Jeremaia 15 - Intas Etipup

NUARIN TAS ALUPAS 15.

1 Er erekhaigse ehni nup u Juta um ecahinag aru ira ra. 10 Et asan tas ehti a Jeremaia va nedemda ura, et upyi tas upene ehelen a Atua, 12 jam tas eduahpan vai ra. 15 Et alaigaheni a naprofeta, 19 um leh imi yin intas aiheuc ehele Atua.

¹ IS lep ika ehelek a Ihova, El erau aiji an nuhup unyak a Moses im Samuel, el et eti upene inliinmopok ainyak vai nup igcaki: uhmu ahlo pan itac ra, mika eri atga ura ara um eti amen an nuhup unyak.

² Etpu idim uco, el era ika ehelum ara, Ecrupu atga eda aijama? namu ika ehele ra aiek, Et ika a Ihova; Ara, er atcijai ra mika eri emesmas, erupu emesmas ara; im lep ra er atcijai ra mika eri atgei ra an nedoa, uhpu atgei ra an nedoa; im lep ra er atcijai ra mika eri emesmas an numlaig has, erupu emesmas ara an numlaig has; im lep ra er atcijai ra mika eri imiapan ra an taka pece, uhpu imiapan ra an taka pece.

³ Et ika a Ihova, Ekpu ikni niji obotpot itai et for ira ra ainyak: nikavaig, nedoa par atgei ra, im kuri par ces yi oplecoplec ra, im niji man an nauanohatag, im niji itai eklim edo irai pece, par caig ra um auahas ra.

⁴ Ekpu atcijai ra ainyak mika eri ohocred ara irai iji elcau asega an nobohtan, va Manasi inhal u Hesekaia natimarid an pece Juta, va nedo inig is ago aien Jerusalem.

⁵ Etpu aiheuc vai caua a di, ak nup u Jerusalem? etpu imitaig caua a di? etpu ahidaig pan yin a di par ahodaig namen upene unyimia?

⁶ Et ika a Ihova, Eka mun udei nyak aijaua, eka mun adumoij pan itac aijaua: va nitai inigki ekpu adan nikmak ainyak vai caua, um auahas caua; et ugni nyak par lep aiheuc vai caua.

⁷ Ekpu idim imiterimterim ra ainyak irai ilpui pece ura; ekpu atgei ilpu hal ura ainyak, ekpu auahas ilpu atimi unyak ainyak, vaig inig nikavaig, era eti adumoij pam an nedo ura ara.

⁸ Era ahinag acen vai nyak a ilpu takata ura eris emesmas a ilpu atamnyura, um idivaig nauanavig an jap: ek mun imiapan natimi emda ainyak mika yi aat an maliyum esjilid ura aien, natimi atoraliak itai an nadiatadiat: ek mun ika ainyak yi auroauro aien, um ato nedemda im nohocred an maliyum ura.

⁹ Et areci a intakata inig et mun apos ilpu hal o un et seven aien: et auatialidi inliinmopon aien; et mun ete nagesega an namen upene o un an nadiat: et mun ehcamai aien um imtitaig; et ika a Ihova, Etpu atcijaig nahrira ainyak pan an nedoa an nuhup u ilpu atimi tak atimi ira ra.

¹⁰ Kaiheuc vai nyak! ak risik, as apos nyak aiek mika ki atimi er ehtauo vai yin ainyak, im natimi er imiisjisitai vai yin ehele nup uran pece inigki asega; ek mun eti leh nimtan alupas vai mune unyak ainyak; ek mun eti alupai nimtan haklin vai mune ura ainyak; ja era asaig intas ahlaijaig vai nyak ara asega.

¹¹ Is ika a Ihova, Ek inveijec ainyak, ekpu imiatamaig euc ainyak mika an amen aiek: ekpu ika ainyak eri aiheuc vai euc a ilpu atimi tak atimi iram an nopan has im lep an nopan ohocredʼ.

¹² Et emda a di par ahtagrei aiurn, aiurn marom er leh an pece inig et ahes narutu iran, im lep bras?

¹³ Ekpu alupai ra ainyak niji itai esjilid unyimia im naga unyimia mika eri atoraliak ara, eri eti auanimtan ara ehelemia, ja va nedo has asega unyimia irai iji urai pece asega unyimia.

¹⁴ Ek mun ika ainyak eri imiatga caua a ilpu atimi tak atimi iramia, um yetpan an pece inig eka eti ato aijaua: etpu atnamud caua incap inig kis atni ainyak au tavaitap unyak.

¹⁵ Ak Ihova, na idim ato nohocred unyak aiek: namu imiehva nyak aiek, um ateghe nyak, um aru irai ilpu atimi atmas piv vai nyak; namu jim atipagki nyak aiek an nedemda opra unyum: namu ato aiek mika era auoh ehcamai nyak ara vai euc.

¹⁶ Kis ecetai Jutas unyum ainyak, kis caig ainyak; is itai cediaig imi nyak intas unyum, is imiacitak inliinmopok vaig: vaig inig nikavaig, eris aniv nyak au nidam, ak Ihova Atua esjilid acen.

¹⁷ Kis eti ateuc ainyak ehele ilpu atimi asjapicnaig um imiafakahcil intas unyum, kis eti imiacitak ainyak; kis echim ateuc ainyak va nedo unyum vai nyak: na mun idim ika aiek ki ohua ainyak van tavaitap unyum.

¹⁸ Et echamecha nohocred unyak par eti tiih, im inmocop unyak, et eti mah? et elika nago cehcehe nyak vaig: namu jim idivaig nitai ahcil vai nyak aiek, im inran wai et ame.

¹⁹ Et ika a Ihova, Va nitai inigki el et adumoij pam aiek, ekpu lep imiadumoij pam euc ainyak, napu aiji an nuhup unyak aiek: el et atipagki niji itai upene aiek irai iji itai has, napu idivaig nipjineucsek aiek: erumu adumoij pam ehelum ara; jam jim adumoij pan ehele ra aiek.

²⁰ Et ika a Ihova, Ekpu ati euc, ainyak mika au atimi emda aiek, um idivaig nathatahau bras, imi nup igcaki: el era ati nedoa vai euc ara, erupu eti esjilid iram ara; ekpu amen ehelum ainyak par imiatamaig euc um imiaras euc.

²¹ Ekpu imiaras euc ainyak va nikmai ilpu atimi auatatimi, um imialep euc va nemda u ilpu atimi er imtitaig ra.