Jeremaia 18 - Intas Etipup

NUARIN TAS ALUPAS 18.

1 Et ehvaig a Jeremaia mika et idivaig natimi ago ipjiitai an tan apol a Atua an nemda esjilid o un par ikni nup urai iji elcau. 11 Et ika a Atua yi aru irai nup u Juta va nedo imipalea esjilid ura. 18 Et alaigaheni a Jeremaia mika yi aru nedo o ilpu atimi alwai yin a Atua.

¹ INTAS inig is ahes ehele Ihova um yetpam ehele Jeremaia nigki, um ika,

² Namu atidai aiek, um asuol se pan an neom u natimi ago ipjiitai an tan apol, ekpu ika ainyak napu ahgei intas unyak aiek eahki.

³ Kis asuol se pan ainyak an neom u natimi ago ipjiitai an tan apol, is idim ago nauritai o un aien irai iji itai arehed.

⁴ Eris auahas nipjinitai iyehki is ago aien an tan apol an nikmai natimi ago ipjiitai: va nitai inigki is aketo aien um lep ago nipjinitai is eche, is idivaig is upene irai natimi ago ipjiitai par ago.

⁵ Is yetpam ehelek intas o Ihova, um ika,

⁶ Et ika a Ihova, Ak nup Isreel, et tup upene irak par ago vai caua et idivaig natimi ago ipjiitai inigki. Akumu ato aijaua, ak nup Isreel, mika eka amen aijaua an nikmak, et idivaig et amen intan apol an nikmai natimi ago ipjiitai.

⁷ An nopan inig eku wit tas ainyak vai nup uran pece et ethi, ka nup uran nelcau et ethi, par atecrei ra, um alcapdicraig ra, um auahas ra;

⁸ el era adumoij pam an nedo has ura a nup uran nelcau iyehki, kis tas vai ra ainyak, ekpu adumoij an liinmopok ainyak va nitai has inig kis ika ainyak ki ago vai ra.

⁹ Im lep an nopan inig eku wit tas ainyak vai nup uran pece et ethi, ka nup uran nelcau et ethi, par uctai ra um ahwai ra;

¹⁰ el era ago nedo has ara an nuhup unyak, um eti atahaijeg intas unyak, ekpu adumoij an liinmopok ainyak va nitai upene inig, kis ika ainyak ki ago va namen upene ura.

¹¹ Va nitai inigki namu idim tas aiek ehele nup u Juta, im lep ehele ilpu atimi amen Jerusalem, um ika, Et ika a Ihova; Akumu ato aijaua mika, ek aktaktai nitai has vai caua ainyak, um anacanac intas anacanac vai caua: akumu lep adumoij pam aijaua asega va nedo has unyimia, athi um athi ehni, um ago upene niji efalaig unyimia im nedo unyimia.

¹² Ja eris ika ara, Et ehka: ecrupu apitac niji aktaktai unyima aijama, ecrupu lep ago inmerit has u inliinmopoma imipalea aijama, athi um atni ehni.

¹³ Et ika a Ihova; Va nitai inigki akumu ahodaig nup urai iji pece aijaua, et mun atahaijeg tah nitai et idivaig nitai iji igki a di? et mun ago nedo has esjilid a inhalav atahig u nup Isreel.

¹⁴ Erupu eti udei sno ui Lebanon natimi vai inhehteuc anliin pece; erupu eti udei inwai ahlau ohua sjai natimi vai inwai an taka pece.

¹⁵ Ja era mun udei nyak a ilpu atimi unyak, era mun atnamud nitai auanipin upene vai ilpu atmas ura, era mun epihtau ara irai efalaig ura, eris atcijaig niji efalaig itu ara mika eri atga irai efalaig et eche, an nefalaig eti assijai;

¹⁶ era mun ago umaruma inpece ura ara, etpu itai amcel vaig irai iji mesese; erupu imiali vaig natimi asega erupu ahtaregdei iran ara, um auhohaig nidjinira.

¹⁷ Ekpu imiterimterim ra ainyak et idivaig nimtinjap alupas an nuhup u ilpu atimi tak atimi ira ra; ekpu atidjik ira ra ainyak, um eti alum ra, an nopan ohocred ura.

¹⁸ Eris ika ara, Intumu apan akaija, um anacanac an tas vai Jeremaia; inyi idim eti ti intas alep ehele ilpu atimi ahlap, im nato itai ehele ilpu atimi arapakau, im intas ehele ilpu profeta. Intumu apan akaija, um auud yi aijiraig intas o un, intumu jim atahaijeg tah intas o un akaija.

¹⁹ Ak Ihova, namu aminjinai nyak aiek, um ahgei intas o ilpu atimi tak atimi irak.

²⁰ Era aru nedo upene unyak ara va nedo has ura; era mun ucji nehpanitai ara par auahas nyak. Namu imiehva aiek mika kis aiji an nuhup unyum ainyak, par imiaras ra ehelum um imiadumoij pan nedemda unyum vai ra.

²¹ Va nitai inigki namu atcijaig ilpu hal ura aiek va numlaig has, uhmu ahcai ra irai auitoga; erumu tup amen a ilpu ehgara vai inmas u ilpu hal ura im ilpu atamnyura; erumu emesmas a ilpu atimi ohoigmeto ura an nemehe has; uhmu atgei ilpu takuras ura an nedoa.

²² Uhmu ahgei nahlaig ura irai eom ura, nau wit auroauro aiek um imiapam niji ira atimi ehele ra: era mun ucji nehpanitai ara par arop irak, era mun adenaig niji itai apro itai ara va neduok.

²³ Ak Ihova, na idim ato intas alwai nyak ura asega aiek par atgei nyak; namu aru nedo acaiacai ura aiek, um jim ohpodohpod nedo has ura aiek an nuhup u nesganimtam; uhmu auahas ra an nuhup unyum; etmu uce nedo unyum vai ra an nedemda unyum.