Jeremaia 27 - Intas Etipup

NUARIN TAS ALUPAS 27.

1 Et lucsei niji wau im niji asore a Jeremaia um ika, niji almuitai ji igki, par asuptecnaig mika yi imiasuol ilpu atimarid irai taka pece a Nebukatnesar. 8 Et ahugni ra aien mika eri aheca o un ara, um jim asgeig irai ilpu profeta efaifa. 12 Et uce intas o un ehele Setekaia. 19 Et asan tas upyi asaig aien, mika uhpu imiapan Babelon nipjiitai iji ig et amen Jerusalem, um amen eahki um yetpan an nopan iyehki etpu ateghe nup uran pece o un a Ihova.

¹ IS wat atupun um atimarid a Jehoiakim inhal u Josaia natimarid an pece Juta, is ahes ehele Ihova intas inigki um yetpam ehele Jeremaia, um ika,

² Et ika ehelek a Ihova; Namu ago niji wau im niji asore imtam aiek, um ikni an nauinwam,

³ um ika, erumu lucsei itai iji igki a ilpu aheca ura era apam Jerasalem ara ehele Setekaia natimarid an pece Juta, imi natimarid an pece Itom, im lep imi natimarid an pece Moab, im lep imi natimarid an pece u nup Amon, im lep imi natimarid an pece Tairus, im lep imi natimarid an pece Saiton;

⁴ um abrai ra mika eri asaig ehele ilpu atimi alupas ura, um ika, Et ika a Ihova esjilid acen, Atua u nup Isreel; Akumu ika ehele ilpu atimi alupas unyimia aijaua;

⁵ Ek mun ago nobohtan ainyak, im lep natimi, im niji itai eklim edo irai pece an narasin nobohtan, an nemda alupas unyak, im lep an nikmak ek atgeig yi apidi ainyak, ekpu alupai ra sji igki nitai iji igki ainyak et idivaig et upene irak.

⁶ Im lep inig, ek mun ikni inpece iji igki asega ainyak an nikmai Nebukatnesar natimarid an pece Babelon, naheca unyak; ek mun lep ikni niji itai eklim edo irai pece ainyak imi yin mika eri aheca o un.

⁷ Erupu aheca o un a nup urai iji pece asega, im lep u inhal o un, im lep u mapon, um yetpan an nopan naruvaig inpece o un: ja erupu ika a nup urai iji pece et ahinag im nup urai iji elcau et alupas yi aheca ura aien.

⁸ Et ika a Ihova ehele nup urai pece iji ig, im nup urai elcau iji ig, era ika ara erupu eti aheca u Nebukatnesar natimarid an pece Babelon ara, um eti ikni niji auinwara ithai asore u natimarid an pece Babelon, ekpu aru nedo o nup urai pece iji igki ainyak an nedoa, im lep an numlaig has, im lep an memehe has, um yetpan an nopan iyehki ekpu auahas ehni ra ainyak an nikman.

⁹ Va nitai inigki akumu jim atahaijeg ilpu profeta unyimia aijaua, im ilpu atimi asig yi opdicrai itai unyimia, im ilpu atimi umjeg ahnag unyimia, im ilpu atimi almoi niji apat unyimia, im ilpu atimi araces unyimia, era tas ehelemia ara, um ika, Akumu jim aheca u natimarid Babelon aijaua:

¹⁰ era idim asuptecnaig intas ahcil ehelemia ara, mika uhpu imiapan caua itac acen vai inpece unyimia; im lep mika ki ahlo pan caua ainyak, akupu lep emesmas aijaua.

¹¹ Ja et ika a Ihova ehele nup urai pece iji ig, era ika ara erupu ikni niji auinwara ara ithai asore u natimarid an pece Babelon um aheca o un, ekpu ika ainyak vai ra erupu lep amen an pece ura ara; erupu ahapol nan ara, um amen iran.

¹² Kis lep tas ainyak ehele Setekaia natimarid an pece Juta et idivaig intas iji igki asega, um ika, Akumu ikni niji auinwamia aijaua ithai asore u natimarid an pece Babelon, um aheca o un im lep u ilpu atimi o un, mika aki umumoh aijaua.

¹³ Eka a uri aijaua par emesmas, aiek im ilpu atimi unyum, an nedoa, im lep an numlaig has, im lep an nemehe has, et idivaig et mun asaig a Ihova vai nup urai pece iji ig, era ika ara erupu eti aheca u natimarid an pece Babelon ara?

¹⁴ Va nitai inigki akumu jim atahaijeg intas o ilpu profeta iji ig aijaua era tas ehelemia ara, um ika, Akumu jim aheca u natimarid an pece Babelon aijaua: era idim asuptecnaig intas ahcil ehelemia ara.

¹⁵ Et ika a Ihova, Ek mun eti abrai ra ainyak, ja era asuptec-naig intas ahcil ara an nidak; mika uhpu ahlo pan itac caua, um auahas caua, caua marom, im lep ilpu profeta iji ig era asuptecnaig intas ehelemia ara.

¹⁶ Im lep inig, kis tas ainyak ehele ilpu atimi ahlap im ilpu atimi asega igcaki, um ika, Et ika a Ihova; Akumu jim atahaijeg intas o ilpu profeta unyimia aijaua era asuptecnaig intas ehelemia ara, um ika, Akumu ato aijaua mika, uhpu imiadumoij pam niji ipjiitai an neom u Ihova, etpu ahes Babelan inyi eti laulau: era idim asuptecnaig intas ahcil ehelemia ara.

¹⁷ Akumu jim atahaijcg intas ura aijaua; akumu aheca u natimarid an pece Babelon aijaua um umumoh: etpu ahyuahyu inmaliyum inigki van he?

¹⁸ Ja el era ilpu profeta ara, el et amen ehele ra intas o Ihova, erumu ugyi Ihova esjilid acen ara, mika eri jim imiapan Babelon nipjiitai iji ig eris udei an neom u Ihova, im lep an neom u natimarid an pece Juta, im lep Jerusalem.

¹⁹ Et ika a Ihova esjilid acen va noboatau eraigki et ero, im lep va nipjinitai alupas iyehki, im lep va niji ededuon nipjiitai, im lep vai hal ipjiitai iji ig et amen an maliyum inigki,

²⁰ is eti lucsei a Nebukatnesar natimarid an pece Babelon is wat arore Jekonaia inhat u Jehoiakim natimarid an pece Juta aieu Jerusalem, um imiapan yin Babelon, im lep ilpu atimi alupas asega an pece Juta im lep Jerusalem;

²¹ maiya, et ika a Ihova esjilid acen, Atua u nup Isreel, va nipjiitai iji ig et amen an neom u Ihova, im lep an neom u natimarid an pece Juta, im lep Jerusalem;

²² et ika a Ihova, Uhpu imiapan Babelon, um amen eahki um yetpan an nopan iyehki ekpu ateghe ilpu atimi unyak ainyak; ekpu lep imiadumoij pam nipjiitai ainyak, um lep ikni au nuarin inigki.