Jeremaia 26 - Intas Etipup

NUARIN TAS ALUPAS 26.

1 Et asan tas updak ehele atimi a Jeremaia, et lep asan tas ipjin aien, par ahugni ra mika eri adumoij an liinmopora. 8 Va nitai inigki eris arop iran ara, 10 um atijai itai iran. 12 Intas asuptecnaig o un. 16 Eris tas alep ara um ika eri jim atgei yin, et idivaig eris eti atgei Maika. 20 Intas vai Uraija. 24 Et imiaras Jeremaia a Ahaikam.

¹ IS wat atupun um atimarid a Jehoiakim inhal u Josaia natimarid an pece Juta, is ahes ehele Ihova intas inigki, um ika,

² Et ika a Ihova; Namu aiji aiek an nokoro o neom u Ihova, um imiabrai nup urai maliyum asega iji ig an pece Juta, era apam ara mika eri alaigaheni an nimnim u Ihova, intas asega iji ig kis abrai euc ainyak par asaig ehele ra; namu jim ateri tah intas aiek:

³ kit erupu atahaijeg ara, um adumoij an nefalaig has ura ara asega, athi um athi ehni, mika ki adumoij au liinmopok ainyak va nohocred inig kis ika ainyak ki ago vai ra ainyak, va nedo has iji ig era ago ara.

⁴ Namu ika aiek ehele ra, Et ika a Ihova; El eka eti atahaijeg nyak aijaua, par imiaiji intas alep unyak inig, ek mun ati an nuhup unyimia ainyak,

⁵ par atahaijeg intas o ilpu aheca unyak iji ig ilpu profeta marom, kis abrai ra ainyak mika eri apan ehelemia, kis atidai an nuhialeg ainyak um abrai ra, ja eka mun eti atahaijeg ra aijaua;

⁶ ekpu ago nimnim inigki ainyak mika yi idivaig Sailo, um ago inmaliyum inigki mika eri asaig intas ahlaijaig vaig a nup urai iji elcau asega an nobohtan.

⁷ Eris ahgei Jeremaia a ilpu atimi ahlap, im ilpu profeta, im ilpu atimi asega, is wat asuptecnaig intas iji igki aien an nimnim u Ihova.

⁸ Is wat asuptecnaig ehni a Jeremaia inlag asega iji ig is ika ehelen a Ihova yi asuptecnaig ehele atimi asega aien, eris arop iran a ilpu atimi ahlap, im ilpu profeta, im ilpu atimi asega, um ika, Napu idim mas aiek.

⁹ Et echamecha na mun asuptecnaig intas aiek an nidai Ihova, um ika, Etpu idivaig Sailo nimnim inigki, etpu ahyuahyu inmaliyum inigki, inyi eti amen tah natimi iran? eris asjapicnaig natimi asega um aat irai Jeremaia an nimnim u Ihova.

¹⁰ Eris wat ahgei intas iji igki a ilpu atimi alupas an pece Juta, eris ahes an nimnim u natimarid ara um aridjipan an nimnim u Ihova, um ateucse u neucse nathatahau mat u neom u Ihova.

¹¹ Eris tas a ilpu atimi ahlap im ilpu profeta ehele ilpu atimi alupas im lep ehele atimi asega, um ika, Et idim upene mika yi mas a natimi inigki; et mun idim asuptecnaig intas aien vai inmaliyum inigki, et idivaig eka mun ahgei an tikgamia aijaua.

¹² Is lep tas a Jeremaia ehele ilpu atimi alupas asega im lep ehele atimi asega, um ika, Is abrai nyak a Ihova mika ki asuptecnaig va nimnim inigki im lep vai inmaliyum inigki intas asega iji ig eka mun ahgei aijaua.

¹³ Va nitai inigki akumu ago upene nedo unyimia aijaua im nauritai unyimia, um atahaijeg nohrai Ihova Atua unyimia; etpu lep adumoij au liinmopon a Ihova va nohocred inig et mun asuptecnaig vai caua aien.

¹⁴ Akumu ato aijaua mika, ek amen an nikmamia ainyak: ago nedo inig vai nyak aijaua et idivaig et upene um atoh an nuhup unyimia.

¹⁵ Ja akumu idim ato aijaua mika, el eka atgei nyak aijaua, akupu idim atijai iramia aijaua, im lep iran maliyum inigki, im lep ira atimi amen iran, inmas u natimi et eti ago nedo has aien: et idim inveijec mika, et mun abrai nyak ehelemia a Ihova mika ki asuptecnaig intas iji igki asega ainyak ehelemia.

¹⁶ Eris lep ika a ilpu atimi alupas im lep natimi asega ehele ilpu atimi ahlap im ilpu profeta; Et idim eti upene mika yi mas a natimi inigki: et mun idim tas eheleija aien an nidai Ihova Atua uja.

¹⁷ Ja eris par atidai nahaiji ilpu atimi alupas an pece, um tas ehele atimi asega eris asjapicnaig, um ika,

¹⁸ Is wat umoh a Hesekaia natimarid an pece Juta, is asuptecnaig intas a Maika nup u Marisa, um tas ehele nup u Juta asega, um ika, Et ika a Ihova esjilid acen; Uhpu acujitai Saion et idivaig nuarin nobohtan, etpu lep ati nijih irai hat Jerusalem, etpu lep idivaig niji uarin ijinies an nesei nedoon inig et eteuc iran nimnim itap.

¹⁹ Ja is idim eti atgei yin a Hesekaia natimarid an pece Juta im nup u Juta asega; is idim imtitai Ihova aien, um ugyi an nuhup u Ihova par aiheuc vai yin, is lep adumoij an liinmopon a Ihova va nohocred iyehki is asuptecnaig vai ra aien; ja el eta atgeiyin akaija intupu lucsei nohocred esjilid vai caija akaija.

²⁰ Ja eris ika nahaiji ra is eche, Is lep eteuc a natimi is ethi, nan, Uraija inhal u Simeya nup u Kirjad-jiarim, is asuptecnaig intas aien an nidai Ihova, is asuptecnaig intas aien vai inmaliyum inigki im lep vai inpece inigki et idivaig intas asega u Jeremaia:

²¹ is wat ahgei intas o un a Jehoiakim natimarid, im ilpu atimi esjilid asega o un, im ilpu atimi alupas asega o un, is ahilek yin a natimarid mika yi atgei yin: ja is wat ahgei a Uraija, is imtitaig aien, um aha, um yetpan Ijipt;

²² ja is abra atimi a Jehoiakim natimarid mika eri apan Ijipt ara, nan, Elnedan inhal u Akbor, im hal atimi ehelen par apan Ijipt.

²³ Eris atipagki Uraija Ijipt ara, um imiapam yin ehele Jehoiakim natimarid; is atgei yin aien an nauitoga, is wat mas aien eris ethaigse nohun an netheso irai tup atimi.

²⁴ Ja is atau imi Jeremaia a Ahaikam inhal u Sefan, mika eri jim atcijaig yin an nikma atimi par atgei yin.