti atahaijeg intas o Ihova Atua unyima aijama.