Jeremaia 29 - Intas Etipup

NUARIN TAS ALUPAS 29.

1 Et imiapan nitaasviitai a Jeremaia imi ilpu ohna Babelon, mika eri amen igpa eahki ara, 8 um eti atahaijeg intas o ilpu atimi umjeg ahnag ura; 10 im lep inig, etu wit ti pan itac inmesese inyi sevente eri adumoij pam ara an naiheuc u Atua. 15 Et asan tas upyi asaig aien mika uhpu auahas ilpu atimi et eled va nedo imipalea ura. 20 Et asuptcenaig inmas ohocred a Ehab im Setekaia ohwat aprofeta efaifa aien. 24 Et aged nitaasviitai a Simeya um aat irai Jeremaia. 30 Et asuptecnaig neruvaig nedo o Simeya a Jeremaia.

¹ NIJI tas an nitaasviitai inig ji igki is aged an maliyum Jerusalem a Jeremaia naprofeta, um imiapan imi ilpu ahri ilpu atimi alupas iji ig eris arore ra um imiapan ra, im lep imi ilpu atimi ahlap, im ilpu profeta, im lep atimi asega iji ig is arore ra Jerusalem a Nebukatnesar um imiapan ra Babelon;

² (ja is mun upyi udei Jerusalem; a Jekonaia natimarid, im natimarid; takata, im ilpu aheca urau, im ilpu atimi alupas an pece Juta im lep Jerusalem, im ilpu atimi ared cai, im ilpu atimi auud pas;)

³ erus apos pan nitaasviitai iyehki a Elasa inhal u Sefan, im Gemaraia inhal u Hilkaia, (natimi erahki is abrai rau a Setekaia natimarid an pece Juta, mika eru apan Babelon arau ehele Nebukatnesar natimarid an pece Babelon.)

⁴ Is ika a Jeremaia; Et ika a Ihova esjilid acen, Atua u nup Isreel, ehele ilpu atimi asega iji ig eris arore ra um imiapan ra, kis ika ainyak vai ra eri arore ra Jerusalem um imiapan ra Babelon;

⁵ Akumu uctai iyum aijaua, um amen iran; akumu ahwaig umamia aijaua, um hegaig nohwai itai iran;

⁶ akumu lucsei ehgamia aijaua, um apos ilpu halav atamaig im ilpu halav atahig; um luscei ehgara vai ilpu halav atamaig unyimia, um alupai atamnyura ilpu halav atahig unyimia, mika eri apos ilpu halav atamaig im ilpu halav atahig; mika aki ahinag eahki aijaua, um eti tup eseij ache.

⁷ Akumu lep ahilek nigpa aijaua vai inmaliyum iyehki ek mun ika ainyak eri arore caua um imiapan caua eahki, um ugyi Ihova vaig: akupu idim leh nigpa aijaua an nigpa iran.

⁸ Et ika a Ihova esjilid acen, Atua u nup Isreel; Erumu jim i imiahnag caua a ilpu profeta unyimia im ilpu atimi asig yi opdicrai j itai unyimia iji ig, era amen ehelemia ara, um jim atahaijeg umjeg ahnag ura iji ig, eka ika aijaua eri umjeg ahnag ara.

⁹ Et ika a Ihova, Era idim asuptecnaig intas ahcil ara an nidak: ek mun eti abrai ra ainyak.

¹⁰ Et ika a Ihova, Et idim inveijec, aku wit amen aijaua irai mesese inyi sevente an pece Babelon, ekpu ateghe caua ainyak, etpu ehneijid intas upene unyak ainyak ehelemia, ekpu imiadumoij pam caua ainyak an nuarin inigki.

¹¹ Et ika a Ihova, Ek ato ainyak naktaktai unyak iji ig ek mun aktaktai vai caua ainyak, naktaktai va nigpa, jam eti naktaktai va nohocred, mika aki lucsei itai eka aitgaig vaig aijaua.

¹² Akupu lep ahlaig vai nyak aijaua, akupu apam aijaua um alaigaheni vai nyak, ekpu adai intas unyimia ainyak.

¹³ Aku wit ahilek nyak aijaua an liinmopomia asega, akupu ahilek nyak aijaua, um ecet nyak.

¹⁴ Et ika a Ihova, Akupu ecet nyak aijaua: ekpu lep imiadumoij pam caua ainyak, ekpu lep asjapicnaig caua ainyak irai nup urai iji elcau asega, im lep irai iji uarin asega iji ig ek mun ahau pan caua iran ainyak; et lep ika a Ihova, Ekpu lep imiapam caua ainyak an nuarin inig kis ika ainyak eri arore caua iran um imiapan caua an taka pece.

¹⁵ Ja et mun idim ika a Ihova vai natimarid inig et ateuc aien an nitai ateuc iran u Tevit, im lep vai ilpu atimi asega iji ig era amen an maliyum inigki ara, ilpu etwamia iji ig marom eris eti imiapan ra ehelemia an taka pece;

¹⁶ et ika a Ihova esjilid acen; Akumu ato aijaua mika, ekpu abraig pan nedoa ehele ra ainyak, im numlaig has, im nemehe has, ekpu ika ainyak eri idivaig nohwa ateg has, et ehka inhegaig vaig, et idim eheshas.

¹⁷ Ekpu lep ahau pan ra ainyak an nedoa, im lep an numlaig has, im lep an nemene has, ekpu i lep atcijai ra ainyak mika eri imiapan ra irai iji pece asega an nobohtan, mika eri itai ohocred vaig, im nitai imiali vaig, im nitai amcel vaig, im nitai ehcamai vaig, irai tiji elcau asega ek mun ahau pan ra iran ainyak:

¹⁸ et ika a Ihova, Vaig inig nikavaig, era mun eti atahaijeg intas unyak iji ig ara kis asaig ehele ra ainyak vai ilpu aheca unyak ilpu profeta, kis atidai an nuhialeg ainyak um abrai ra; ja, et ika a Ihova, akis esjum aijaua par atahaijeg.

¹⁹ Va nitai inigki akumu atahaijeg intas o Ihova aijaua asega iji ig eris imiapan caua an taka; pece, kis lep ika ainyak eri arore caua Jerusalem um imiapan caua Babelon.

²⁰ Vaig inig nikavaig, eka mun ika aijaua, et mun ikni ilpu profeta vai caija Babelon a Ihova:

²¹ et ika a Ihova esjilid acen, Atua u nup Isreel, vai Ehab inhal u Koleaia, im lep vai Setekaia inhal u Measiya, ohwat raigki erau asuptecnaig intas ahcil ehelemia arau an nidak; Akumu ato aijaua mika, ekpu atcijai pan rau ainyak an nikmai Nebukatnesar natimarid an pece Babelon; etpu atgei rau aien an nuhup unyimia.

²² Erupu leh intas ahlaijaig vai rau ara sji igki asega eris arore ra an pece Juta um imiapan ra Babelon, um ika, Etmu ika a Ihova an idivaig Setekaia aiek im lep idivaig Ehab, ohwat rahki is atnamud rau an cap a natimarid an pece Babelon;

²³ vaig inig nikavaig, erau mun ago nedo maumau an pece Isreel arau, um ago ingeijid ehele ehga atimi eblaamnem urau, um asuptecnaig intas ahcil an nidak, kis eti abrai rau ainyak par asaig; et ika a Ihova, ek idim ato ainyak, ekpu lep asuptecnaig ainyak.

²⁴ Namu tas aiek ehele Simeya natimi umjeg ahnag, um ika,

²⁵ Et tas a Ihova esjilid acen, Atua u nup Isreel, um ika, Vaig inig nikavaig, na mun imiapan itaasviitai aiek an nidam imi atimi asega Jerusalem, im lep imi Sefanaia inhal u Measiya natimi ahlep, im lep imi ilpu atimi ahlap asega, um ika,

²⁶ Et mun ati euc a Ihova mika an atimi ahlap aiek um isjeupigmoig Jehoiata natimi ahlap, mika eri eteuc a ilpu atimi aminjinaig atimi an nimnim u Ihova, el et ahnag tah, um ika et aprofeta aien, mika an ati yin an neom ipjin aiek, um atehgaig nauincai an neduon.

²⁷ Va nitai inigki na a uri aiek par eti acaiji Jeremaia nup Anadod, et ika aien et aprofeta ehelemia aien?

²⁸ Vaig inig nikavaig, et mun abraig pam tah Babelon ehelema aien, um ika, Etpu opra namen an taka pece unyimia: akumu uctai iyum aijaua, um amen iran; um lep ahwaig umamia, um hegaig nohwai itai iran.

²⁹ (Is esvi nitaasviitai inigki a Sefanaia natimi ahlap ehele Jeremaia naprofeta.)

³⁰ Va nitai inigki is yetpam ehele Jeremaia intas o Ihova, um ika,

³¹ Namu abraig pan tah aiek ehele atimi asega iji ig eris imiapan ra an taka pece, um ika, et ika a Ihova vai Simeya natimi umjeg ahnag; Vaig inig nikavaig, et mun asuptecnaig intas ehelemia a Simeya, ja kis eti abrai yin ainyak par asaig, is lep ika aien aki ateuc an tas ahcil aijaua:

³² va nitai inigki et ika a Ihova; Akumu ato aijaua mika, ekpu aru irai Simeya natimi umjeg ahnag ainyak, im ilpu hal o un: etpu eti amen ehele nup igcaki tah mapon: et lep ika a Ihova, Etpu eti almoi nitai upene iji ig aien ekpu ago ainyak vai ilpu atimi unyak; vaig inig nikavaig, et mun asaig intas imipalea vai Ihova aien.