Jeremaia 16 - Intas Etipup

NUARIN TAS ALUPAS 16.

1 Et upyi asuptecnaig a naprofeta nauahas ehni vaig u nup u Juta ira almu itai iji ig, nikavvig, et eti leh ehgan a naprofeta, et eti apan aien an nimnim u ilpu atimi taigtaig, et lep eti apan aien an nimnim u ilpu atimi imiacitak. 10 Et esjilid nedo has ura irai edo has u ilpu retpora. 14 Etpu esjilid nimiadumoij pam ra eru wit ahes irai taka pece ara, irai nimiapam ra eris wat ahes an pece Ijipt ara. 16 Etpu ecero aru nedo apat ura a Atua.

¹ IS yetpam ehelek intas o Ihova, um ika,

² Namu jim leh ehgam aiek, um jim apos ilpu halav atamaig im ilpu halav atahig an nuarin pece inigki.

³ Et ika a Ihova vai ilpu halav atamaig im ilpu halav atahig er apos ra an nuarin pece inigki, im lep vai ilpu risra im ilpu etmara eris apos ra ara an pece inigki;

⁴ erupu emesmas irai mas alupas ara; erupu eti imitaig ra natimi; um eti atelmoi ra; erupu idivaig nohok ara an nuarin nobohtan: uhpu auahas ra an nedoa, im lep an numlaig has; etpu itai caig nohura incai niji man an nauanohatag, im niji itai eklim edo irai pece.

⁵ Et ika a Ihova, Namu jim apan aiek an nimnim er ehtigtaig iran, um jim apan aiek um taig afakatotau um imitaig ra: vaig inig nikavaig, et ika a Ihova, ek mun atipagki nigpa unyak ainyak vai nup igcaki, nikavaig, naiyu u inliinmopok im naiheuc unyak.

⁶ Erupu emesmas a ilpu atimi alupas im tup atimi an pece inigki: erupu eti atelmoi ra natimi, um eti imitaig ra, erupu eti attai ra natimi vai nohocred ura, um eti ucsei numri nidjinira vai ra:

⁷ erupu eti alaa ra nitai caig natimi au nehtigtaig ura vai ra, um ago eropse inliinmopora vai ilpu atimi emesmas ira ra: erupu eti lumara nitai umnyi natimi mika eri umwig vai ilpu etmara im ilpu risra, mika yi eropse inliinmopora ara.

⁸ Im lep inig, namu jim apan aiek an nimnim er ago nitai caig iran, um ateuc ehele ra par hag um umwig.

⁹ Et ika a Ihova esjilid acen, Atua u nup Isreel; Namu ato aiek mika, ekpu ika ainyak yi idim tiih an nuarin pece inigki an nuhup unyimia, im lep an nopan unyimia, nohrai ilpu atimi imiacitak, im nohrai ilpu atimi cediaig, im nohrai ilpu atamaig era atidai ara, im nohrai ilpu atahig era atidai ara.

¹⁰ Etpu idim uco, nau wit asaig intas iji igki asega aiek ehele nup igcaki, erupu lep ika ehelum ara, Et mun asuptecnaig nohocred alupas asega inigki vai cama a Ihova van he? ka nedo acalacal unyima inhe? ka nedo has inig inhe ecra mun ago aijama vai Ihova Atua uja?

¹¹ Namu ika ehele ra aiek, Et ika a Ihova, Vaig inig nikavaig, eris udei nyak a ilpu retpomia im ilpu atmil unyimia, um apitac ilpu atmas irai iji pece, um aheca ura, um atpuse an nuhup ura, um udei nyak, um eti imiaiji intas alep unyak;

¹² im lep inig, eka mun esjilid aijaua irai ilpu retpomia par ago nedo has; vaig inig nikavaig, eka apitac naktaktai u inliinmopomia has aijaua, athi um athi ehni, um eti atahaijeg nyak:

¹³ ekpu lep ahlo pan caua an pece inigki ainyak mika aki amen an pece inig akis eti ato aijaua, aijaua marom im lep ilpu retpomia; akupu aheca u ilpu atmas irai iji pece eahki aijaua an nadiat im lep an nepig; ekpu eti aiheuc vai caua eahki ainyak.

¹⁴ Va nitai inigki, et ika a Ihova, namu ato aiek mika etpu yetpam nopan iyehki erupu eti lep ika ara, Et umoh a Ihova inig is lucsei nup Isreel aien an pece Ijipt, um imiaridji pam ra igcaki;

¹⁵ ja, Et umoh a Ihova inig is lucsei nup Isreel aien an pece inig et ahes narutu iran, im lep irai iji pece asega iji ig is ahau pan ra iran aien: ekpu lep lucsei ra ainyak um imiaridji pam ra igcaki an pece inig kis alupai ilpu retpora ainyak.

¹⁶ Et ika a Ihova, Namu ato aiek mika, ekpu ahlaig ainyak vai ilpu atimi ahilek mu inyi ahinag, erupu anai ra ara; ja par apitac ekpu ahlaig ainyak vai ilpu atimi ahilek niji itai eklim edo irai pece aleg inyi ahinag, erupu ahau ra ara irai iji au, im lep irai iji edoon, im lep irai iji mai ij.

¹⁷ Ek almoi nedo ura asega ainyak: er eti adenaig ra an nuhup unyak, er eti adenaig nedo has ura va nesganimtak.

¹⁸ Ekpu uhup ainyak um ecero aru nedo acalacal ura im nedo has ura; vaig inig nikavaig, era mun atgei atimi ara um ahlap ira ra vai ilpu atmas ura, um auahas inpece unvak; et ohua niji itai amcel vaig ura an nuarin amen iran unyak.

¹⁹ Ak Ihova, nemda unyak, im neom upene unyak, im nuarin amen upene iran unyak an nopan ohocred, erupu ahes irai tid an nobohtan a nup urai elcau um apam ehelum, um ika, Et idim inveijec inig, is eteuc ehele ilpu retpoma intas ahcil, im intakitai, im nitai iji ig is eti eteuc tah nitai upene iram

²⁰ Et ehka va atimi par ago ilpu atua imi ra; era idim eti ilpu atua ara.

²¹ Va nitai inigki ekpu ecethi esege imi ra ainyak, ekpu ika ainyak eri ato nikmak im nemda unyak; erupu lep ato ara mika et nidak Ihova.