Jeremaia 21 - Intas Etipup

NUARIN TAS ALUPAS 21.

1 Et abraig hal a Setekaia mika eri apan ehele Jeremaia um ahodai yin va nedoa inig et ago a Nebukatnesar. 3 Et upyi asaig a Jeremaia um ika eri arehed inmaliyum um ati nedoa esjilid, im lep eri amen has an taka pece a nup u Jerusalem. 8 Et asan tas ehele ra aien mika eri leh imi nup u Kaltia ara. 11 Et acaiji natimarid aien im ilpu atimi ehpan iran va nedo ura.

¹ INTAS inig is ahes ehele Ihova um yetpam ehele Jeremaia nigki, is wat abrai Pesur inhal u Melkaia, im Sefanaia inhal u Measia natimi ahlap, a Setekaia natimarid mika eri apan ehelen, um ika,

² El et upene iram, namu ahodaig Ihova aiek vai caija; vaig inig nikavaig, et ati nedoa vai caija a Nebukatnesar natimarid an pece Babelon; kit etpu ago vai caija a Ihova et idivaig niji auritai imiali asega o un, um ika yi udei caija aien um adumoij pan.

³ Is um ika ehele rau a Jeremaia, Arumu ika ehele Setekaia aijaurau:

⁴ Et ika a Ihova Atua u nup Isreel; Akumu ato aijaua mika, ekpu imiadumoij pan nij va atimi iji ig ainyak et amen irai ikmamia, eka ago nedoa iran aijaua vai natimarid an pece Babelon, im lep vai nup u Kaltia iji ig, era arehed an maliyum itac ara um ago nedoa vai caua, ekpu lep asjapicnai ra ainyak juju an niblan maliyum inigki.

⁵ Ekpu lep ago nedoa vai caua ainyak an nikmak inig ek adaigjai ainyak, im nikmak emda, im lep an nehniv unyak, im intavaitap im nedemda alupas.

⁶ Ekpu atgei ilpu atimi amen an maliyum inigki ainyak, atimi im niji itai eklim edo irai pece: erumu emesmas ara an nemehe has esjilid.

⁷ Et ika a Ihova, etu wit ti pan itac nitai iji igki ekpu atcijaig Setekaia natimarid an pece Juta ainyak, im ilpu aheca o un, im ilpu atimi o un, ilpu ahri atimi marom eris eti emesmas ara an maliyum inigki, vai nemehe has, im nedoa, im numlaig has, an nikmai Nebukatnesar natimarid an pece Babelon, im lep an nikmai ilpu atimi tak atimi ira ra, im lep an nikmai ilpu atimi iji ig era ika ara eri atgei ra: etpu atgei ra aien an nedoa; etpu eti aiheuc vai ra aien, um eti udei ra, ja etpu auahas ra aien.

⁸ Namu ika aiek ehele nup igcaki, Et ika a Ihova; Akumu ato aijaua mika, ek ati an nuhup unyimia ainyak nefalaig vai nitai umoh iran, im nefalaig vai inmas.

⁹ Ara asega erupu amen an maliyum inigki ara erupu emesmas ara an nedoa, im lep an numlaig has, im lep an nemehe has: ja ara asega erupu apan itac ara, um leh imi nup u Kaltia iji ig era arehed iramia ara um ago nedoa vai caua, erupu umumoh ara, naiheuc u Atua nigki.

¹⁰ Et ika a Ihova, Ek mun alum inmaliyum inigki ainyak va nitai has, jameti va nitai upene: uhpu atcijaig an nikmai natimarid an pece Babelon, etpu atnamud aien an cap.

¹¹ Im lep vai ilpu atimi ehpan irai natimarid an pece Juta, namu ika aiek ehele ra, Akumu atahaijeg intas o Ihova aijaua;

¹² Et ika a Ihova, Ak ilpu mapoi Tevit; Akumu tas alep atoh an nuhialeg aijaua, um imiaras ra sji igki er ehcerucai ra va nikmai ilpu atimi atoraliak itai ura, vai yi jim ehcohos pam intavaitap unyak et idivaig incap, um atnamud mika etpu elika vaig tah par ahni, va nedo has inig eka ago aijaua.

¹³ Et ika a Ihova, Akumu ato aijaua mika, ek mun aat iramia ainyak, ak ilpu atimi amen irai mai ij er ahumiaig, eka ika aijaua, Erupu aat iraija a di? erupu yetpam irai uarin amen iran uja a di?

¹⁴ Et ika a Ihova, Ekpu aru iramia ainyak, et idivaig nedo unyimia; ekpu adnan cap ainyak an nesei o un, etpu atnamud niji itai asega marehed mihtag.