Jeremaia 25 - Intas Etipup

NUARIN TAS ALUPAS 25.

1 Et wat acaiji nup u Juta a Jeremaia va nedo imipalea ura vai ilpu profeta ura, 8 et asan tas upyi asaig aien, um ika eri imiapan ra an taka pece irai mesese inyi sevente, 12 ja par apitac uhpu auahas nup uran maliyum Babelon. 15 Et leh nipjinitai aien et amen waina iran, um uhup um asuptecnaig um ika eri auahas nup urai elcau asega. 34 Era aunyauwaig a ilpu atimi asgi siip.

¹ INTAS inig is yetpam ehele Jeremaia nigki vai nup u Juta asega an mesese ford irai Jehoiakim inhal u Josaia natimarid an pece Juta; is mesese uhup iyehki irai Nebukatnesar natimarid an pece Babelon;

² is asuptecnaig intas inigki a Jeremaia naprofeta ehele nup u Juta asega, im lep ehele nup u Jerusalem asega, um ika,

³ Et mun yetpam ehelek intas o Ihova ahes an mesese dirtiind irai Josaia inhal u Emon natimarid an pece Juta, um yetpam an nadiat inigki; inmesese twente dirt nigki, ek mun tas ehelemia ainyak, ek mun atidai au nuhialeg ainyak um tas; ja eka mun eti atahaijeg aijaua.

⁴ Et mun lep abrai ilpu aheca o un asega ilpu profeta a Ihova ehelemia, et mun atidai an nuhialeg aien um abrai ra; ja eka mun eti atahaijeg aijaua, um eti atgeig pam intikgamia aijaua par atahaijeg.

⁵ Eris ika ara, Akumu idim adumoij pam aijaua asega au nefalaig has unyimia, im nedo has iji ig eka ago aijaua, athi um athi ehni, um amen an pece inig is alupai caua a Ihova im lep ilpu retpomia mika aki ohuun irai iji mesese:

⁶ akumu jim apitac ilpu atmas irai taka pece, aijaua, mika aki aheca ura, um atpuse an nuhup ura, um jim auahas inliinmopok aijaua vai nauritai irai ikmamia; ekpu eti auahas caua ainyak.

⁷ Ja et ika a Ihova, Eka mun eti atahaijeg nyak aijaua, mika aki auahas inliinmopok an nauritai irai ikmamia mika aki lep leh nohocred vaig aijaua.

⁸ Va nitai inigki et ika a Ihova esjilid acen; Vaig inig nikavaig, eka mun eti atahaijeg intas unyak aijaua,

⁹ et ika a Ihova, Akumu ato aijaua mika, ki abrai atimi ainyak um lucsei nup urai elcau asega an pece inig et ahes narutu iran, im lep Nebukatnesar natimarid an pece Babelon, naheca unyak, um imiapam ra mika eri aat an pece inigki, im lep ilpu atimi amen iran, im lep nup urai elcau asega iji ig marehed mihtag; erupu auahas ehni ra ara, um ika eri itai imiali, um itai amcel vaig, etpu lep umaruma inpece ura um yetpan irai iji mesese.

¹⁰ Im lep inig, ekpu atipagki ehele ra ainyak nohrai ilpu atimi imiacitak, im nohrai ilpu atimi cediaig, im nohrai natimi leh ehgan, im nohrai natahig leh natamnyu un, im inmotjan hat irara flaur, im incap alahala.

¹¹ Etpu idim umaruma inpece asega inigki, um itai er imiali vaig; erupu aheca u natimarid an pece Babelon a nup urai elcau iji igki irai mesese inyi sevente.

¹² Et ika a Ihova, Etu wit ti pan itac inmesese inyi sevente, ekpu aru nedo has u natimarid an pece Babelon ainyak, im lep nup uran pece iyehki; im lep inpece u nup u Kaltia, ekpu ika ainyak yi umaruma irai iji mesese.

¹³ Ekpu ehneijid intas asega unyak ainyak an pece iyehki, ek mun asaig vaig ainyak, intas asega iji ig marom eris aged an nitaasviitai inigki, is lep asuptecnaig a Jeremaia vai nup urai pece iji igki asega.

¹⁴ Erupu lep ika a nup urai elcau et ahinag im ilpu atimarid alupas eri lep aheca ura ara sji igki: ekpu lep aru ira ra ainyak et idivaig nedo ura, um idivaig nauritai wai ikmara.

¹⁵ Is ika ehelek a Ihova Atua u nup Isreel; Namu leh nipjinitai inigki aiek an nikmak et amen iran waina an tavaitap unyak, namu lep ika aiek eri umwig iran a nup urai elcau asega iji ig ek abraig pan euc ehele ra ainyak.

¹⁶ Erupu umnyi ara, um ateuc molmol, um ahnag, va nedoa inig ekpu ika ainyak eri ago vai ra.

¹⁷ Kis leh nipjinitai iyehki ainyak an nikmai Ihova, kis lep ika ainyak eri unwig iran a nup urai elcau asega iji ig is abraig pan nyak ehele ra a Ihova:

¹⁸ nikavaig, nup u Jerusalem, im nup urai maliyum an pece Juta, im ilpu atimarid ura, im ilpu atimi alupas ura, mika yi umaruma inpece ura, um lep mika eri itai imiali ara, um itai amcel vaig, um itai er asaig intas ahlaijaig vaig, et idivaig et eteuc an nopan inig;

¹⁹ im, lep Fero natimarid an pece Ijipt, im ilpu aheca o un, im ilpu atimi alupas o un, im nup uran pece o un asega, im nup urai iji pece acheiachei asega;

²⁰ im ilpu atimarid asega an pece Us, im ilpu atimarid asega an pece u nup u Filistia, im nup Askelon, im nup u Cesa, im nup Ekron, im nahri nup Astot,

²¹ im nup Itom, im nup u Moab, im ilpu mapoi Amon,

²² im ilpu atimarid asega u nup u Tairus, im ilpu atimarid asega u nup u Saiton, im ilpu atimarid u nup urai hakli pece an jap,

²³ im nup u Titan, im nup u Tima, im nup u Bus, im ilpu atimi asega iji ig era amen nai iji ilpui pece ara,

²⁴ im ilpu atimarid asega an pece Arebia, im ilpu atimarid asega u nup urai pece acheiachei iji ig era amen an namasacen ara,

²⁵ im ilpu atimarid asega an pece Simrai, im ilpu atimarid asega an pece Ilam, im ilpu atimarid asega au pece Mitya,

²⁶ im ilpu atimarid asega irai pece iji ig et ahes narutu iran, ubutpotet im lep itac acen, era amen jipe ara, im lep nup urai elcau asega irai iji pece asega, era amen an nobohtan asega ara: etpu apitac ira ra a natimarid an pece Sisak um umnyi.

²⁷ Va nitai inigki namu ika aiek ehele ra, Et ika a Ihova esjilid acen, Atua u nup Isreel; Akumu umnyi aijaua, um ahnag, um alo, um eropropse, um jim lep atidaijai, va nedoa inig ekpu ati ehelemia ainyak.

²⁸ Ja el era esjum ara par leh nipjinitai inigki an nikmam um umwig iran, namu ika aiek ehele ra, Et ika a Ihova esjilid acen; Akupu idim umnyi aijaua.

²⁹ Akumu ato aijaua mika, et atupun ainyak um imiapam nohocred an maliyum inig eris anvi nidak iran, va nitai inigki akupu amen upene aijaua, ka oʼo? Oʼo, akupu eti amen upene aijaua: et ika a Ihova esjilid acen, Ekpu ati nedoa ainyak vai nup uran nobohtan asega.

³⁰ Va nitai inigki namu asuptecnaig intas iji igki asega vai ra aiek, um ika ehele ra, Etpu aunyauwaig a Ihova jipagko, etpu acreh nohran an nuarin itap o un et amen iran aien; etpu aunyauwaig emda aien an nuarin amen iran o un; etpu ahlaig ijinies aien, et idivaig ra sji ig era auwihi nitai ahtaijiraig nohwai vaine iran ara, vai ilpu atimi asega era amen an nobohtan ara.

³¹ Et ika a Ihova, Erupu ehtauo ara um yetpan an tid an nobohtan; et idim imiisjis ehele nup urai iji pece a Ihova, etpu ahilek nedo o atimi asega aien; etpu atcijaig ilpu atimi auatatimi aien va nedoa.

³² Et ika a Ihova esjilid acen, Et idim ahes nohocred ehele nup uran pece et ethi, um yetpan ehele nup uran pece et eche, uhpu imiaridjai narakiraki alupas irai tid an nobohtan.

³³ An nadiat iyehki erupu amen nohui ilpu atimi iji ig etpu atgei ra a Ihova, erupu ahes an tid an nobohtan et ethi ara, um yetpan an tid an nobohtan et eche: erupu eti imitaig ra natimi, um eti asjapicnai ra, um eti atelmoi ra; erupu ohok ara an nobohtan.

³⁴ Ak ilpu atimi asgi siip, akumu ehtigtaig aijaua, um ahlaig; ak ilpu atimi alupas an pak irai siip, akumu ereuc an nohpa aijaua: et mun idim yetpam nopon inig uhpu atgei caua iran um imiterimterim caua; akupu etjose aijaua et idivaig nipjinitai esjilid.

³⁵ Ekpu ehka vai ilpu atimi asgi siip par aha, im lep vai ilpu atimi alupas an pak irai siip par imiaha ra.

³⁶ Uhpu ahgei nohrai nahlaig u ilpu atimi asgi siip, im nehtigtaig u ilpu atimi alupas an pak irai siip: et mun auahas nomotmot ura a Ihova.

³⁷ Im lep inig, eh mun auahas niji uarin edo iran et igpa vai intavaitap alupas u Ihova.

³⁸ Et mun udei nuarin atpuh iran aien, et idivaig laion: et idim umaruma inpece ura va nedemda u natimi ehcerucai ra, im lep vai intavaitap alupas o un.