Jeremaia 22 - Intas Etipup

NUARIN TAS ALUPAS 22.

1 Et ahugni ra a Jeremaia vai intas upene im lep vai intas emda, mika eri adumoij an liinmopora ara. 10 Neruvaig irai Sallum, 13 im Jehoiakim, 20 im lep irai Konaia.

¹ ET uce intas o Ihova; Apan aiek an nimnim u natimarid an pece Juta, um asaig intas inigki eahki,

² um ika, Namu atahaijeg intas o Ihova aiek, ak natimarid an pece Juta, na ateuc aiek an nitai ateuc iran u Tevit, aiek, im ilpu aheca unyum, im ilpu atimi unyum, eka atga aijaua irai eucse athatahau iji igki:

³ et ika a Ihova; Akumu tas alep atoh aijaua um ago nedo upene, um imiaras ra sji igki er ehcerucai ra va nikmai ilpu atimi atoraliak itai ura: um jim ago tah nedo efaifa vai ilpu atimi irai taka pece, im ilpu umnij, im ilpu takata eris emesmas a ilpu atamnyura, um jim ehcerucai ra, um jim atgei ilpu atimi et ti nedo has ura an nuarin inigki.

⁴ El eka idim ago aijaua et idivaig intas inigki, erupu atga irai eucse athatahau an nimnim inigki a ilpu atimarid, erupu asjeupigmoig Tevit ara, um ateuc an nitai ateuc iran o un, um atga irai jariot im lep hors; ara, im ilpu atimi alupas ura, im ilpu dualep ura, athi um athi ehni.

⁵ Ja et ika a Ihova, El eka eti atahaijeg intas iji igki aijaua, ek mun asig yi aktit intas ainyak vai nyak, um ika, etpu ahyuahyu nimnim inigki.

⁶ Et uce intas o Ihova vai nitai iji igki etpu yetpam ehele ilpu atimi ehpan irai natimarid an pece Juta; Ek mun ago caua ainyak et idivaig nuarin pece Cileat, um idivaig lolan nedoon Lebanon: ja ekpu ika ainyak, Akupu idivaig namasacen aijaua, um lep idivaig niji maliyum iji ig et eti amen iran tah natimi.

⁷ Ekpu lep ikni ilpu atimi auahas caua ainyak, erupu apos nij va atimi ura ara, athi um athi ehni: erupu attai niji eijiv esjilid unyimia ara, um erekhaigjai an cap.

⁸ Erupu atga u inmaliyum in-igki a nup urai pece et ahinag, erupu lep asaig ehele ilpu apa ura ara, athi um athi ehni, um ika, Et echamecha, et mun ago nedo inigki a Ihova vai inmaliyum alupas inigki?

⁹ Erupu ika ara, Vaig inig nikavaig, eris aticjaig intas etipup u Ihova Atua ura ara, um alaigaheni vai ilpu atmas irai taka pece, um aheca ura.

¹⁰ Akumu jim ehtigtaig aijaua vai ilpu atimi emesmas, um jim imitaig ra: ja akumu ehtigtaig alupas aijaua vai ra sji igki eris apan an taka pece ara: erupu eti lep adumoij pam ara, um almoi inpece ura.

¹¹ Et ika a Ihova vai Sallum inhal u Josaia natimarid an pece Juta, aieu aigki is isjeupigmoig Josaia etman aien um atimarid, is lep ahes an nuarin inigki aien, um apau an taka pece; Etpu eti lep adumoij pam igcaki aien:

¹² ja etpu mas aien an nuarin iyehki eris imiapan yin iran eris wat arore yin ara, etpu eti lep aketo aieu um almoi inpece inigki.

¹³ Kaiheuc vai natimi inig et uctaig neom o un aien va nedo acalacal, im niji uari eom ijinies o un va nedo has; et ika aien eri auaraheca o un a ilpu atimi eblaamnem o un jam eti alupai ra tah nitai, um eti alupai ra nimtan va nauritai ura;

¹⁴ et ika aien, Ekpu uctaig neom alupas vai nyak ainyak, etpualupas um hare niji uari eom ijinies iran; et ikni mai eom o un aien, um ahled uari eijiv ijinies, um aspi an nitai aspi cap.

¹⁵ Napu eti atimarid aiek, vaig inig nikavaig, na ika aiek an esjilid aiek an neom uari eijiv unyum; is hag a etmam um umwig, is lep asan tas alep atoh aien um ago nedo upene, ja is idim amen upene aien.

¹⁶ Is aru atoh aien vai ilpu ihki atimi im lep tup atimi; et ika a Ihova, Is idim ato nyak aien, um amen upene.

¹⁷ Ja na almoi nitai inigki ache aiek, um aktaktai nedo inigki ache, um lep ago, nikavaig, et has iram itai, na atgei ilpu atimi et ti nedo has ura aiek, um ehcerucai atimi, um atoraliak itai ura.

¹⁸ Va nitai inigki et ika a Ihova vai Jehoiakim inhal u Josaia natimarid an pece Juta; Erupu eti imitaig yin ara, um ika, Awe, ak etwak! ka vai ehgan. Awe, ak natahig irak! Erupu eti imitaig yin ara, um ika, Awe, ak natimi alupas unyak! ka vai ehgan, Awe, ak intakata alupas unyak!

¹⁹ Uhpu atelmoi yin et idivaig er atelmoi togke, uhpu aihiai yin um ethaig pan itac yin irai eucse athatahau Jerusalem.

²⁰ Namu aridjipan Lebanon aiek, um ahlaig; etmu ijinies nohram Besan, ahlaig aiek an natcai van pece: eh mun auahas ra sji igki asega eris merit vai euc

²¹ Kis tas ehelum ainyak an namen upene unyum; ja as ika aiek, Inki eti atahaijeg ainyak. Nedo imiahes an halav unyum nigki um imihum pam an nopan inig, nai eti atahaijeg intas unyak aiek.

²² Etpu auahas ilpu atimi alupas unyum asega nimtinjap, uhpu imiapan an taka pece ilpu atimi merit vai euc: napu idim ehcamai aiek, etpu lep imtimlai nesganimtam aiek va nedo has asega unyum.

²³ Ak nup u Lebanon, aiek aigki na ago nasiom unyum aiek irai eijiv, kaiheuc vai euc, etu wit apani nohocred unyum, etpu idivaig nohocred u intakata inig et ika aien yi apos inhal o un!

²⁴ Et ika a Ihova, Et idim inveijec, el et itai asjaaicnaig an nikmak inmatak a Konaia inhal u Jehioakim natimarid an pece Juta, ja el ek atipagki euc iran ainyak;

²⁵ ekpu atcijaig euc ainyak an nikmai ilpu atimi iji ig era ika ara eri atgei euc, im lep an nikmai ilpu atimi iji ig na imtitai ra aiek, an nikmai Nebukatnesar marom natimarid an pece Babelon, im lep an nikmai nup u Kaltia.

²⁶ Ekpu ahlo pan itac euc ainyak, im lep risum inig is apos euc aien, par apan an taka pece, eris eti apos caurau eahki; akupu lep emesmas eahki aijaurau.

²⁷ Ja arupu eti adumoij pam an pece inig arau, arupu merit alupas arau nadumoij pam vaig.

²⁸ Et idim takitai a natimi inigki Konaia, et idivaig natmasimai ahtagrei aien; ka nipjinitai inig era esjum vaig natimi; eh mun ahlo pan itac ra van he, aien im ilpu hal o un, um imiapan ra an pece inig era eti ato ara?

²⁹ Ak nobohtan, ak nobohtan, ak nobohtan, namu atahaijeg intas o Ihova aiek.

³⁰ Et ika a Ihova, Akumu aged intas va natimi inigki aijaua, um ika, inyi eti eteuc tah inhal o un, inyi eti amen upene aien an numoh o un: inyi eti amen upene tah irai ilpu hal o un im ilpu mapon, inyi eti lep ateuc tah ira ra an nitai ateuc iran u Tevit, um atimarid an pece Juta irai iji mesese.