Jeremaia 24 - Intas Etipup

NUARIN TAS ALUPAS 24.

1 Era idivaig nohwan ateg upene um has natimi. 4 Et ika aien uhpu imiadumoij pam ilpu ohna upene, 8 ja uhpu auahas Setekaia im nahri atimi auatatimi.

¹ IS wat arore Jekonaia inhal u Jehoiakim natimarid an pece Juta a Nebukatnesar natimarid an pece Babelon, um imiapan yin ahes Jerusalem um yetpan Babelon, aien, im ilpu atimi alupas an pece Juta, im ilpu atimi ared cai, im ilpu atimi auud pas, is ehvaig ehelek nohwan ateg a Ihova, kis almoi napurapura is ero ainyak eris ati a nuhup u neom ahlap u Ihova.

² Is upene moij nohwan ateg is amen an napurapura is ethi, um idivaig nohwan ateg et uhup um meto: ja is has acen nohwan ateg is amen an napurapura is eche, is ehka inhegaig vaig, is eheshas.

³ Is ika ehelek a Ihova, Ak Jeremaia, na almoi inhe aiek? Kis ika ainyak, Nohwan ateg; et upene moij nohwan ateg upene; ja et has acen nohwan ateg has, et ehka inhegaig vaig et eheshas.

⁴ Is aketo intas o Ihova um yetpam ehelek, um ika,

⁵ Et ika a Ihova Atua u nup Isreel marom; Erupu idivaig nohwan ateg upene iji igki a nup u Juta iji ig kis ahlo pan itac ra ainyak an pece inigki, um imiapan ra an pece u nup u Kaltia mika eri leh niji itai upene eahki, ekpu idim ato ra ainyak.

⁶ Ekpu alum ra ainyak um aiheuc vai ra, ekpu lep imiapam ra ainyak an pece inigki: ekpu uctai ra ainyak, um eti alcapdicrai ra; ekpu ahwai ra ainyak, um eti atecrei ra.

⁷ Ekpu alupai ra inliinmopora ato nyak ainyak, mika ek Ihova ainyak: erupu ilpu atimi unyak ara, ekpu lep Atua ura ainyak: erupu lep adumoij pam ehelek ara an liinmopora asega.

⁸ Et ika a Ihova, Et idim has nohwan ateg iji ig et ehka inhegaig vaig, et eheshas; et idim uco, ekpu ati Setekaia natimarid an pece Juta ainyak, im ilpu atimi alupas o un, im nahri nup u Jerusalem iji ig era amen an pece inigki ara, ira lep ra sji igki era amen an pece Ijipt ara:

⁹ ekpu atcijai ra ainyak mika eri imiapan ra irai iji pece asega an nobohtan, va erupu amen has ara; erupu lep itai ehcamai ara, im intas ecsipece, im nitai imiafakahcil, im intas ahlaijaig, irai iji uarin asega ekpu ahau pan ra iran ainyak.

¹⁰ Ekpu ati nedoa vai ra ainyak, im numlaig has, im nemehe has, um yetpan an nopan iyehki uhpu auahas ehni ra an pece inig kis alupai ra ainyak im lep ilpu retpora.