Jeremaia 23 - Intas Etipup

NUARIN TAS ALUPAS 23.

1 Et asan tas upyi asaig aien, um ika, uhpu imiadumoij pam inpak irai siip iji ig eris imiterimterim ra. 5 Etpu esjilid ira ra a Kristo um imiatamai ra. 9 Intas vai ilpu profeta efaifa, 33 im ilpu atimi asan tas auyat vai ilpu profeta inveijec.

¹ ET ika a Ihova, Kaiheuc vai ilpu atimi asgi siip iji ig era auahas niji siip an lelitai unyak ara um imiterimterim ra!

² Va nitai inigki et ika a Ihova Atua u nup Isreel, vai ilpu atimi asgi siip iji ig era aminjinaig ilpu atimi unyak ara; Eka mun imiterimterim inpak irai siip unyak aijaua, um ahau pan ra, um eti aminjinai ra: et lep ika a Ihova, Akumu ato aijaua mika, ekpu aru nedo has unyimia inig ainyak eka mun ago aijaua.

³ Ekpu lep asjapicnaig nahri pak irai siip unyak ainyak irai iji pece asega iji ig kis mun ahau pan ra iran ainyak, ekpu lep imiadumoij pam ra ainyak irai irahed ura; erupu ahad ara um ahinag.

⁴ Et ika a Ihova, Ekpu ikni ilpu atimi asgi siip ainyak vai ra, erupu aminjinai ra ara; erupu eti lep imtitaig ara, um eti etehto, erupu eti ahijighei ara.

⁵ Et ika a Ihova, Etpu idim yetpam nopan iyehki mika ki imiaridjai Inran cai atoh ainyak imi Tevit, etpu lep eteuc a natimarid inyi ethi, etpu esjilid aien um ago nedo arapakau, etpu lep tas alep atoh aien um ago neruvaig atoh an nobohtan.

⁶ An nopan o un uhpu imiatamaig nup u Juta, erupu lep amen upene a nup Isreel: etpu anvi nidan inigki a Ihova par ika, NEDO ATOH UJA.

⁷ Et ika a Ihova, Va nitai inigki etpu idim yetpam nopan iyehki, eru wit eti lep ika ara, Et idim umoh a Ihova inig is lucsei ilpu mapoi Isreel an pece Ijipt aien um imiapam ra igcaki;

⁸ ja erupu ika ara, Et idim umoh a Ihova inig is lucsei ilpu mapoi 9 Isreel aien an pece inig et ahes narutu iran um imiaridjipam ra igcaki, im lep irai iji pece asega kis ahau pan ra iran ainyak; is atau imi ra aieu mika eri amen an pece ura ara.

⁹ Intas vai ilpu profeta nigki, et oplecoplec inliinmopok ainyak vai a ra; et eucjeucjeucaij niji eduok asega; ek idivaig natimi ahnag vai kava ainyak, um idivaig natimi inig et auatialidi vai waina aien, vai Ihova, im lep vai niji tas upene o un.

¹⁰ Et ohua ingeijid an pece; et taig inpece vai ilpu atimi asaig intas ahlaijaig; et mese nefelelicai upene an lelitai, et has nedo ura, et eti atoh nemda ura.

¹¹ Et ika a Ihova. Era mun ago nedo maumau a ilpu profeta im lep ilpu atimi ahlap; ek mun ecetai nedo has ura ainyak an nimnim itap unyak.

¹² Et ika a Ihova, Va nitai inigki etpu idivaig niji uarin umlas an napat nefalaig inig eri atga iran ara: uhpu ahau pan ra, erupu eropropse iran ara: ekpu idim imiapam nohocred ira ra ainyak, nopan aru nedo has ura marom.

¹³ Kis idim almoi nedo ahnag esjilid ainyak irai ilpu profeta Sameria; eris asuptecnaig intas ara an nidai Beal, um imiahnag ilpu atimi unyak, nup Isreel marom.

¹⁴ Et idim uco, ek mun lep ahnoi nedo has esjilid ainyak irai ilpu profeta Jerusalem: era ago ingeijid ara, um asan tas ahcil: era ago emda nikmai ilpu atimi auatatimi ara; va nitai inigki et eti atcijaig nedo has o un tah natimi: era idivaig nup u Solom vai nyak ara asega, era idivaig nup u Comora a ilpu atimi amen an maliyum inigki.

¹⁵ Va nitai inigki et ika a Ihova esjilid acen vai ilpu profeta; Ekpu idim alaa ra ainyak nitai caig acen, um ika eri umnyi inwai acen: vaig inig nikavaig, et mun ahes irai ilpu profeta Jerusalem nedo imipalea um apaahni an pece asega.

¹⁶ Et ika a Ihova esjilid acen, Akumu jim atahaijeg aijaua intas u ilpu profeta iji ig era asuptecnaig intas ehelemia ara: era auoh takitai ehelemia ara: era asuptecnaig naktaktai u inliinmopora ara, jam eti asuptecnaig intas inig is asaig ehele ra a Ihova.

¹⁷ Era asaig ara um eti atumop ehele ra sji igki era imipalea intas unyak ara, um ika, Et mun ika a Ihova, Akupu amen igpa aijaua; era lep ika ara ehele ilpu atimi iji ig era apitac an liinmopora imipalea ara, athi um athi ehni, Etpu eti yetpam iramia tah nohocred.

¹⁸ Et mun aiji a di an nuhup u Ihova et wat tas alep aien, um almoi um ato intas o un? et mun atgeig pan intikgan an tas o un a di, um atahaijeg?

¹⁹ Akumu ato aijaua mika, et mun ahes ehele Ihova narakiraki um apam va nedemda o un, etpu auahas alupas itai narakiraki inigki: etpu isjis alupas irai idjini ilpu atimi auatatimi.

²⁰ Etpu eti adumoij pan intavaitap u Ihova, um yetpan an nopan iyehki etpu ago ehni aien, um atiid naktaktai u inliinmopon: an nopan apitac akupu ato upene aijaua.

²¹ Kis eti abrai ilpu profeta iji igki ainyak, ja eris ispara athut ara; kis eti tas ehele ra ainyak, ja eris ispara asuptecnaig intas ara.

²² El eris aiji ara an nuhup unyak kis wat tas alep ainyak, um ika eri atahaijeg intas unyak a ilpu atimi unyak, el eris ika ara eri adumoij pam an nefalaig has ura ara, um udei nedo has ura eris ago ara.

²³ Et ika a Ihova, Ek idim eti Atua ainyak ubutpotet ache: ja ek lep idim Atua ainyak itac acen.

²⁴ Et ika a Ihova, Et ehka vaig tah par adenaig yin irai uarin adenaig mika ekpu eti ecet yin ainyak. Et ika a Ihova, Ek idim ohua ainyak an nohatag im lep an nobohtan.

²⁵ Ek mun ahgei intas inig ainyak eris asaig a ilpu profeta iji ig era asuptecnaig intas ahcil ara an nidak, um ika, Ek mun umjeg ahnag ainyak, ek mun idim umjeg ahnag ainyak.

²⁶ Etpu amen nitai inigki an liinmopoi ilpu profeta iji ig era asuptecnaig intas ahcil ara um yetpan au nahopan? maiya, era asuptecnaig intas efaifa inig ara et ahes an liinmopora.

²⁷ Naktaktai ura nigki, erupu ika ara eri ahnag an nidak a ilpu atimi unyak, va numjeg ahnag ura iji ig era asuptecnaig ara ehele ilpu apa ura, athi um athi ehni, et idivaig eris ahnag an nidak a ilpu retpora vai Beal.

²⁸ Naprofeta inig et umjeg ahnag aieu, etmu asuptecnaig num-jeg ahnag o un aien; ja aien et amen ehelen intas unyak, etmu asuptecnaig inveijec intas unyak aien. Et ika a Ihova, Et eti idivaig nesgai hwiit narasi hwiit.

²⁹ Et ika a Ihova, Et idim emda intas unyak um idivaig incap; um lep idivaig hamer inig et ahtagrei nij.

³⁰ Et ika a Ihova, Va nitai inigki ek idim esjum ainyak vai ilpu profeta iji ig era ahneg intas unyak ara vai ilpu apa ura, athi um athi ehni.

³¹ Et ika a Ihova, Ek idim esjum ainyak vai ilpu profeta iji ig era asuptecnaig intas ura ara, um ika, Et ika aien.

³² Et ika a Ihova, Ek idim esjum ainyak vai ilpu profeta iji ig era asuptecnaig niji umjeg ahnag ura ara et ahcil, um imiahnag ilpu atimi unyak an tas ahcil ura im nedo efaifa ura; ja kis eti abrai ra ainyak, um eti ikni ra: va nitai inigki et ika a Ihova, Erupu eti upene a nup igcaki vai ra.

³³ Eru wit ahodaig euc a nup igcaki, ka tah naprofeta, ka tah na-timi ahlap, um ika, Inhe nitai ahelwei u Ihova? namu ika ehele ra aiek, Eka itai ahelwei aijaua; et lep ika a Ihova, Ekpu atcijaig caua ainyak.

³⁴ Im lep inig, el et ika tah naprofeta, ka tah natimi ahlap, ka tah natimi, Nitai ahelwei u Ihova, ekpu idim aru nedo o natimi iyehki ainyak im lep nedo o nup uran nimnim o un.

³⁵ Akumu ika aijaua asega ehele ilpu apa unyimia, athi um athi ehni, im lep ehele ilpu etwamia, athi um athi ehni, Et mun asuptecnaig inhe a Ihova? Et mun lep asaig inhe a Ihova?

³⁶ Akumu jim lep aniv nitai ahelwei u Ihova aijaua: etpu idim nitai ahelwei va atimi asega intas ura, athi um athi ehni; vaig inig nikavaig, eka mun imipalea intas o Atua umoh aijaua, u Ihova esjilid acen Atua uja marom.

³⁷ Namu ika aiek ehele naprofeta iyehki, Et mun asuptecnaig inhe ehelum a Ihova? Et mun lep asaig inhe a Ihova.

³⁸ Ja al eka aijaua, Nitai ahelwei u Ihova; va nitai inigki et ika a Ihova, Vaig inig nikavaig, eka asaig intas inigki aijaua, Nitai ahelwei u Ihova, ek mun lep acaiji caua ainyak, um ika, Akumu jim ika aijaua, Nitai ahelwei u Ihova;

³⁹ va nitai inigki akumu ato aijaua mika, ki ahnag iramia ainyak, ekpu lep atcijaig caua ainyak ahes an nuhup unyak, im lep inmaliyum inig kis alupai caua ainyak im lep ilpu retpomia um ahlo pan itac caua an nuhup unyak:

⁴⁰ ekpu ika ainyak aki ehcamai aijaua irai iji mesese, um lep ika yi imtimlai nesganimtamia irai iji opan, eri eti ahnag iran nitai inigki.