Jeremaia 28 - Intas Etipup

NUARIN TAS ALUPAS 28.

1 Et asan tas upyi asaig a Hananaia jam ahcil mika uhpu imiadumoij pam niji ipji itai,im lep Jekonaia. 5 Et merit a Jeremaia mika yi inveijec, jam asuptecnaig um ika eri ato ilpu profeta inveijec uhu wit ehneijid intas ura. 10 Et ahtasvi nasore o Jeremaia a Hananaia. 12 Et asuptecnaig a Jeremaia va nasore aiurn, 15 um asan tas upyi asaig vai inmas u Hananaia.

¹ IM lep inig, an mesese iyehki, is wat atupun a Setekaia natimarid an pece Juta um atimarid, an mesese ford, im lep an mohoc fifd, is tas ehelek a Hananaia inhal u Esur naprofeta, nup u Gibeon, an nimnim u Ihova, an nuhup u ilpu atimi ahlap im lep atimi asega, um ika,

² Et mun tas a Ihova esjilid acen, Atua u nup Isreel, um ika, Ek mun ahtasvi nasore u natimarid an pece Babelon ainyak.

³ Ekpu imiadumoij pam ainyak an nuarin inigki nipjiitai asega an neom u Ihova iji ig, is iknipagki a Nebukatnesar natimarid an pece Babelon an nuarin inigki, um imiapan Babelon, ja par ti pan itac inmesese inyi ero:

⁴ et ika a Ihova, Ekpu imiadumoij pam ainyak an nuarin inigki Jekonaia inhal u Jehoiakim natimarid an pece Juta, im lep nup u Juta asega, eris arore ra um imiapan ra Babelon: ekpu idim ahtasvi nasore u natimarid an pece Babelon ainyak.

⁵ Is um ika a Jeremaia naprofeta ehele Hananaia naprofeta an nuhup u ilpu atimi ahlap, im lep an nuhup u atimi asega eris aiji ara an nimnim u Ihova,

⁶ is idim ika a Jeremaia naprofeta, Emen: etmu ago a Ihova inyi uce: etmu ago aktit a Ihova intas unyum iji ig na mun asuptecnaig aiek, par imiadumoij pam niji ipjiitai an neom u Ihova, im ilpu atimi asega eris arore ra um imiapan ra, par ahes Babelon um yetpam an nuarin inigki.

⁷ Ja namu idim atahaijeg intas inigki aiek ek asuptecnaig ainyak an tikgam, im lep an tikga atimi asega;

⁸ ilpu profeta iji ig eris uhup irak ara um lep uhup iram itu acen, eris asuptecnaig intas ara vai nup urai iji pece is ahinag, im lep vai nup urai iji elcau alupas, um asaig nedoa, im nohocred, im nemehe has.

⁹ Naprofeta inig et asuptecnaig intas va nigpa aien, uhu wit ehneijid intas o naprofeta iyehki, uhpu ato naprofeta iyehki mika, et inveijec is abrai yin a Ihova.

¹⁰ Is um atipagki nasore an nauinwai Jeremaia naprofeta a Hananaia naprofeta, um ahtasvi.

¹¹ Is tas a Hananaia an nuhup u atimi asega, um ika, Et ika a Ihova; Et idim uco, ekpu atipagki nasore u Nebukatnesar natimarid an pece Babelon ainyak irai auinwai nup urai iji pece asega um ahtasvi, ja par ti pan itac inmesese inyi ero. Is lep atga o un a Jeremaia naprofeta.

¹² Is wat ahtasvi nasore a Hananaia naprofeta an nauinwai Jeremaia naprofeta, is yetpam ehele Jeremaia intas o Ihova, um ika,

¹³ Namu apan aiek um asaig ehele Hananaia, um ika, Et ika a Ihova; Na mun ahtasvi niji asore cai aiek; ja namu ago niji asore aiurn aiek par asjapigmoig.

¹⁴ Et idim ika a Ihova esjilid acen, Atua u nup Isreel; Ek mun atijai nasore aiurn ainyak an nauinwai nup urai pece asega iji igki mika eri aheca u Nebukatnesar natimarid an pece Babelon ara; erupu idim aheca o un ara: ek mun lep alupai yin niji itai eklim edo irai pece ainyak.

¹⁵ Ja is par ika a Jeremaia naprofeta ehele Hananaia naprofeta, Ak Hananaia, namu atahaijeg aiek; Et mun eti abrai euc a Ihova; ja na ika aiek eri ateuc an tas ahcil a nup igcaki.

¹⁶ Va nitai inigki et ika a Ihova; Namu ato aiek mika, ekpu ethaig pan euc ainyak, napu eti amen an nobohtan aiek: napu mas aiek an mesese inigki, vaig inig nikavaig, na mun asuptecnaig intas imipalea vai Ihova aiek.

¹⁷ Is um mas a Hananaia naprofeta, an mesese iyehki an mohoc sevend.