Jeremaia 17 - Intas Etipup

NUARIN TAS ALUPAS 17.

1 Er imiapan nup u Juta an taka pece ra nedo has ura. 5 Er asan tas ahlaijaig rai ra sji igki era asgeig ira atimi ara. 7 er asan tas acis yi alwai vai ra sji igki era asgeig ira Atua ara. 9 Et ehka vai inliinmopoi atimi efaifa par ahiyek Atua. 12 Et imiatamaig atimi a Atua. 15 Et asan tas ehti a Jeremaia vai ra iji igki era imiafakahcil intas asuptecnaig o un ara. 19 Et abrai yin a Atua mika yi apan um aketo um asan tas etipup ehele atimi mika eri apos nadiat atumop ara.

¹ EH mun aged nedo has u nup u Juta irai pen aiurn, im lep an nidjan taimunt: eh mun wud ugyit an narasin liinmopora, im lep irai ipat irai atau ura;

² era wat imiehva a ilpu hal ura niji atau ura im niji itap ura ui eai mat im lep irai edoon ijinies.

³ Ak nup an nedoon unyak, ekpu atcijaig naga unyimia anliin pece ainyak im inpadiaig unyimia mika eri atoraliak, im lep niji eom emda unyimia irai iji uarin asega unyimia va nedo has unyimia.

⁴ Eka mun atcijaig aijaua an nedo unyimia inpece inig kis alupai caua ainyak; ekpu ika ainyak akupu aheca u ilpu atimi tak atimi iramia aijaua an pece inig eka eti ato aijaua: eh mun adnan cap an tavaitap unyak etpu cas irai iji mesese.

⁵ Et ika a Ihova; Uhpu asan tas ahlaijaig vai natimi inig et asgeig ira atimi aien, um ika eri imiaras yin natimi, um udei Ihova ali liinmopon.

⁶ Etpu idivaig incai eti nerin aien an tupauun, etpu eti ato aien et wat ham niji itai upene; etpu amen aien irai ucda mesei an namasacen, an pece inig et eti edel itai iran, um eti amen iran tah natimi.

⁷ Et mun ahesmoij a natimi inig et asgeig irai Ihova aien, et lep itai asgeig iran o un a Ihova.

⁸ Etpu idim idivaig incai inig aien eris ahwaig ui wai, et darap niji eucvan u ofowai, um eti ato et wat agesega alupas, etpu mat nerin; etpu eti auatialidi an nopan eti ehe, ja etpu oho um eti atumop.

⁹ Et esjilid nefaifa u inliinmopoi atimi irai iji itai asega, et idim has alupas: et ehka vaig tah par ato.

¹⁰ Ek Ihova ainyak, ek ahilek inliinmopoi atimi ainyak, um ato naktaktai ura, mika ki alupai atimi asega et idivaig nedo ura, um idivaig nohwai nauritai ura, yi athi um athi ehni.

¹¹ Natimi inig et leh naga aien ja eti va nedo atoh, et idivaig inman inig aien et aibuthan nohwai man et eche; etpu udei naga o un an nohoigmeto o un, etpu atimi ahnag aien an nopan mas o un.

¹² Nuarin inig et eteuc an neom itap uja iran nigki, nikavaig, nitai ateuc esjilid eris ati ijinies an nopan iyehki itu acen.

¹³ Ak Ihova, Atua inig era asgeig iram a nup Isreel, erupu ehcamai ara asega era udei euc ara, uhpu aged nidara an nobohtan era atcijaig nyak ara, vaig inig nikavaig, era mun udei Ihova inig ara et imtanwai weimu aien.

¹⁴ Ak Ihova, namu ika aiek ki cehecehe ainyak, ekpu lep cehcehe ainyak; namu imiatamaig nyak aiek, uhpu imiatamaig nyak: ek idim imiahpas euc ainyak.

¹⁵ Im lep inig, era ika ehelek ara sji igki, Intas o Ihova yek eda? et upene mika yi apam.

¹⁶ Nedo unyak nigki, ek mun eti esjum ainyak par apitac euc, um asuptecnaig intas unyum: kis eti lep merit ainyak nopan ohocred ura; na idim ato aiek intas inig is ahes an nipjineucsek, kis tas ainyak an nuhup unyum.

¹⁷ Namu jim auoh ohocred nyak aiek: ek asgeig iram ainyak an nopan has.

¹⁸ Erumu ehcamai ara sji igki era atmas piv vai nyak ara, ja ekmu jim ehcamai ainyak: erumu lep imtitaig ara, ja ekmu jim imtitaig ainyak: namu imiapam vai ra nopan has aiek, um auahas ra an nohocred alupas.

¹⁹ Is ika ehelek a Ihova; Namu apan aiek um aiji an neucse irahed u atimi, era apam an maliyum a ilpu atimarid an pece Juta, era lep apan itac iran ara, im lep irai iji eucse irahed asega Jerusalem;

²⁰ um ika ehele ra, Akumu atahaijeg intas o Ihova aijaua, ak ilpu atimarid an pece Juta, im nup u Juta asega, im nup u Jerusalem asega, eka atga irai eucse irahed iji igki aijaua:

²¹ et ika a Ihova; Akumu aminjinaig caua aijaua, um jim apos tah nitai ahelwei an nadiat atumop, um jim imiapam irai eucse athatahau Jerusalem;

²² um jim leh tah nitai ahelwei irai imnim unyimia um apos pan an nadiat atumop, um jim ago tah nauritai, jam apos upene nadiat atumop, et idivaig kis asan tas alep ainyak ehele ilpu retpomia.

²³ Ja eris eti atahaijeg ara, um eti atgeig pam intikgara; eris ago ipjin nauinwara ara, mika eri eti atahaijeg ara, um lep mika eri eti leh nesege imi ra.

²⁴ Et ika a Ihova, Etpu idim uco, el eka atahaijeg upene intas unyak aijaua, um eti imiapam tah nitai ahelwei irai eucse athatahau an maliyum inigki an nadiat atumop, jam apos upene nadiat atumop, um eti ago tah nauritai iran;

²⁵ erupu lep apam irai eucse athatahau an maliyum inigki a ilpu atimarid im ilpu atimi alupas, erupu ateuc an nitai ateuc esjilid u Tevit ara, erupu lep atga ara irai jariot im hors, ara marom, im ilpu atimi alupas ura, im nup u Juta, im nup u Jerusalem: etpu lep amen aktit inmaliyum inigki irai iji mesese.

²⁶ Erupu ahes natimi irai iji maliyum an pece Juta, im niji uarin ubutpotet Jerusalem um arehed iran, im inpece Benjamin, im inuarin marara, im niji edoon, im inpece inig et ahes nuritoga atahig iran, um imiapam niji itai ahlap atnamud, im tup niji itai ahlap, im niji itai ahlap er caig, im nitai auanipin upene, erupu imiapam niji itai ahlap imiahpas ara an nimnim u Ihova.

²⁷ Ja el eka eti atahaijeg intas unyak aijaua um apos upene nadiat atumop yi uce, par eti apos nitai ahelwei, um etiapam irai eucse athatahau Jerusalem an nadiat atumop; ekpu ati incap ainyak irai eucse athatahau iran, etpu auahas niji eom esjilid Jerusalem, uhpu eti lep ahni.