Jeremaia 2 - Intas Etipup

NUARIN TAS ALUPAS 2.

1 Et asuptecnaig nupyi aiheuc o un vai nup u Juta a Atua, um acaiji ra, va, nedo ura, par ispara impalea intas o un, 9 et eche nedo ura, im nedo o nup urai pece asega. 14 Et ahes ehele ra, niji ohocred ura. 20 Niji edo has u nup u Juta. 31 Et erekhaigse a Atua nitai iji igki era asgeig iran ara.

¹ IS lep yetpam ehelek intas o Ihova, um ika.

² Namu apan aiek um tas ijinies ehele Jerusalem, um ika. Ak intakata, et ika a Ihova. Ek mun imiehva euc ainyak im lep naiheuc unyak vai euc an natahig unyum, im naiyu u inliinmopok vai euc, kis wat aniv euc vai nyak ainyak, as wat ahced nyak aiek an namasacen, an pece iyehki eris eti ahapol iran.

³ Is um ika a Ihova. Era itap vai Ihova a nup Isreel, um lep hupnai ohwai itai o un: uhpu aru nedo ura asega era auahas ra ara: etpu yetpam ira ra nohocred.

⁴ Akumu atahaijeg intas o Ihova aijaua, ak ilpu mapoi Jekob, im niji tehet asega u nup Isreel:

⁵ et ika a Ihova. Neveh nedo maumau inig eris ecetai irak a ilpu retpomia, mika eris apan itac acen vai nyak ara, is um takitai nedo ura, eris lep ahnag ara?

⁶ Eris eti ika ara, Ihova yek eda, aien aigki is imiaridjipam caija aien ahes an pece Ijipt, is atau iraija aien an namasacen, an pece iyehki is ti inwai iran, is amen nehpaiitai iran, an pece iyehki eris ahvig wai iran, an pece u nalmun mas, an pece iyehki is eti ahced iran tah natimi, is lep eti amen iran tah natimi?

⁷ Kis um imiapam caua ainyak lan pece upene, mika aki hegaig nohwai itai iran aijaua, im niji itai upene iran: ja akis wat apam an pece unyak aijaua, akis auahas inpece unyak aijaua, um ika yi itai amcel vaig inpece upene unyak.

⁸ Eris eti ika a ilpu atimi ahlap, Ihova yek eda? eris eti ato nyak a ilpu atimi asuptecnaig intas alep unyak: eris lep imipalea intas unyak a ilpu atimi alupas u ilpu atimi unyak, eris ika a ilpu profeta is ahu intas ira ra a Beal, eris lep ahau pan itai ara is takitai.

⁹ Et ika a Ihova, Va nitai inigki ekpu lep imiisjis ainyak ehelemia, ekpu lep imiisjis ainyak ehele ilpu mapomia.

¹⁰ Akumu idim atga an jap aijaua, um yetpan irai iji pece u nup u Kitim, um almoi; um abra atimi mika eri apan an pece Kitar, um aktaktai upene, um almoi el et eteuc tah nedo et idivaig nedo inigki.

¹¹ Eris idim eti ika a nup uran tah inpece eri lucsei ilpu atmas et eche, ja eris lep idim takitai a ilpu atmas ura; ja eris asjapigmoig natimi alupas ura a ilpu atimi unyak vai itai iji ig et takitai ache.

¹² Et ika a Ihova, Akumu imiali aijaua va nedo inigki, ak nup uran nohatag, akumu eucjeucjeucaij aijaua, etmu ehioehio alupas inliinmopomia.

¹³ Era mun ago nedo has et ero a ilpu atimi unyak; era mun udei nyak ara nimtanwai et ahlau ohua sjai inwai umumoh iran, eris lep ucji ehpaiitai vai ra ara, nehpaiitai ameled marom et elel inwai iran.

¹⁴ Et aheca a Isreel, kaʼoʼo? et aheca aien eris apos yin an nimnim, kaʼoʼo? er atoraliak itai o un van he?

¹⁵ Eris aunyauwaig vai yin niji laion takuras, is ijinies nohrara, eris mun auahas inpece o un: eris mun atnamud niji maliyum o un, et eti amen iran tah natimi.

¹⁶ Im lep inig, era mun auud nidjinum ijinijinies a nup u Nof im nup u Tahapanes.

¹⁷ Era mun ago nedo inigki vai euc ara, vaig inig nikavaig, as mun udei Ihova Atua unyum aiek, is wat atau iram an nikman aien an nefalaig.

¹⁸ Im lep inig, na a uri aiek par alaig pan Ijipt, mika an umnyi inwai Saihor? Ka na a uri aiek par alaig pan Asiria, par umnyi inwai an nofowai Yufretes?

¹⁹ Napu lucsei nohocred aiek va nedo has unyum, mika an ato nadumoij pan unyum aiek: et ika a Ihova Natimarid esjilid acen, Namu ato aiek um ecetai mika et itai has um acen, mika na mun udei Ihova Atua unyum aiek, im lep mika na eti imtitai nyak aiek.

²⁰ Kis ahtasvi nitai ahelwei unyum ainyak itu acen, um asjamud niji itai arore euc; as lep ika aiek, Inki eti imipalea ainyak; ja na mun ahnag aiek, um ago ingeijid irai iji edoon ijinies asega im lep ithai iji cai mat asega.

²¹ Kis idim ahwaig euc ainyak et idivaig vaine esjilid, nupsi vaine inveijec: ja et echamecha ek mun ecet euc ainyak et idivaig vaine et eche, nahtai vaine has imi nyak?

²² Et ika a Ihova Natimarid, El et yiri euc aiek irai sota, um leh soop alupas, ja er asjaaicnaig nedo has unyum an nuhup unyak.

²³ Et ehka vai euc par ika, Ek eti emig ainyak, ek mun eti alaigaheni vai ilpu atmas ainyak; namu almoi nefalaig unyum an niskanse aiek, namu ato nitai inig aiek na mun ago aiek: na idivaig kamela atahig tupko aiek et auroauro um alupas aien um athut irai efalaig o un;

²⁴ na idivaig togke aleg aiek et umjijeuc an namasacen aien, et atleg nimtinjap aien an merit alupas o un; et ehka vaig tah par imiadumoij pam yin vai inmerit o un; et eti imiisjis tah natimi par ahilek yin; eri lep ecet yin ara an mohoc o un.

²⁵ Namu aminjinaig aiek va eri jim atipagki incedpun neduom, um atapnes inhujgopul unyum, va an jim ahvig nitai umnyi aiek: ja na ika aiek, Oʼo; et elika: et mun idim aiyu inliinmopok ainyak vai ilpu atamaig irai taka pece, ekpu lep apitac ra ainyak.

²⁶ Et idim ehcamai a natimi ehnegitai eh wat ecet yin, et idim uco, era ehcamai a nup Isreel; ara marom, im ilpu atimarid ura, im ilpu atimi alupas ura, im ilpu atimi ahlap ura, im ilpu profeta ura,

²⁷ era ika ara ehele nauincai, Na etmak aiek; im lep ehele inhat, Na mun apos nyak aiek: era mun idim atidjira irak ara, um eti alum nyak: ja an nopan ohocred ura erupu ika ara, Namu atidai aiek, um imiatamaig cama.

²⁸ Ja niji atmasimai unyimia yek eda eka mun ago ra aijaua vai caua? erumu atidai ara, el era emda ara, par imiatamaig caua an nopan ohocred unyimia: et ahinag niji maliyum unyimia, era lep idim uco a ilpu atmas unyimia, ak nup u Juta.

²⁹ Et ika a Ihova, Eka a uri aijaua par imiisjis ehelek? eka mun imipalea intas unyak aijaua asega.

³⁰ Ek mun aredei ilpu hal unyimia ainyak, ja et takitai; era mun eti leh nacaiji ra unyak ara: eka mun atgei ilpu profeta unyimia aijaua irai auitoga unyimia, et idivaig laion et auahas atimi.

³¹ Ak ilpu atimi an nopan inig, akumu aktaktai intas o Ihova aijaua. Ek mun idim eti idivaig namasacen ainyak vai nup Isreel, um eti idivaig inpece u napat; eris idim ika a ilpu atimi unyak van he, Ecra ilpu atimi alupas aijama, ecrupu eti lep adumoij pam ehelum aijama?

³² Et ehka vaig tah natahig par ahnag irai iji itai yecrei yin iran, ka natahig inig et atidai aien par ahnag irai itai aso yin, ja era mun ahnag irak a ilpu atimi unyak ira adiat iji ig et elika nesvi vaig.

³³ Na a uri aiek par ago nedo inig mika yi aiyu inliinmopoi atimi vai euc? na mun esege imi ilpu takata et eche aiek nedo unyum.

³⁴ Im lep inig, eh mun ecetai an tid ira apelumai unyum inja irai ilpu ihki atimi upene as atgei ra aiek: ek mun eti ahilek emda ainyak par ecetai inja ira ra, jam ecetai irai itai iji igki asega.

³⁵ Ja na ika aiek, Ek mun idim eti ago nedo has ainyak, etpu imiadumoij pan nedemda o un vai nyak aien. Namu ato aiek mika, ekpu aru iram ainyak, vaig inig nikavaig, na mun ika aiek, Ek mun eti ago nedo has ainyak.

³⁶ Na a uri aiek par atga jipe mika an ahced nefalaig inyi eche? napu lep ehcamai aiek vai nup Ijipt, et idivaig as ehcamai aiek vai nup Asiria.

³⁷ Im lep inig, napu ahes igcaki aiek, um apan itac, um aktit nikmam an nidjinum: et mun idim erekhaigse nitai iji igki a Ihova na asgeig iran aiek, napu eti amen upene vaig aiek.