Jeremaia 20 - Intas Etipup

NUARIN TAS ALUPAS 20.

1 Et wat, ahpoi Jeremaia a Pesur er anvi nidan mat, um, asuptecnaig neruvaig esjilid, iran. 7 Et asan tas ehti, o, Jeremaia, va namcel ros, yin ura, 10 im nedo efaifa, ura, 14 im lep ro, napos yin, vaig.

¹ IS wat ahgei a Pesur inhal u Imer natimi ahlap, im natimi alupas an neom u Ihova, mika is asuptecnaig intas iji ig a Jeremaia.

² Is ahpoi Jeremaia naprofeta a Pesur, um ahtehgaig nauincai iyehki irai eduon is amen an neucse nathatahau u nup u Benjamin, is ubutpotet neom u Ihova.

³ Is wat lahlah an tak apnyin, is atipagki Jeremaia an nauincai a Pesur; ja is ika a Jeremia ehele Pesur, Et mun eti anvi nidam a Lhova, par ika Pesur, (Nahi,) jam Mecor-misabib, (Nimtitaig alupas marehed mihtag.)

⁴ Et ika a Ihova. Namu ato aiek mika, ekpu ika ainyak an itai imtitaig alupas vaig aiek imtam, im lep imi ilpu apa unyum: erupu atgei ra a ilpu atimi tak atimi ira ra, napu alum ra aiek: ekpu atcijaig nup u Juta asega ainyak, an nikmai natimarid an pece Babelon, etpu arore ra aien um imiapan ra an pece Babelon, etpu lep atgei ra aien an nauitoga.

⁵ Im lep inig, ekpu atcijaig nemda asega an maliyum inigki ainyak, im niji auritai asega iran, im impadiaig upene asega iran, im naga upene asega u ilpu atimarid an pece Juta, ekpu idim atcijaig ainyak an nikmai ilpu atimi tak atimi ira ra erupu atoraliak itai iji igki ara, um lucsei, um imiapan Babelon.

⁶ Uhpu arore euc, ak Pesur, um imiapan euc, im lep ra asega iji ig era amen an nimnim unyum: napu apan Babelon aiek, napu mas aiek eahki, uhpu atelmoi euc eahki, aiek marom im lep ilpu apa unyum asega iji ig, as asaig intas ahcil ehele ra aiek.

⁷ Ak Ihova, as imiacaij nyak aiek, kis imiaiji intas unyum ainyak: as imiisjis aiek um esjilid irak: er imilaav nyak an nadiat asega, era imiafakahcil nyak ara asega.

⁸ Ek wat atupun um tas ainyak, el ek ahlaig ainyak vai nedo acalacal, ka el ek asuptecnaig ainyak va natoraliak itai, era imiafakahcil nyak ara vai intas o Ihova, um asan tas auyat vai nyak irai iji adiat.

⁹ Kis lep ika ainyak. Ekpu eti asuptecnaig yin ainyak, um eti tas an nidan; ja is eteuc an liinmopok intas o un et idivaig incap alaume eris atapnes nai iji eduok, is ugni nyak par atapnes, is ehka vai nyak par eucsup.

¹⁰ Ek mun atahaijeg intas maumau u atimi et ahinag ainyak, era ika ara. Akumu asuptecnaig nimtitaig alupas vaig marehed mihtag aijaua, ecrupu lep asuptecnaig aijama. Era imiiris nyak a ilpu apa unyak mika ki epihtau ainyak, um ika. Kit uhpu oop yin, intupu esjilid iran akaija um leh neruvaig uja iran.

¹¹ Ja et amen ehelek a Ihova et idivaig neucsupo er imtitaig alupas yin: va nitai inigki erupu epihtau a ilpu atimi atmas piv vai nyak, erupu eti esjilid irak ara: erupu ehcamai alupas ara: erupu eti ago nedo arapakau ara: uhpu eti ahnag an nehcamai ura irai iji mesese.

¹² Ja, ak Ihova esjilid acen, na ahilek nedo o ilpu atimi upene aiek, na ato naktaktai u inliinmopoi atimi aiek, ekpu almoi neruvaig unyum vai ra ainyak: ek mun idim asuptecnaig nohocred unyak ehelum ainyak.

¹³ Akumu acesaces nohranitai vai Ihova aijaua, akumu imiahpas Ihova aijaua: is idim imiatamaig nesgai natimi ihkin natimi aien vai nikmai ilpu atimi auatatimi, kis wat ika ainyak,

¹⁴ Uhmu asan tas ahlaijaig va nadiat inig eris apos nyak iran: uhmu jim asan tas acis yi alwai nadiat inig is apos nyak a risik.

¹⁵ Uhmu asan tas ahlaijaig va natimi inig is asuptecnaig ehele etmak aien, um ika, Eh mun apos ehelum inhalav atamaig; is imiacitak alupas vaig aien.

¹⁶ Etpu idivaig inmaliyum iji ig is auahas a Ihova um eti adumoij an liinmopon a natimi iyehki: etmu ahgei nahlaig aien an nuhialeg, im naunyauwaig an nadiatadiat.

¹⁷ Is a uri tah par eti atgei nyak an nipjinetgai risik, mika yi ehpanitai unyak a risik, mika yi opoc vai nyak aien irai iji mesese?

¹⁸ Kis a uri ainyak par ehcohos pam au nipjinetgai risik, mika ki ecetai nauritai im nohocred, um auahas niji adiat unyak an nehcamai?