Jeremaia 19 - Intas Etipup

NUARIN TAS ALUPAS 19.

Et ehvaig a Jeremaia mika, eri auahas nup u Juta va nedo has ura, et idivaig er ahtagrei inhubej er ago an tan apol.

¹ IS um ika ehelek a Ihova, Namu apan aiek um leh inhubej tan apol inyi ethi is ago a natimi ago ipjiitai, im lep nahaiji ilpu atimi alupas ira atimi, im nahaiji ilpu atimi alupas irai ilpu atimi ahlap;

² um apan itac an niskanse u inhal u Hinnom, et ubutpotet u neucse nathatahau iyehki er imiapan itac nohok iran, um efehtas eahki intas iji ig ekpu asuptecnaig ehelum ainyak.

³ Namu ika aiek, Akumu atahaijeg intas o Ihova aijaua, ak ilpu atimarid an pece Juta, im ilpu atimi amen Jerusalem; Et ika a Ihova esjilid acen, Atua u nup Isreel; Akumu ato aijaua mika, ekpu imiapam nitai has inig ainyak an nuarin inigki inyi uce, ara asega erupu atahaijeg vaig ara, etpu ahelu intikgara ehro.

⁴ Vaig inig nikavaig, era mun udei nyak ara, um auahas nuarin inigki, um atnamud nitai auanipin upene vai ilpu atmas iji ig irai taka pece, eris eti ato ra ara im ilpu atmil ura, im ilpu atimarid an pece Juta, um atgei atmas ilpu atimi upene is ahinag an nuarin inigki;

⁵ era lep uctaig niji uarin ijinies vai Beal ara, mika eri atnamud ilpu halav atamaig ura an cap, niji itai ahlap atnamud imi Beal, kis acaiji ainyak, um ika eri jim ago, kis esjum ainyak vaig.

⁶ Et ika a Ihova, Va nitai inigki etpu idim yetpam nopan iyehki, uhpu eti anvi nidan nuarin inigki par ika Tofet, ka Niskanse u inhal u Hinnom, ja Niskanse atgei atimi iran.

⁷ Ekpu auahas intas anacanac u nup u Juta im nup u Jerusalem ainyak an nuarin inigki; ekpu ika ainyak eri atgei ra an nedoa a ilpu atimi tak atimi ira ra, im ilpu atimi iji ig era ika ara eri atgei ra: ekpu atcijaig nohura emesmas ainyak, mika yi itai caig incai niji man an nauanohatag, im niji itai eklim edo irai pece aleg.

⁸ Ekpu ika ainyak yi ahyuahyu inmaliyum inigki, im nitai amcel vaig; ara asega era ahteregdei inmaliyum inigki ara, erupu imiali ara um amcel vaig va niji itai has asega iran.

⁹ Ekpu ika ainyak eri caig nohui ilpu halav atamaig ura ara, im nohui ilpu halav atahig ura, erupu caig nohui ilpu apa ura ara asega, athi um athi ehni, an nedoa vai inmaliyum ura im namen ehka iyehki, erupu auoh ohocred ra vaig a ilpu atimi tak atimi ira ra, im ilpu atimi iji ig era ika ara eri atgei ra.

¹⁰ Ja namu ahtagrei inhubej iyehki aiek an nuhup u ilpu atimi iji ig era ahced euc ara,

¹¹ um ika ehele ra, Et ika a Ihova esjilid acen; Ekpu ahtagrei nup igcaki ainyak im inmaliyum inigki, et idivaig et ahtagrei inhubej tan apol tah, et elika par lep ago upene: erupu lep atelmoi nohui ilpu atimi emesmas Tofet ara, ja etpu ti inuarin par atelmoi iran.

¹² Et ika a Ihova, Inyi idim uce nedo unyak vai inuarin inigki, im lep vai ilpu atimi amen iran, mika yi idivaig Tofet inmaliyum inigki:

¹³ uhpu auahas nitap irai iji eom Jerusalem, im lep niji eom u ilpu atimarid an pece Juta, um idivaig inuarin u Tofet, im lep neom asega iji ig eris atnamud nitai auanipin upene an lolan neom iran ara va niji itai asega an nohatag, um atladwi niji itai ahlap er umnyi vai ilpu atmas irai taka pece.

¹⁴ Ja is ahes Tofet a Jeremaia, inuarin inig is abraig yiu a Ihova, mika yi apan iran um asuptecnaig intas, um apam, um aiji an noko… u neom u Ihova, um ika ehele atimi asega,

¹⁵ Et ika a Ihova esjilid acen. Atua u nup Isreel; Akumu ato aijaua mika, ekpu imiapam ainyak an maliyum inigki, im lep irai iji maliyum asega iran, nitai has asega inig kis asuptecnaig vaig ainyak, vaig inig nikavaig, era mun ago ipjin nauinwara ara, mika eri jim atahaijeg intas unyak ara.